ନୂଆଦିଲ୍ଲୀ, ୩।୧୨: ଦେଶର ସମସ୍ତ ଥାନା ଏବଂ ସିବିଆଇ, ଜାତୀୟ ତଦନ୍ତକାରୀ ସଂସ୍ଥା (ଏନ୍ଆଇଏ), ପ୍ରବର୍ତ୍ତନ ନିର୍ଦ୍ଦେଶାଳୟ (ଇଡି) ଆଦି ତଦନ୍ତକାରୀ ସଂସ୍ଥାରେ ସିସିଟିଭି କ୍ୟାମେରା ଲଗାଇବା ବାଧ୍ୟତାମୂଳକ। ଉକ୍ତ କ୍ୟାମେରାରେ ନାଇଟ୍ ଭିଜନ ସାଙ୍ଗକୁ ଅଡିଓ ରେକର୍ଡିଂ ସୁବିଧା ରହିବ। ହାଜତରେ ଅତ୍ୟାଚାର ରୋକିବା ଲାଗି ସୁପ୍ରିମକୋର୍ଟ ବୁଧବାର ଏଭଳି ଐତିହାସିକ ନିର୍ଦ୍ଦେଶ ଦେଇଛନ୍ତି। ରାଜ୍ୟ ସରକାରଙ୍କୁ ପ୍ରତ୍ୟେକ ଥାନାରେ ସିସିଟିଭି କ୍ୟାମେରା ଲଗାଇବାକୁ କୁହାଯାଇଛି। ଏହି କ୍ୟାମେରା ଥାନାର ଜେରା ପ୍ରକୋଷ୍ଠ, ହାଜତ, ପ୍ରବେଶ ଓ ପ୍ରସ୍ଥାନ ପଥ, କରିଡର, ଲବି, ଅଭ୍ୟର୍ଥନା ପ୍ରକୋଷ୍ଠ, ଇନ୍ସ୍ପେକ୍ଟର ଓ ସବ୍ଇନ୍ସପେକ୍ଟରଙ୍କ ପ୍ରକୋଷ୍ଠରେ ରହିବ।
ଅଧିକାଂଶ ତଦନ୍ତକାରୀ ସଂସ୍ଥା ସେମାନଙ୍କ କାର୍ଯ୍ୟାଳୟରେ ଜେରା କରୁଥିବାରୁ ସେହିସବୁ ଅଫିସରେ ସିସିଟିଭି କ୍ୟାମେରା ଲଗାଇବା ବାଧ୍ୟତାମୂଳକ ବୋଲି ବିଚାରପତି କହିଛନ୍ତି। ସେହିପରି ନାର୍କୋଟିକ୍ସ କଣ୍ଟ୍ରୋଲ ବ୍ୟୁରୋ, ରାଜସ୍ବ ଗୋଇନ୍ଦା ନିର୍ଦ୍ଦେଶାଳୟ ଏବଂ ଗୁରୁତର ଜାଲିଆତି ତଦନ୍ତ କାର୍ଯ୍ୟାଳୟରେ ମଧ୍ୟ ସିସିଟିଭି କ୍ୟାମେରା ଲଗାଇବାକୁ ସର୍ବୋଚ୍ଚ ଅଦାଲତ ନିର୍ଦ୍ଦେଶ ଦେଇଛନ୍ତି। ସିସିଟିଭିର ଅଡିଓ ଏବଂ ଭିଡିଓ ରେକର୍ଡିଂ ଆବଶ୍ୟକ ସ୍ଥଳେ ପ୍ରମାଣ ପାଇଁ ୧୮ ମାସ ପର୍ଯ୍ୟନ୍ତ ସଂରକ୍ଷିତ ରଖିବାକୁ ହେବ। ରାଜ୍ୟ ସରକାରଗୁଡ଼ିକ ନିର୍ଦ୍ଦିଷ୍ଟ ସମୟସୀମା ମଧ୍ୟରେ କ୍ୟାମେରା ଲଗାଇବା ପାଇଁ କ’ଣ କାର୍ଯ୍ୟଯୋଜନା କରିଛନ୍ତି, ୬ ସପ୍ତାହ ମଧ୍ୟରେ ଜଣାଇବେ। ସମ୍ବିଧାନର ଧାରା ୨୧ ଅନୁଯାୟୀ ଜୀବନ ଓ ବ୍ୟକ୍ତିଗତ ସ୍ବାଧୀନତା ସୁରକ୍ଷା ମୌଳିକ ଅଧିକାରର ସୁରକ୍ଷାକୁ ଦୃଷ୍ଟିରେ ରଖି ସୁପ୍ରିମକୋର୍ଟ ଉପରୋକ୍ତ ନିର୍ଦ୍ଦେଶ ଦେଇଛନ୍ତି।
ପଞ୍ଜାବର ଏକ ହାଜତ ନିର୍ଯାତନା ମାମଲାର ଶୁଣାଣି ବେଳେ ସେଠାରେ ସୁରକ୍ଷା କ୍ୟାମେରା ଲଗାଯାଇ ନ ଥିବା ଜାଣିବା ପରେ ସର୍ବୋଚ୍ଚ ଅଦାଲତ ଏହା କହିଛନ୍ତି। ସିସିଟିଭି କ୍ୟାମେରା ଲଗାଇବା ପାଇଁ ୨୦୧୮ରେ ସୁପ୍ରମକୋର୍ଟ ନିର୍ଦ୍ଦେଶ ଦେଇଥିଲେ ହେଁ ତାହା କାର୍ଯ୍ୟକାରୀ ହୋଇ ନ ଥିବାରୁ ଖଣ୍ଡପୀଠ କ୍ଷୁବ୍ଧ ହୋଇଥିଲେ। ସିସିଟିଭି କ୍ୟାମେରା ଲଗାଇବା ପାଇଁ ପାଣ୍ଠି ବ୍ୟବସ୍ଥା କରିବା ସହ ହାଜତ ନିର୍ଯାତନା ଅଭିଯୋଗର ଶୁଣାଣି ଲାଗି ପ୍ରତି ଜିଲାରେ ମାନବାଧିକାର କୋର୍ଟ ସ୍ଥାପନ ଲାଗି ରାଜ୍ୟଗୁଡ଼ିକୁ ନିର୍ଦ୍ଦେଶ ଦିଆଯାଇଛି। ମାମଲାର ପରବର୍ତ୍ତୀ ଶୁଣାଣି ଜାନୁୟାରୀ ୨୭ରେ ହେବ।