ନୂଆଦିଲ୍ଲୀ, ୧୩ା୫: ବଲିଉଡ୍ ସୁପରଷ୍ଟାର ଶାହରୁଖ୍ ଖାନ୍ଙ୍କ ପୁଅ ଆର୍ୟନ ଖାନ୍ଙ୍କୁ ଦୁଇବର୍ଷ ପୂର୍ବେ ଡ୍ରଗ୍ସ ମାମଲାରେ ଗିରଫ କରିଥିବା ନାର୍କୋଟିକ୍ସ କଣ୍ଟ୍ରୋଲ ବ୍ୟୁରୋ (ଏନ୍ସିବି)ର ତତ୍କାଳୀନ ମୁମ୍ବାଇ ଜୋନାଲ ମୁଖ୍ୟ ସମୀର ଓ୍ବାଙ୍ଖଡେଙ୍କ ବିରୋଧରେ ସିବିଆଇ ଶୁକ୍ରବାର ଦୁର୍ନୀତି ମାମଲା ରୁଜୁ କରିଛି। ଡ୍ରଗ୍ସ ମିଳିଥିବା ଅଭିଯୋଗରେ ଆର୍ୟନଙ୍କ ବିରୋଧରେ ମାମଲା ରୁଜୁ ନ କରିବା ପାଇଁ ଓ୍ବାଙ୍ଖଡେ ଓ ଅନ୍ୟମାନେ ୨୫ କୋଟି ଟଙ୍କା ଲାଞ୍ଚ ମାଗିଥିଲେ ବୋଲି ଅଭିଯୋଗ ହୋଇଥିଲା। ସିବିଆଇ ମୁମ୍ବାଇ, ଦିଲ୍ଲୀ, ରାଞ୍ଚତ୍ ଓ କାନପୁରରେ ତଦନ୍ତ କରିବା ପରେ ମାମଲା ରୁଜୁ କରିଛି। ସୂଚନାଯୋଗ୍ୟ, ୨୦୨୧ ଅକ୍ଟୋବର ୨ରେ ମୁମ୍ବାଇ ଉପକୂଳରେ ଥିବା କର୍ଡେଲିଆ କ୍ରୁଜ୍ ଜାହାଜରେ ରେଭ୍ ପାର୍ଟି ଚାଲୁଥିବାବେଳେ ଓ୍ବାଙ୍ଖଡେଙ୍କ ନେତୃତ୍ୱରେ ଏନ୍ସିବି ଚଢ଼ାଉ କରି ସେଠାରୁ ଆର୍ୟନଙ୍କ ସମେତ ତାଙ୍କ ସାଙ୍ଗ ଅର୍ବାଜ ମର୍ଚ୍ଚାଣ୍ଟ ଓ ଅନ୍ୟ ୬ ଜଣଙ୍କୁ ଗିରଫ କରିଥିଲା। ଡ୍ରଗ୍ସ ମିଳିବା ଅଭିଯୋଗରେ ଆର୍ୟନ ୪ ସପ୍ତାହ ଜେଲରେ ରହିଥିଲେ। ପ୍ରମାଣ ଅଭାବରୁ ୨୦୨୨ ମେ’ରେ ତାଙ୍କୁ ଦୋଷମୁକ୍ତ କରାଯାଇଥିଲା। ଓ୍ବାଙ୍ଖଡେଙ୍କ ନେତୃତ୍ୱରେ କରାଯାଇଥିବା ତଦନ୍ତରେ ତ୍ରୁଟି ରହିଥିବା ପୂର୍ବରୁ ସ୍ବତନ୍ତ୍ର ତଦନ୍ତକାରୀ ଟିମ୍ (ଏସ୍ଆଇଟି) ଦର୍ଶାଇଥିଲା। ଗତବର୍ଷ ମେ’ରେ ଓ୍ବାଙ୍ଖଡେଙ୍କୁ ଚେନ୍ନାଇର ଟିକସଦାତା ସେବା ମହା ନିର୍ଦ୍ଦେଶାଳୟକୁ ବଦଳି କରାଯାଇଥିଲା।