ନୂଆଦିଲ୍ଲୀ,୧୦।୧୦: ଦିଲ୍ଲୀ ଅବକାରୀ ଦୁର୍ନୀତି ମାମଲାରେ କେନ୍ଦ୍ରୀୟ ତଦନ୍ତ ବ୍ୟୁରୋ (ସିବିଆଇ) ଆଉ ଜଣଙ୍କୁ ଗିରଫ କରିଛି। ଅଭିଷେକ ବୋଇନପାଲିଙ୍କୁ ସିବିଆଇ ଗିରଫ କରିଛି। ଅଭିଷେକଙ୍କୁ କୋର୍ଟରେ ହାଜର କରାଯିବ। ସିବିଆଇ ଅଧିକାରୀମାନେ ଏ ସମ୍ପର୍କରେ ସୂଚନା ଦେଇଛନ୍ତି।
ଦକ୍ଷିଣ ଭାରତର କିଛି ମଦ ବ୍ୟବସାୟୀଙ୍କ ପାଇଁ କାମ କରୁଥିବା ଅଭିଷେକ ବୋଇନପାଲୀଙ୍କୁ ରବିବାର ପଚରାଉଚରା ପାଇଁ ଡକାଯାଇଥିଲା। ସେ କିଛି ଗୁରୁତ୍ୱପୂର୍ଣ୍ଣ ପ୍ରଶ୍ନରୁ ଦୂରେଇ ଯାଉଥିବା ଜାଣି ବିଳମ୍ବିତ ରାତିରେ ତାଙ୍କୁ ଗିରଫ କରାଯାଇଛି। ଏହାପୂର୍ବରୁ ଆମ୍ ଆଦ୍ମୀ ପାର୍ଟି ନେତା ବିଜୟ ନାୟାରଙ୍କୁ ସିବିଆଇ ଗିରଫ କରିଥିଲା। ଏହି ମାମଲାରେ ଦିଲ୍ଲୀ ଉପମୁଖ୍ୟମନ୍ତ୍ରୀ ମନୀଷ ସିସୋଡିଆ ମଧ୍ୟ ଜଣେ ଅଭିଯୁକ୍ତ।
ସୂଚନାଯୋଗ୍ୟ, ମନୀଷ ସିସୋଡିଆଙ୍କ ସମେତ ଆଠ ଜଣ ଅଭିଯୁକ୍ତଙ୍କ ବିରୋଧରେ ସିବିଆଇ ଏକ ଲୁକ୍ ଆଉଟ ସର୍କୁଲାର ନୋଟିସ ଜାରି କରିଛି। ଏଫ୍ଆଇଆର୍ରେ ମୋଟ ନଅ ଜଣଙ୍କ ନାମ ରହିଛି।
