ବେଙ୍ଗାଲୁରୁ,୧୮।୮ : ଭାଜପାର ଜନ ଆଶୀର୍ବାଦ ଯାତ୍ରା ବେଳେ ଯାଦଗିରଠାରେ କିଛି କର୍ମୀ ଫାଙ୍କା ଗୁଳି ଚଳାଇଛନ୍ତି। ଏହି ଘଟଣାରେ ୪ ଜଣଙ୍କୁ ଗିରଫ କରାଯାଇଛି। ଜବତ ହୋଇଥିବା ୪ ବନ୍ଧୁକ ମଧ୍ୟରେ ଦୁଇଟିର ଲାଇସେନ୍ସ ଅଛି। ଅନ୍ୟ ଦୁଇ ବନ୍ଧୁକର ଯାଞ୍ଚ କରାଯାଉଛି ବୋଲି ଜଣେ ବରିଷ୍ଠ ପୋଲିସ ଅଧିକାରୀ କହିଛନ୍ତି।
ଘଟଣାର ଭିଡିଓରେ ପୂର୍ବତନ ମନ୍ତ୍ରୀ ବାବାରାଓ ଚିନଚାନସୁର ବନ୍ଧୁକ ଉପରକୁ ଉଠାଇ ରଖିଥିବା ବେଳେ ଅନ୍ୟମାନେ ଗୁଳି ଚଳାଉଛନ୍ତି। କେନ୍ଦ୍ର ମନ୍ତ୍ରୀ ଭଗଓ୍ବନ୍ତ ଖୁବାଙ୍କ ନେତୃତ୍ୱରେ ରାଲି ଆୟୋଜିତ ହୋଇଥିଲା। ଆଶୀର୍ବାଦ ଯାତ୍ରାର ଉଦ୍ଦେଶ୍ୟ ହେଲା ପ୍ରଧାନମନ୍ତ୍ରୀଙ୍କ ନୂଆ ମନ୍ତ୍ରିମଣ୍ଡଳରେ ସାମିଲ ହୋଇଥିବା ନୂଆ ମନ୍ତ୍ରୀଙ୍କ ସହ ଜନସାଧାରଣଙ୍କୁ ପରିଚିତ କରାଇବା। କେବଳ କର୍ନାଟକ ନୁହେଁ, ୨୨ ରାଜ୍ୟରେ ଜନ ଆଶୀର୍ବାଦ ଯାତ୍ରା କରାଯାଉଛି। ଏଥିରେ ୩୯ ମନ୍ତ୍ରୀ ଭାଗ ନେଇଛନ୍ତି।
