ବ୍ରହ୍ମପୁର ଅଫିସ,୨୦ା୧: ରାଜ୍ୟ ସରକାର ଏମ୍ଡିଏମ୍ (ମିଡ୍ ଡେ ମିଲ୍) ଯୋଜନାରେ ସବୁ ସରକାରୀ ବିଦ୍ୟାଳୟର ଛାତ୍ରୀଛାତ୍ରଙ୍କ ନିମନ୍ତେ ମଧ୍ୟାହ୍ନ ଭୋଜନର ବ୍ୟବସ୍ଥା କରଛନ୍ତିି। କିନ୍ତୁ ବ୍ରହ୍ମପୁର ସହରର ବ୍ରଜନଗର ୨ୟ ଲେନରେ ଥିବା ସରକାରୀ ପ୍ରାଥମିକ ବିଦ୍ୟାଳୟର ମଧ୍ୟାହ୍ନଭୋଜନ ବୁଧବାର ଗୋରୁଙ୍କୁ ଖାଇବାକୁ ଦିଆଯାଉଥିବା ଦେଖିବାକୁ ମିଳିଛି। ମଧ୍ୟାହ୍ନଭୋଜନ ଯୋଜନା ଠିକ୍ ଭାବେ ହେଉ ନ ଥିବା ସହରତଳି ଅଞ୍ଚଳ ମିଳିତ କ୍ରିୟାନୁଷ୍ଠାନ କମିଟି ଅଭିଯୋଗ କରିଛି।
ପ୍ରତିଦିନ ବିଦ୍ୟାଳୟ ବାହାରେ ମଧ୍ୟାହ୍ନ ଭୋଜନ ପଡିଥିବା ଓ ତାକୁ ଗୋରୁ ଖାଉଥିବା ଦୃଷ୍ଟିକୁ ଆସୁଛି। ଖାଦ୍ୟର ମାନ ଓ ସ୍ବାଦ ଠିକ୍ ନ ଥିବାରୁ ବିଦ୍ୟାଳୟର ଛାତ୍ରୀଛାତ୍ର ଖାଇବାକୁ ଅମଙ୍ଗ ହେଉଥିବା ସନ୍ଦେହ କରାଯାଉଛି। ଯଦି ଖାଇବାକୁ ଅମଙ୍ଗ ହେଉଛନ୍ତି ତା’ ହେଲେ ଛାତ୍ରୀଛାତ୍ରଙ୍କୁ ଶୁଖିଲା ଖାଦ୍ୟ ପ୍ରଦାନ ନଚେତ ତାଙ୍କ ଆକାଉଣ୍ଟରେ ଟଙ୍କା ଜମା କରିବା ପାଇଁ କମିଟି ଦାବି କରିଛି। ତେବେ ଖାଦ୍ୟ ପ୍ରସ୍ତୁତି କରିବା ପରେ ଛାତ୍ରୀଛାତ୍ରମାନେ ଖାଉଛନ୍ତି କି ନାହିଁ ତାହାର ମଧ୍ୟ ତଦାରଖ କରାଯାଉ ନ ଥିବା କମିଟି ଅଭିଯୋଗ କରିଛି। ଏଣୁ ଏଭଳି କ୍ଷେତ୍ରରେ ଜିଲା ପ୍ରଶାସନ ହସ୍ତକ୍ଷେପ କରି କାର୍ଯ୍ୟାନୁଷ୍ଠାନ ଗ୍ରହଣ କରିବା ପାଇଁ କମିଟି ସଭାପତି ସଞ୍ଜୀବ କୁମାର ପଟ୍ଟନାୟକ ଦାବି କରିଛନ୍ତି।
ଏ ନେଇ ଜିଲା ଶିକ୍ଷାଧିକାରୀ ବିନୀତା ସେନାପତିଙ୍କ ସହ ଯୋଗାଯୋଗ ବେଳେ କହିଛନ୍ତି, ଏ ବାବଦରେ ମୁଁ କିଛି ଜାଣି ନାହିଁ। ଯଦିଓ ଖାଦ୍ୟ ବଳକା ହୋଇଥିବ ତାହା ହେଲେ ଗୋରୁଙ୍କୁ ଖାଇବାକୁ ଦିଆଯାଇଥିବ ବୋଲି ସେ କହିଛନ୍ତି। ଏ ସମ୍ପର୍କରେ ବ୍ରଜନଗର ସରକାରୀ ପ୍ରାଥମିକ ବିଦ୍ୟାଳୟ ପ୍ରଧାନ ଶିକ୍ଷକ ଜି.ସିଦ୍ଧାର୍ଥ ଶଙ୍କରଙ୍କୁ ପଚାରିବାରୁ ମୁଁ ଏ ବିଷୟରେ କିଛି ଜାଣି ନାହିଁ । ତଦନ୍ତ ପରେ ଜଣାପଡିଲେ କାର୍ଯ୍ୟାନୁଷ୍ଠାନ ନିଆଯିବ ବୋଲି କହିଛନ୍ତି ।
