ଆନନ୍ଦପୁର,୧୭।୩(ସ୍ବ.ପ୍ର.): କେନ୍ଦୁଝର ଜିଲା ଘସିପୁରା ଥାନା କେଶଦୁରାପାଳ ଅଞ୍ଚଳରେ ଗୋରୁ ବେପାରୀଙ୍କଠାରୁ ଚାନ୍ଦା ଆଦାୟ କରିବା ଘଟଣା ଯୁବକଙ୍କୁ ମହଙ୍ଗା ପଡିଛି। ଘସିପୁରା ପୋଲିସ ତଦନ୍ତ କରି ଘଟଣାରେ ସମ୍ପୃକ୍ତ ୨ ଅଭିଯୁକ୍ତଙ୍କୁ ଗିରଫ କରିଛି। ସେମାନଙ୍କ ମଧ୍ୟରୁ ଜଣେ ଗଣମାଧ୍ୟମ ପ୍ରତିନିଧି ଥିବା ଚର୍ଚ୍ଚା ହେଉଛି। ଗିରଫ ଅଭିଯୁକ୍ତମାନେ ହେଲେ ବିଭୁ ଓଝା ଏବଂ ରୁଦ୍ର ନାରାୟଣ ପରିଡ଼ା। ଏନେଇ ଘସିପୁରା ପୋଲିସ ଦଫା ୩୮୪, ୩୮୬, ୫୦୬, ୩୨୩ରେ ଏକ ମାମଲା(ନଂ୮୬/୨୩) ରୁଜୁ କରିଛି।
ଟୋଲଙ୍କନାଣ୍ଡି ଗ୍ରାମର ହୃଷୀକେଶ ଦାସଙ୍କ ପୁଅ ଟୁନା ଦାସଙ୍କ ଅଭିଯୋଗ ଅନୁଯାୟୀ ୩ ଜଣ ବ୍ୟକ୍ତି ବିଭିନ୍ନ ଗ୍ରାମରୁ ୩୭ଟି ଗୋରୁ କିଣି ବୁଧବାର ରାତିରେ ଚଲାଇ ଆଣୁଥିଲେ। ହେଲେ ବିଳମ୍ବିତ ରାତିରେ କେଶଦୁରାପାଳଠାରେ ୧୦ରୁ ଊର୍ଦ୍ଧ୍ୱ ଯୁବକ ତାଙ୍କୁ ଅଟକ ରଖି ବାନ୍ଧି ପକାଇଥିଲେ। ପରେ ସେମାନ ତାଙ୍କଠାରୁ ମୋବାଇଲ ଫୋନ ଛଡାଇ ନେବା ସହ ମାଡ଼ ମାରି ୨ଲକ୍ଷ ଟଙ୍କା ଦେବାକୁ ଦାବି କରିଥିଲେ। ଟଙ୍କା ନ ଦେଲେ ଜୀବନରୁ ମାରିଦେବାର ଧମକ ଦେଇଥିଲେ। ପରବର୍ତ୍ତୀ ସମୟରେ ସେମାନେ ପରିବାର ଲୋକଙ୍କ ସହ ଯୋଗାଯୋଗ କରି ଫୋନ୍ ପେ ମାଧ୍ୟମରେ ବିଭୁ ଓଝାଙ୍କୁ ୧ ଲକ୍ଷ ଟଙ୍କା ଦେବା ପରେ ସେମାନଙ୍କୁ ଛାଡିଥିଲେ। ଏନେଇ ଟୁନା ଦାସ ଘସିପୁରା ଥାନାରେ ଲିଖିତ ଅଭିଯୋଗ କରିଥିଲେ। ଗୁରୁବାର ପୋଲିସ ଦୁଇ ଅଭିଯୁକ୍ତଙ୍କୁ ଅଟକ ରଖି ପଚରାଉଚୁରା କରିଥିଲା। ଶୁକ୍ରବାର ପୋଲିସ ସମ୍ପୃକ୍ତ ଦୁଇ ଅଭିଯୁକ୍ତଙ୍କୁ ଗିରଫ କରିଥିବା ଥାନା ଅଧିକାରୀ ବିକ୍ରମ କୁମାର ଭୂୟାଁ ସୂଚନା ଦେଇଛନ୍ତି।