ନୂଆଦିଲ୍ଲୀ,୩୦ା୩: କେନ୍ଦ୍ରର ମୋଦି ସରକାର ସିବିଆଇ ଏବଂ ଇଡିକୁ ହାତମୁଠାରେ ରଖିଥିବା ଅଭିଯୋଗ କରୁଛନ୍ତି ବିରୋଧୀ। ଏନେଇ କେନ୍ଦ୍ର ସ୍ବରାଷ୍ଟ୍ର ମନ୍ତ୍ରୀ ଅମିତ ଶାହା କହିଛନ୍ତି ଯେ, କଂଗ୍ରେସ ନେତୃତ୍ୱାଧୀନ ୟୁପିଏ ସରକାର ସମୟରେ ଗୁଜରାଟରେ ହୋଇଥିବା ନକଲି ଏନ୍କାଉଣ୍ଟର ମାମଲାରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କୁ ଫସାଇବାକୁ କେନ୍ଦ୍ରୀୟ ଅନୁସନ୍ଧାନ ବ୍ୟୁରୋ (ସିବିଆଇ) ମୋତେ ଚାପ ପକାଇଥିଲା।
ଏକ ମିଡିଆ ଗ୍ରୁପ୍ ଇଭେଣ୍ଟରେ ଯୋଗଦେଇ ବିରୋଧୀ ଦଳଙ୍କ ଅଭିଯୋଗ ଉପରେ ଏକ ପ୍ରଶ୍ନର ଉତ୍ତରରେ ଶାହା କହିଛନ୍ତି, ଆମେ କ୍ଷମତା ଅପବ୍ୟବହାରର ଭୁକ୍ତଭୋଗୀ। ମୋ ବିରୋଧରେ ନକଲି ଏନ୍କାଉଣ୍ଟର ନେଇ ଏକ ମିଥ୍ୟା ମାମଲା କରାଯାଇଥିଲା। ମୋଦିଙ୍କ ନାମ ନେବାକୁ ଚାପ ସୃଷ୍ଟି ହୋଇଥିଲା। ୯୦ ପ୍ରତିଶତ ପ୍ରଶ୍ନରେ କୁହାଯାଇଥିଲା ଯେ, ଯଦି ଆପଣ ମୋଦିଙ୍କ ନାମ ନେବେ ତେବେ ଆମେ ଆପଣଙ୍କୁ ଛାଡ଼ିଦେବୁ। ମୋଦିଙ୍କ ବିରୋଧରେ ଏକ ରାଜ୍ୟ ଏସ୍ଆଇଟି ଗଠନ କରିଥିଲା, କିନ୍ତୁ ଆମେ କେବେ ଅନୁତାପ କରିନାହୁଁ।
ଦଙ୍ଗାରେ ମୋତେ ଫସାଇବାକୁ ଉଦ୍ୟମ ହୋଇଥିଲା। ମୋ ନାଁ ଦଙ୍ଗାରେ ସମ୍ପୃକ୍ତ ଥିବା ମାମଲା ଥିଲା, କିନ୍ତୁ କିଛି ବାହାରକୁ ଆସିଲା ନାହିଁ। କୌଣସି କଳା ପୋଷାକ ପିନ୍ଧି ଆମେ ବିରୋଧ କରିନାହୁଁ। ଏହି ମାମଲା ମୁମ୍ବାଇ କୋର୍ଟକୁ ଯାଇଥିଲା। ସେଠାରେ କୋର୍ଟ ଏହି ମାମଲାକୁ ରାଜନୈତିକ ଉଦ୍ଦେଶ୍ୟମୂଳକ ବୋଲି କହିଥିଲେ। କଂଗ୍ରେସ ଏଗୁଡ଼ିକୁ ଅନୁଧ୍ୟାନ କରିବା ଉଚିତ୍ ବୋଲି ଶାହା କହିଛନ୍ତି।