ଓ୍ବାଶିଂଟନ, ୨୭।୭: ପୃଥିବୀରେ କରୋନା ମହାମାରୀ ସଂକ୍ରମଣ ଯୋଗୁ ଆତଙ୍କ ସୃଷ୍ଟି ହୋଇଛି। କରୋନା ପ୍ରତିଷେଧକ ଟୀକା ଆଶାରେ ସାଧାରଣ ଲୋକଙ୍କ ଜୀବନ ବିତୁଛି। କେବେ ଟୀକା ଆସିବ ମଣିଷ ମହାମାରୀ ସମସ୍ୟାରୁ ମୁକ୍ତି ପାଇବ, ସେନେଇ ଲୋକେ ଆଶାବାନ୍ଧି ବସିଛନ୍ତି। ଏପରିସ୍ଥଳେ କେତେକ ମହାମାରୀ ବିପଦ ସମୟରେ ନିଜ ପକେଟ ଗରମ କରିଚାଲିଛନ୍ତି। ଏଭଳି ଏକ ଘଟଣା ଆମେରିକାରେ ଘଟିଛି। କରୋନା ପ୍ରତିଷେଧକ ଟୀକା ପ୍ରସ୍ତୁତି ଜାରି ରଖିଥିବା ୧୧ଟି ଔଷଧ କମ୍ପାନୀର ଶେୟାର ବଢ଼ିବାରେ ଲାଗିଛି। ଏହାର ଫାଇଦା କମ୍ପାନୀର ବଡ଼ ଅଫିସରମାନେ ନେଇଛନ୍ତି। ସେମାନେ କମ୍ପାନୀର ଶେୟାର କାରବାରରେ ଅଂଶଗ୍ରହଣ କରଛନ୍ତି। ଚଢ଼ାଦାମରେ କିଣି ଥିବା ଶେୟାର ବିକ୍ରି କରି ସାଢ଼େ ୭ ହଜାର କୋଟି ଟଙ୍କାର ଲାଭ ପାଇଛନ୍ତି। ଗଣମାଧ୍ୟମ ସଂସ୍ଥା ନ୍ୟୁୟର୍କ ଟାମମ୍ସ୍ ଅନୁସାରେ ଏହାଦ୍ୱାରା କେବଳ ଲୋକେ ହିଁ ଭକୁଆ ପାଲଟିଛନ୍ତି। ଅପରପକ୍ଷରେ ଔଷଧ କମ୍ପାନୀର ଉଚ୍ଚ ଅଫିସର ଏଥିରେ ଲାଭାନ୍ବିତ ହୋଇଛନ୍ତି। ଅଫିସରମାନେ ଅନୈତିକ ଉପାୟରେ ଅର୍ଥ ରୋଜଗାର କରିଥିବା ଆମେରିକାର ଅଣ-ଲାଭକାରୀ ସଂସ୍ଥା ପେସେଣ୍ଟ୍ ଫର୍ ଆଫୋଡେବୁଲ୍ ଡ୍ରଗ୍ସ୍ର କାର୍ଯ୍ୟକାରୀ ନିର୍ଦ୍ଦେଶକ ବେନ୍ ଓ୍ବକାନା କହିଛନ୍ତି। ଠିକ୍ ସମୟରେ ଷ୍ଟକ୍ କିଣିବା ଏବଂ ବିକ୍ରି କରିବା ଆଇନ ଅନୁସାରେ ଭୁଲ୍ ନୁହେଁ। ମାତ୍ର ସମ୍ପୃକ୍ତ ଅଫିସରମାନେ ଔଷଧ କମ୍ପାନୀଗୁଡ଼ିକର ଆଭ୍ୟନ୍ତରୀଣ ଖବର ଅନୁସାରେ ଶେୟାର କିଣା ବିକା କରିଥିବା କୁହାଯାଉଛି। ମହାମାରୀ ସମୟରେ ସାଧାରଣ ଲୋକେ ମାନବିକତାର ପରିଚୟ ଦେଉଥିବାବେଳେ ସମ୍ପକ୍ତ ଅଫିସରମାନେ ନିଜ ସ୍ବାର୍ଥକୁ ଦେଖିଥିବା ଅଭିଯୋଗ ହୋଇଛି।
