କୋଲକାତା,୭।୬: ବଲିଉଡ୍ର ଖ୍ୟାତନାମା ପ୍ରଚ୍ଛଦପଟ ଗାୟକ କେକେଙ୍କ ମୃତ୍ୟୁର ସିବିଆଇ ତଦନ୍ତ ଦାବିରେ ଦାଏର ଏକ ଜନସ୍ବାର୍ଥ ମାମଲା (ପିଆଇଏଲ୍)କୁ କାଲ୍କାଟା ହାଇକୋର୍ଟଙ୍କ ଏକ ଖଣ୍ଡପୀଠ ଶୁଣାଣି ପାଇଁ ସୋମବାର ଗ୍ରହଣ କରିଛନ୍ତି। ସିବିଆଇ ତଦନ୍ତ ପାଇଁ ନିର୍ଦ୍ଦେଶ ଦେବାକୁ ଆଇନଜୀବୀ ରବିଶଙ୍କର ଚଟ୍ଟୋପାଧ୍ୟାୟ ହାଇକୋର୍ଟରେ ଅପିଲ କରିଥିଲେ। ମୁଖ୍ୟ ବିଚାରପତି ପ୍ରକାଶ ଶ୍ରୀବାସ୍ତବ, ଜଷ୍ଟିସ ରାଜର୍ଷି ଭରଦ୍ୱାଜଙ୍କୁ ନେଇ ଗଠିତ ଖଣ୍ଡପୀଠ ପିଆଇଏଲ୍କୁ ଗ୍ରହଣa କରିଛନ୍ତି। ରବିଶଙ୍କର ତାଙ୍କ ଅଭିଯୋଗରେ ଦର୍ଶାଇଛନ୍ତି, ସେହି ଗତ ମାର୍ଚ୍ଚ ୩୧ର ସେହି ଦୁର୍ଭାଗ୍ୟଜନକ ସନ୍ଧ୍ୟାରେ ନଜରୁଲ୍ ମଞ୍ଚ ପରିଚାଳନାରେ ଗୁରୁତର ତ୍ରୁଟି ହୋଇଥିଲା। ସ୍ଥାନୀୟ ପ୍ରଶାସନର ଅବହେଳାରୁ ଏଭଳି ସ୍ଥିତି ଉପୁଜିଲା। ପରିଚାଳନାଗତ ତ୍ରୁଟି ପଛରେ ରହିଥିବା ଅବହେଳାକୁ ଖୋଜି ବାହାର କରିବା ଲାଗି ସିବିଆଇ ତଦନ୍ତ ଜରୁରୀ ବୋଲି ପିଆଇଏଲ୍ରେ ଦର୍ଶାଯାଇଛି।
କୋଲକାତାର ନଜରୁଲ୍ ମଞ୍ଚରେ ଗୁର୍ଦାସ କଲେଜର ବାର୍ଷିକ ଉତ୍ସବରେ କେକେ ସଙ୍ଗୀତ ପରିବେଷଣ କରୁଥିବାବେଳେ ଅସୁସ୍ଥ ହୋଇପଡ଼ିଥିଲେ ଓ ହସ୍ପିଟାଲ ନେବା ବାଟରେ ତାଙ୍କର ମୃତ୍ୟୁ ଘଟିଥିଲା। ଅଡିଟୋରିୟମରେ ଦୁଇଗୁଣରୁ ଅଧିକ ଲୋକ ପ୍ରବେଶ କରିଥିଲେ। ଅତ୍ୟଧିକ ଗହଳି ଯୋଗୁ ଡୋର ଖୋଲିଦିଆଯିବାରୁ ଏସି କାମ କରି ନ ଥିଲା। କେକେ ସଙ୍ଗୀତ ପରିବେଷଣ କଲାବେଳେ ଅସୁସ୍ଥ ଅନୁଭବ କରିବା ସହ ଏସି ଚାଲୁ ନାହିଁ କି ବୋଲି ପଚାରିଥିଲେ।