ନୟାଗଡ଼ ଅଫିସ,୨୨।୧୧: ନୟାଗଡ଼ ଜିଲା ଗୋଡିପଡା ଫାଣ୍ଡି ଭାଲିଆଡିହି ଶ୍ମଶାନରେ ମୃତଦେହ ଦାହକୁ ନେଇ ଉପରସାହି ଓ ପାଇକସାହି ମଧ୍ୟରେ ଶୁକ୍ରବାର ଅପରାହ୍ନରୁ ଲାଗିରହିଥିବା ଉତ୍ତେଜନା ଶନିବାର ସନ୍ଧ୍ୟାରେ ଥମିଛି। ଉପରସାହି ଲୋକ ମୃତଦେହ ଦାହ କରିବାକୁ ଦାବି କରୁଥିବାବେଳେ ପାଇକସାହି ଲୋକ ଏହାକୁ ବିରୋଧ କରିବାରୁ ବିବାଦ ଦେଖାଦେଇଥିଲା। ଉତ୍ତେଜନା ବଢୁଥିବା ଦେଖି ଫୋର୍ସ ମୁତୟନ ହୋଇଥିଲେ। ଖବର ପାଇ ଅତିରିକ୍ତ ଏସ୍ପି ଉମାକାନ୍ତ ନାୟକ, ଓଡ଼ଗାଁ ତହସିଲଦାର, ଶରଣକୁଳ ଏସ୍ଡିପିଓ, ବିଭିନ୍ନ ଥାନାର ଆଇଆଇସି ପହଞ୍ଚି ବୁଝାଶୁଝା ପରେ ଶନିବାର ସନ୍ଧ୍ୟା ୬ଟାରେ ମୃତଦେହ ଦାହ ହୋଇଛି। ସୂଚନାଯୋଗ୍ୟ ଭାଲିଆଡିହି ହାଇସ୍କୁଲ ପାଖ ଶ୍ମଶାନରେ ମୃତଦେହ ଦାହ ହୋଇଆସୁଛି। ତେବେ କିଛିବର୍ଷ ହେଲା ପାଇକସାହି ଲୋକ ଏହାକୁ ବିରୋଧ କରିଆସୁଛନ୍ତି। ବିବାଦ ଲାଗିରହିବାରୁ କିଛି ମାସ ତଳେ ଓଡ଼ଗାଁ ତହସିଲଦାର ଯାଇ ଶ୍ମଶାନର ମାପଚୁପ କରି ଚିହ୍ନଟ କରିଥିଲେ। ଏଭଳିସ୍ଥଳେ ଶୁକ୍ରବାର ଅପରାହ୍ନରେ ଉପରସାହିର ନାଥ ପ୍ରଧାନ(୭୦)ଙ୍କ ମୃତ୍ୟୁ ହୋଇଥିଲା। ପରିବାର ଲୋକେ ମୃତଦେହ ଦାହ ପାଇଁ ଶ୍ମଶାନକୁ ନେଇଥିଲେ। ହେଲେ ପାଇକସାହି ଲୋକ ବିରୋଧ କରିଥିଲେ। ଶ୍ମଶାନରେ ଅପରାହ୍ନ ୫ଟାରୁ ମୃତଦେହ ପଡିରହିଥିବାବେଳେ ତାଙ୍କ ସ୍ତ୍ରୀ ଓ ପୁଅ ଜଗିରହିଥିଲେ। ଏ ନେଇ ଶରଣକୁଳ ଆଇଆଇସି ବିମଳ ନାୟକ କୁହନ୍ତି, ଶ୍ମଶାନ ବିବାଦର ସମାଧାନ ହୋଇଛି। ତେବେ ଉଭୟ ପକ୍ଷଙ୍କ ସହ ସୋମବାର ଶରଣକୁଳ ଝାଡେଶ୍ୱରୀ ମନ୍ଦିରରେ ଆଲୋଚନା କରାଯାଇ ସମାଧାନ କରାଯିବାକୁ ନିଷ୍ପତ୍ତି ପରେ ମୃତଦେହ ଦାହ କରାଯାଇଛି।