ବରଗଡ଼ ଅଫିସ, ୨୪।୨: ବରଗଡ଼ ଜିଲାପାଳ ମୋନିଷା ବାନାର୍ଜୀଙ୍କ ବିରୋଧରେ ଜିଲା ମୁଖ୍ୟ ଚିକିତ୍ସାଧିକାରୀ (ସିଡିଏମଓ) ଡା. ଚାରୁବାଳା ରଥ ଅଭିଯୋଗ ଆଣି ରାଜ୍ୟ ସ୍ବାସ୍ଥ୍ୟ ସଚିବଙ୍କୁ ଫେରାଦ ହୋଇଛନ୍ତି। ତାଙ୍କୁ ଜିଲାପାଳ ବାନାର୍ଜୀ ବିନା କାରଣରେ ଦୁର୍ବ୍ୟବହାର ପ୍ରଦର୍ଶନ କରିଥିବା ସିଡିଏମଓ ରଥ ଅଭିଯୋଗ କରିଛନ୍ତି। ଅଭିଯୋଗ ପତ୍ରରେ ସିଡିଏମଓ ରଥ ଉଲ୍ଲେଖ କରିଛନ୍ତି ଯେ, ଗତ ୨୧ ତାରିଖରେ ସେ ଏକ ସ୍ବାସ୍ଥ୍ୟ ଶିବିର ପରିଦର୍ଶନ ପାଇଁ ଯାଉଥିବା ବେଳେ ଅଚାନକ ଜିଲାପାଳ ବାନାର୍ଜୀଙ୍କ ଫୋନକଲ ତାଙ୍କ ପାଖକୁ ଆସିଥିଲା। ସ୍ବାସ୍ଥ୍ୟ ବିଭାଗର ଏକ ଟେଣ୍ଡର କାମ ନେଇ ଜିଲାପାଳ ତାଙ୍କୁ ପଚାରିଥିଲେ । ନୂତନଭାବେ ସେ ଯୋଗଦାନ କରିଛନ୍ତି ଏବଂ ଡିପିଏମଙ୍କୁ ପଚାରି କହୁଛି ତଥା ତାହା ପ୍ରୋସେସରେ ଅଛି ବୋଲି ସିଡିଏମଓ ରଥ ଜିଲାପାଳଙ୍କୁ କହିଥିଲେ। ପରେ ଜିଲାପାଳ ତାଙ୍କୁ ଉଚ୍ଚ ପାଟିରେ ଆପଣ କିଛି ଜାଣି ନାହାନ୍ତି ତ ସେ ଚେୟାରରେ କାହିଁକି ବସିଛନ୍ତି ବୋଲି କହିଥିବା ସିଡିଏମଓ ରଥ ଅଭିଯୋଗ କରିଛନ୍ତି। ପୂର୍ବରୁ ମଧ୍ୟ ଜିଲାପାଳ ସ୍ବାସ୍ଥ୍ୟ ବିଭାଗର ଅଧିକାରୀଙ୍କୁ ଏଭଳି ବ୍ୟବହାର ତଥା ଜଣେ ପୂର୍ବତନ ସିଡିଏମଓଙ୍କୁ କୋଠରୀ ମଧ୍ୟରେ ବନ୍ଦ ରଖି ବାହାର ପଟୁ ତାଲା ପକାଇଥିବା ନେଇ ସେ ଶୁଣିବାକୁ ପାଇଛନ୍ତି ବୋଲି ସିଡିଏମଓ ରଥ ଅଭିଯୋଗ ପତ୍ରରେ ଉଲ୍ଲେଖ କରିଛନ୍ତି। ଏଭଳି ସ୍ଥିତିରେ ଜିଲାପାଳ ବାନାର୍ଜୀଙ୍କୁ ଅନ୍ୟତ୍ର ବଦଳି କରିବା ପାଇଁ ସିଡିଏମଓ ରଥ ସ୍ବାସ୍ଥ୍ୟ ସଚିବଙ୍କୁ ନିବେଦନ କରିଛନ୍ତି। ତେବେ ଏ ସମ୍ପର୍କରେ ଜିଲାପାଳ ବାନାର୍ଜୀଙ୍କ ପ୍ରତିକ୍ରିୟା ମିଳିପାରି ନାହିଁ।
