ବଅଁରପାଳ,୧୫ା୭(ଡି.ଏନ୍.ଏ.): କେନ୍ଦ୍ରୀୟ ଶିକ୍ଷା ବୋର୍ଡ (ସିବିଏସ୍ଇ) ଦଶମ ଶ୍ରେଣୀ ପରୀକ୍ଷା ଫଳ ବୁଧବାର ପ୍ରକାଶ ପାଇଛି। ଏଥିରେ ନାଲ୍କୋ ଡିପିଏସ୍ର ଛାତ୍ରୀଛାତ୍ର ବେଶ୍ ସଫଳତା ହାସଲ କରିଛନ୍ତି। ସ୍କୁଲରୁ ମୋଟ୍ ୧୭୧ ଜଣ ଛାତ୍ରୀଛାତ୍ର ପରୀକ୍ଷା ଦେଇଥିଲେ। ସେମାନଙ୍କ ମଧ୍ୟରୁ ୧୭୦ ଜଣ ପାସ୍ କରିଛନ୍ତି।
ଛାତ୍ର ଶ୍ରୀତମ ମହାନ୍ତି ସର୍ବାଧିକ ୪୯୧ ନମ୍ବର ତଥା ୯୮.୨ ପ୍ରତିଶତ ରଖି ସ୍କୁଲର ଟପ୍ପର ହୋଇଛନ୍ତି। ସେହିପରି ଛାତ୍ରୀ ନିକିତା ନିଶିପ୍ରଭା ୨ୟ ସ୍ଥାନ ଓ ଛାତ୍ର ଅନୁରାଗ ପ୍ରଧାନ ୩ୟ ସ୍ଥାନରେ ରହିଥିବା ଜଣାପଡ଼ିଛି। ସେହିପରି ୩୨ ଜଣ ଛାତ୍ରୀଛାତ୍ର ୯୫ ପ୍ରତିଶତରୁ ଊର୍ଦ୍ଧ୍ୱ ନମ୍ବର ରଖି ପାସ୍ କରିଛନ୍ତି। ୬୬ ଜଣ ୯୦ ପ୍ରତିଶତରୁ ଅଧିକ ନମ୍ବର ରଖିଛନ୍ତି। ୧୨୮ ଜଣ ୭୫ ପ୍ରତିଶତରୁ ଅଧିକ ନମ୍ବର ରଖିଛନ୍ତି। ସେହିପରି ୧୬୦ ଜଣ ଛାତ୍ରୀଛାତ୍ର ପ୍ରଥମ ଶ୍ରେଣୀରେ ପାସ କରିଥିବା ଜଣାପଡ଼ିଛି। ସ୍କୁଲର ଏହ ସଫଳତା ପାଇଁ ସ୍କୁଲ କମିଟିର ଅଧ୍ୟକ୍ଷ ବିପି ଖଣ୍ଡେଲଓ୍ବାଲା, ଉପାଧ୍ୟକ୍ଷ ବି.ଏମ୍ ଥାପ୍ପର, ଉପାଧ୍ୟକ୍ଷ ମନସା ପ୍ରସାଦ ମିଶ୍ର, ସ୍କୁଲ ଅଧ୍ୟକ୍ଷ ବିକେ ମିଶ୍ର, ସଭ୍ୟ ଏସ୍ଏନ୍ ସାହୁ ପ୍ରମୁଖ ସମସ୍ତ ଛାତ୍ରୀଛାତ୍ରଙ୍କୁ ଅଭିନନ୍ଦନ ଜଣାଇଛନ୍ତି।