ନୂଆଦିଲ୍ଲୀ,୨୨।୧୧: ସିବିଏସ୍ଇ ଦ୍ୱାଦଶ ବୋର୍ଡରେ ଇମ୍ପ୍ରୁଭ୍ମେଣ୍ଟ୍ ପରୀକ୍ଷାରେ ଦେଇ କମ୍ ନମ୍ବର ଅବା ଫେଲ୍ ହୋଇଥିବା ଶିକ୍ଷାର୍ଥୀଙ୍କର ପୂର୍ବ ମାର୍କ ବଜାୟ ରହିବା ଲାଗି ସୁପ୍ରିମ୍କୋର୍ଟରେ କରାଯାଇଥିବା ଏକ ଆବେଦନର ଶୁଣାଣିକୁ ଡିସେମ୍ବର ୬ କୁ ଘୁଞ୍ଚାଇ ଦିଆଯାଇଛି। ସିବିଏସ୍ଇକୁ ଏନେଇ ନିର୍ଦ୍ଦେଶ ଦେବାକୁ ଆବେଦନରେ ଉଲ୍ଲେଖ କରାଯାଇଛି।
ବିଚାରପତି ଏ.ଏମ୍.ଖାନଓ୍ବିଲ୍କର ଏବଂ ସି.ଟି. ରବିକୁମାରଙ୍କ ନେତୃତ୍ୱରେ ଗଠିତ ଖଣ୍ଡପୀଠ ମାମଲାର ବିଚାର ସମୟରେ ସିବିଏସ୍ଇ ଆଇନଜୀବୀଙ୍କ ପକ୍ଷରୁ ଉପଯୁକ୍ତ ନିର୍ଦ୍ଦେଶ ହସ୍ତଗତ ହେବା ଲାଗି ସମୟ ଲୋଡ଼ା ଯାଇଥିବାରୁ ଏହାକୁ ପରବର୍ତ୍ତୀ ଶୁଣାଣି ପର୍ଯ୍ୟନ୍ତ ଘୁଞ୍ଚାଇ ଦିଆଯାଇଛି। ରବିବାର ସନ୍ଧ୍ୟାରେ ତାଙ୍କୁ କପି ମିଳିଥିବା ସିବିଏସ୍ଇ ଆଇନଜୀବୀ ଖଣ୍ଡପୀଠଙ୍କ ସମ୍ମୁଖରେ ପ୍ରକାଶ କରିଥିଲେ।
ପୂର୍ବରୁ ଏନେଇ ଆଗୁଆ କପି ଶିକ୍ଷାର୍ଥୀଙ୍କ ଆଇନଜୀବୀ ମମତା ଶର୍ମାଙ୍କ ପକ୍ଷରୁ ସିବିଏସ୍ଇ ଏବଂ ମାନବ ସମ୍ବଳ ବିକାଶ କେନ୍ଦ୍ରୀୟ ଏଜେନ୍ସିଙ୍କୁ ପ୍ରଦାନ କରାଯାଇଥିଲା। ଇମ୍ପ୍ରୁଭ୍ମେଣ୍ଟ୍ ପରୀକ୍ଷାରେ ଖରାପ ହେଲେ ପୂର୍ବ ନମ୍ବର ଜାରି ରଖିବାକୁ ସେ ଆବେଦନରେ ଦର୍ଶାଇଥିଲେ। ୨୦୨୧ ଜୁନ୍ ୧୭ରେ ପ୍ରକାଶିତ ପରୀକ୍ଷା ଫଳର ମୂଲ୍ୟାଙ୍କନ ନୀତିର ଧାରା ୨୮ ଅର୍ନ୍ତଗତ ସେମାନଙ୍କ ମୂଳ ନମ୍ବରକୁ ରଦ୍ଦ କରି ଦିଆଯିବାର ଆଶଙ୍କା ଥିବା ଆବେଦନରେ କୁହାଯାଇଛି। ତେବେ ଏଭଳି ନୀତିକୁ ପ୍ରତ୍ୟାହାର କରିବାକୁ ଆବେଦନରେ କୁହାଯାଇଛି।
ସିବିଏସ୍ଇ ମୂଲ୍ୟାଙ୍କନ ନୀତିର ଧାରା ୨୮ ଅର୍ନ୍ତଗତ ଇମ୍ପ୍ରୁଭ୍ମେଣ୍ଟ୍ ପରୀକ୍ଷାରେ ହାସଲ ହୋଇଥିବା ନମ୍ବରକୁ ଚୂଡ଼ାନ୍ତ ଭାବେ ଧରାଯିବ। ମାତ୍ର ଏହାକୁ କମ୍ ନମ୍ବର ଅବା ଫେଲ କ୍ଷେତ୍ରରେ ହଟାଇବାକୁ ଆବେଦନରେ କୁହାଯାଇଛି।