ମୁମ୍ବାଇ: ରିଲାଏନ୍ସ ଇଣ୍ଡଷ୍ଟ୍ରିଜ ପକ୍ଷରୁ ଫ୍ୟୁଚର ଗ୍ରୁପ୍ର ରିଟେଲ କାରବାର ଅଧିଗ୍ରହଣ ଡିଲ୍କୁ କମ୍ପିଟିଶନ କମିଶନ ଅଫ୍ ଇଣ୍ଡିଆ(ସିବିଆଇ) ଶୁକ୍ରବାର ମଞ୍ଜୁରୀ ପ୍ରଦାନ କରିଛି। ଏହି ଡିଲ୍କୁ ବାତିଲ କରିବା ଲାଗି ଆମାଜନ ଆପତ୍ତି ଉଠାଇ ଆସିଥିଲା। ବିଭିନ୍ନ ନିୟମକୁ ଫ୍ୟୁଚର ଗ୍ରୁପ୍ ଅବମାନନା କରିଛି ବୋଲି ଆମାଜନ ଅଭିଯୋଗରେ କହିଥିଲା। ଏଭଳି ଅଭିଯୋଗ ସତ୍ତ୍ୱେ ମଧ୍ୟ ସିସିଆଇ ଡିଲ୍କୁ ସବୁଜ ସଙ୍କେତ ପ୍ରଦାନ କରିଛନ୍ତି। ଏହା ଉଭୟ ଫ୍ୟୁଚର ଗ୍ରୁପ୍ ଏବଂ ଆମାଜନ ଲାଗି ଆଶ୍ୱସ୍ତି ବୋଲି କୁହାଯାଉଛି। ପୂର୍ବରୁ ଫ୍ୟୁଚର ଗ୍ରୁପ୍ରେ ଆମାଜନ ନିବେଶ କରିଛି। ମାତ୍ର ଫ୍ୟୁଚର ଗ୍ରୁପ୍ ଏହାର ରିଟେଲ କାରବାର ଏସିଆର ସବୁଠାରୁ ଧନୀ ବ୍ୟକ୍ତି ମୁକେଶ ଅମ୍ବାନୀଙ୍କୁ ବିକ୍ରି କରିବା ପାଇଁ ଚୁକ୍ତିରେ ସାମିଲ ହେବା ପରେ ଆମାଜନ ଆପତ୍ତି ଉଠାଇଥିଲା। ଫ୍ୟୁଚର ଗ୍ରୁପ୍ର ଏକ ହୋଲ୍ଡିଂ କମ୍ପାନୀରେ ଆମାଜନ ନିବେଶ କରିଛି। ରିଲାଏନ୍ସ ଏବଂ ଫ୍ୟୁଚର ଡିଲ୍ ଆଇନ ଅବମାନନା କରୁଥିବା ଦର୍ଶାଇ ଆମାଜନ ସିସିଆଇ ଏବଂ ବଜାର ନିୟନ୍ତ୍ରକ ଭାରତୀୟ ପ୍ରତିଭୂତି ଏବଂ ବିନିମୟ ବୋର୍ଡ(ସେବି) ନିକଟରେ ଦ୍ୱାରସ୍ଥ ହୋଇଥିଲା। ମାତ୍ର ସବୁ କଳ୍ପନା ଜଳ୍ପନାର ଅନ୍ତ ଘଟାଇ ସିସିଆଇ ପ୍ରସ୍ତାବିତ ଡିଲ୍କୁ ସବୁଜ ସଙ୍କେତ ଦେଇଛନ୍ତି।
