ଭୁବନେଶ୍ୱର,୨୯ା୭(ବ୍ୟୁରୋ): ବେଆଇନ ଖଣି ଖନନ ଓ କୋଇଲା ଚୋରି ନେଇ ସିବିଆଇ ପକ୍ଷରୁ ବୁଧବାର ଓଡ଼ିଶା ସମେତ ପଶ୍ଚିମବଙ୍ଗ, ଉତ୍ତର ପ୍ରଦେଶର ବିଭିନ୍ନ ସ୍ଥାନରେ ଚଢ଼ାଉ କରାଯାଇଛି। କୋଇଲା ଚୋରି ଅଭିଯୋଗରେ ୨୦୨୦ ନଭେମ୍ବର ୨୭ରେ ସିବିଆଇ ୬ଜଣଙ୍କ ବିରୋଧରେ ଏକ ମାମଲା ରୁଜୁ କରିବା ସହ ତଦନ୍ତ ଜାରି ରଖିଛି। ଏହିକ୍ରମରେ ବୁଧବାର ସିବିଆଇ ଇଷ୍ଟନର୍ର୍ କୋଲ୍ଫିଲ୍ଡ ଲିମିଟେଡ(ଇସିଏଲ୍)ର କାର୍ଯ୍ୟାଳୟ ସମେତ ୩ ରାଜ୍ୟର ୧୫ ସ୍ଥାନରେ ଚଢ଼ାଉ କରିଛି। ସିବିଆଇ ପକ୍ଷରୁ ଇସିଏଲ୍ର ପୂର୍ବତନ ଏବଂ ବର୍ତ୍ତମାନର ଦୁଇ ଜିଏମ୍, ସିକ୍ୟୁରିଟି ମ୍ୟାନେଜର, ସିକ୍ୟୁରିଟି ଇନ୍ସପେକ୍ଟର, କୋଲିରି ଏଜେଣ୍ଟଙ୍କ ଘରେ ଏବଂ ଅଫିସରେ ଚଢ଼ାଉ କରାଯାଇଥିଲା। ଏହି ସମୟରେ ବର୍ତ୍ତମାନର ଜିଏମ୍ଙ୍କ ଘରୁ ପ୍ରାୟ ୨୦ଲକ୍ଷ ଟଙ୍କା ମୂଲ୍ୟର ଅଳଙ୍କାର ଏବଂ ସମ୍ପତ୍ତି ଦଲିଲ ଜବତ କରାଯାଇଛି। ସେହିପରି ଅନ୍ୟ କିଛି ସ୍ଥାନରୁ ସମ୍ପତ୍ତି ଦଲିଲ, ଲକର ଚାବି ଏବଂ ଆପରାଧିକ ଦଲିଲ୍ ସିବିଆଇ ଟିମ୍ ଜବତ କରିଛି। ଘଟଣାର ଅଧିକ ତଦନ୍ତ ଜାରି ରହିଥିବା କାରଣରୁ ଅଧିକ ସୂଚନା ମିଳିପାରି ନାହିଁ। ସୂଚନାଯୋଗ୍ୟ, ଆସାନସୋଲ୍ସ୍ଥିତ ଇସିଏଲ୍ ଓ ଏହାର ସଂଲଗ୍ନ ଘରୋଇ ଜମିରେ ବେଆଇନ ଖଣି ଖନନ ଏବଂ କୋଇଲା ଚୋରି ଅଭିଯୋଗ ହୋଇଥିଲା। ଏଥିରେ ବହୁ କୋଟି ଟଙ୍କାର ଦୁର୍ନୀତି ହୋଇଥିବା ସୂଚନା ମିଳିଥିଲା। ଏନେଇ ସିବିଆଇ ମାମଲା ରୁଜୁ କରି କେତେଜଣ ଅଭିଯୁକ୍ତଙ୍କୁ ଚିହ୍ନଟ କରିଥିଲା। ପୂର୍ବରୁ ସିବିଆଇ ପକ୍ଷରୁ ବିଭିନ୍ନ ରାଜ୍ୟର ୧୦୦ରୁ ଅଧିକ ସ୍ଥାନରେ ତଦନ୍ତ କରାଯାଇଥିଲା। ତଦନ୍ତ ସମୟରେ ପୂର୍ବରୁ ଜଣେ ବ୍ୟକ୍ତିଙ୍କୁ ଗିରଫ କରାଯାଇଥିଲା।