ମୁମ୍ବାଇ, ୨୫।୪(ପି.ଟି.)- ପୂର୍ବତନ ଟିମ୍ ଇଣ୍ଡିଆ ଅଧିନାୟକ ସଚିନ ତେନ୍ଦୁଲକର ଶନିବାର ନିଜ ୪୮ତମ ଜନ୍ମଦିନ ପାଳନ କରିଛନ୍ତି। ଏହି ଅବସରରେ ସେ କୋଭିଡ୍-୧୯ରୁ ସୁସ୍ଥ ହୋଇଥିବା ସମ୍ପର୍କରେ ସୂଚନା ଦେଇଛନ୍ତି ଏବଂ ଅନୁମତି ମିଳିଲେ ପ୍ଲାଜ୍ମା ଦାନ କରିବେ ବୋଲି କହିଛନ୍ତି। ସଚିନ ମାର୍ଚ୍ଚ ୨୭ରେ କରୋନାରେ ଆକ୍ରାନ୍ତ ହୋଇଥିବା ଜଣାପଡ଼ିଥିଲା। ସତର୍କତାମୂଳକ ପଦକ୍ଷେପ ସ୍ବରୂପ ସେ କିଛିଦିନ ପାଇଁ ଡାକ୍ତରଖାନାରେ ଭର୍ତ୍ତି ହୋଇଥିଲେ। ”ଡାକ୍ତରଙ୍କଠାରୁ ମୁଁ ଯାହା ଜାଣିବାକୁ ପାଇଛି ସେ ସମ୍ପର୍କରେ ଏକ ବାର୍ତ୍ତା ଦେବାକୁ ଚାହୁଁଛି। ଗତବର୍ଷ ମୁଁ ଏକ ପ୍ଲାଜ୍ମା ଦାନ ସେଣ୍ଟର ଉଦ୍ଘାଟନ କରିଥିଲି। ଯଦି ଠିକ୍ ସମୟରେ ପ୍ଲାଜ୍ମା ଦାନ କରାଯାଏ ତେବେ ରୋଗୀ ଶୀଘ୍ର ସୁସ୍ଥ ହେବା ସମ୍ଭାବନା ରହିଛି“ ବୋଲି ତେନ୍ଦୁଲକର ନିଜ ଟୁଇଟର ପେଜ୍ରେ ଏକ ଭିଡିଓ ପୋଷ୍ଟ କରି ପ୍ରକାଶ କରିଛନ୍ତି। ବ୍ୟକ୍ତିଗତ ଭାବେ ତାଙ୍କୁ ଅନୁମତି ମିଳିଲେ ସେ ପ୍ଲାଜ୍ମା ଦାନ କରିବେ ବୋଲି ଡାକ୍ତରଙ୍କୁ ଜଣାଇଥିବା ସଚିନ କହିଛନ୍ତି। ଏପ୍ରିଲ ୮ରେ ଡାକ୍ତରଖାନାରୁ ଆସିବା ପରେ ସଚିନ ହୋମ୍ ଆଇସୋଲେଶନରେ ଥିଲେ। ନିୟମ ଅନୁସାରେ ଜଣେ ବ୍ୟକ୍ତି ପ୍ଲାଜ୍ମା ଦାନ କରିବାର ୧୪ ଦିନ ପୂର୍ବରୁ ତା’ଠାରେ କୌଣସି ଲକ୍ଷଣ ପ୍ରକାଶ ପାଇ ନ ଥିବ। ଯେଉଁମାନେ କୋଭିଡ୍-୧୯ରୁ ମୁକ୍ତ ହୋଇଛନ୍ତି ସେମାନେ ନିଜ ଡାକ୍ତରଙ୍କ ସହ ପରାମର୍ଶ କରନ୍ତୁ। ଅନୁମତି ମିଳିଲେ ଦୟାକରି ରକ୍ତଦାନ କରନ୍ତୁ। ଏହା ଅନେକ ସମସ୍ୟାକୁ କମାଇ ଦେଇଥାଏ। ଆମେ ଯେତେବେଳେ ଅସୁସ୍ଥ ଥାଉ ସେତେବେଳେ ଆମ ପରିବାର ଏବଂ ବନ୍ଧୁବର୍ଗ କିପରି ସମସ୍ୟାଦେଇ ଗତି କରିଥାନ୍ତି ତାହା ଆମେ ଜାଣିଛେ ବୋଲି ଏହି ଆଇକନିକ୍ ଖେଳାଳି ପ୍ରକାଶ କରିଛନ୍ତି। ଚିକିତ୍ସା ସମୟରେ ସକାରାତ୍ମକ ଚିନ୍ତାଧାରାରେ ରଖିଥିବାରୁ ଡାକ୍ତରଙ୍କୁ ଧନ୍ୟବାଦ ଜଣାଇଛନ୍ତି ସଚିନ। ଗତ ମାସ ମୋ ପାଇଁ ଅତ୍ୟନ୍ତ କଷ୍ଟସାଧ୍ୟ ଥିଲା। ମୁଁ କରୋନାରେ ଆକ୍ରାନ୍ତ ହୋଇଥିବାରୁ ୨୧ଦିନ ଆଇସୋଲେଶନରେ ରହିଥିଲି। ଏହି ସମୟ ମଧ୍ୟରେ ମୋ ପରିବାର, ବନ୍ଧୁବର୍ଗ ଏବଂ ଡାକ୍ତର ସକାରାତ୍ମକ ଚିନ୍ତାଧାରାରେ ରଖିଥିଲେ। ଏହା ମୋତେ ସୁସ୍ଥ ହେବାରେ ବହୁତ ସାହାଯ୍ୟ କରିଥିଲା। ଏଥିପାଇଁ ସମସ୍ତଙ୍କୁ ଅନେକ ଅନେକ ଧନ୍ୟବାଦ ବୋଲି ସଚିନ ଏହି ଭିଡିଓ ବାର୍ତ୍ତାରେ ପ୍ରକାଶ କରିଛନ୍ତି।