ଟିକିରି,୧୦ା୪( ଡି.ଏନ୍.ଏ.): ରାୟଗଡ଼ା ଜିଲା କାଶିପୁର ବ୍ଲକ ଟିକିରି ସ୍ବାସ୍ଥ୍ୟକେନ୍ଦ୍ରର ଛାତରୁ ରବିବାର ସିମେଣ୍ଟ ଖଣ୍ଡ ଖସିଛି। ଏହି ସମୟରେ ସ୍ବାସ୍ଥ୍ୟକେନ୍ଦ୍ରରେ କୌଣସି ରୋଗୀ ନ ଥିବାରୁ ଦୁର୍ଘଟଣା ଘଟିନାହିଁ। ଯଦି ଅନ୍ୟ ସମୟରେ କୌଣସି ରୋଗୀଙ୍କ ଉପରେ ଏହି ସିମେଣ୍ଟ ଖଣ୍ଡ ଖସି କିଛି ଦୁର୍ଘଟଣା ଘଟିବ ସେଥିପାଇଁ କିଏ ଦାୟୀ ରହିବେ ତାକୁୁ ନେଇ ପ୍ରଶ୍ନ ଉଠିଛି। ସେହିଭଳି ସ୍ବାସ୍ଥ୍ୟକେନ୍ଦ୍ର କର୍ମଚାରୀମାନେ ମଧ୍ୟ ନିଜକୁ ସୁରକ୍ଷିତ ମନେକରୁନାହାନ୍ତି। ଏହି ସ୍ବାସ୍ଥ୍ୟ କେନ୍ଦ୍ରଟି ବହୁତ ପୁରୁଣା ହୋଇଥିବାରୁ ପୂର୍ବରୁ ବିଭିନ୍ନ ଥର ଛାତରୁ ସିମେଣ୍ଟ ଖସୁଥିବା ଦେଖିବାକୁ ମିଳିଛି। ଦୁର୍ଘଟଣା ଘଟିବା ପୂର୍ବରୁ ସରକାର ଏହି ସ୍ବାସ୍ଥ୍ୟ କେନ୍ଦ୍ର ଉପରେ ଦୃଷ୍ଟି ଦିଅନ୍ତୁ ବୋଲି ସ୍ଥାନୀୟବାସୀ ଦାବି କରିଛନ୍ତି। ଏହି ସ୍ବାସ୍ଥ୍ୟକେନ୍ଦ୍ର ପ୍ରତ୍ୟେକ ଦିନ ସକାଳ ୪ଘଣ୍ଟା ଏବଂ ସନ୍ଧ୍ୟାରେ ୪ଘଣ୍ଟା ଖୋଲାଯାଏ। ରାତି ସମୟରେ ରୋଗୀ ସ୍ବାସ୍ଥ୍ୟସେବାରୁ ବଞ୍ଚିତ ହେଉଛନ୍ତି। ବିଭିନ୍ନ ସମସ୍ୟା ବିଷୟରେ ଜାଣି ମଧ୍ୟ ଜିଲା ସ୍ବାସ୍ଥ୍ୟ ବିଭାଗ ଅଧିକାରୀମାନେ ଚୁପ ରହୁଛନ୍ତି। ଏ ନେଇ ସ୍ବାସ୍ଥ୍ୟ କେନ୍ଦ୍ର ଅଧିକାରୀ ନେତ୍ରାନନ୍ଦ ନାୟକଙ୍କୁ ପଚାରିବାରୁ ଏହି ସମସ୍ୟା ସମ୍ପର୍କରେ ଉପର ଅଧିକାରୀଙ୍କୁ ଜଣାଇଛି ବୋଲି କହିଛନ୍ତି।