ନୂଆଦିଲ୍ଲୀ,୧ ।୧: ଦେଶରେ କରୋନା ସଂକ୍ରମଣ ବେଳକୁ ବେଳ ବୃଦ୍ଧି ପାଉଥିବା ବେଳେ ଏବେ ଏହା ଉଭୟ ଜନସାଧାରଣ ଓ ସରକାରଙ୍କ ପାଇଁ ଚିନ୍ତାର କାରଣ ପାଲଟିଛି । ଏହାକୁ ଦୃଷ୍ଟିରେ ରଖି ବିଭିନ୍ନ ସ୍ଥାନରେ ୨୪ ଘଣ୍ଟିଆ କରୋନା ଟେଷ୍ଟିଂ ସେଣ୍ଟର ଖୋଲିବାକୁ କେନ୍ଦ୍ର ସରକାର ରାଜ୍ୟକୁ ନିର୍ଦ୍ଦେଶ ଦେଇଛନ୍ତି । ଉକ୍ତ କେନ୍ଦ୍ରରେ ୨୪ ଘଣ୍ଟିଆ ରାପିଡ ଆଣ୍ଟିଜେନ ଟେଷ୍ଟିଂ ସୁବିଧା ଦିଆଯିବ । ଏହାସହ ସ୍ୱାସ୍ଥ୍ୟକର୍ମୀଙ୍କୁ ଲକ୍ଷଣ ଥିବା ସଂକ୍ରମିତଙ୍କୁ ଦେଶରେ ନିର୍ମିତ କିଟ୍ ବ୍ୟବହାର କରିବାକୁ କହିବାକୁ କୁହାଯାଇଛି ।
ରାଜ୍ୟର ମୁଖ୍ୟ ସଚିବଙ୍କୁ ଲେଖାଯାଇଥିବା ଏକ ପତ୍ରରେ କେନ୍ଦ୍ର ସ୍ୱାସ୍ଥ୍ୟ ସଚିବ ରାଜେଶ ଭୂଷଣ ଓ ଭାରତୀୟ ଚିକିତ୍ସା ଏବଂ ଅନୁସନ୍ଧାନ ପରିଷଦ(ଆଇସିଏମ୍ଆର୍)ର ମହାନିର୍ଦ୍ଦେଶକ ଡା. ବଳରାମ ଭାର୍ଗବ କହିଛନ୍ତି, କୌଣସି ବ୍ୟକ୍ତିଙ୍କୁ ଜ୍ୱର, କାଶ, ଥଣ୍ଡା, ଗଳା ଦରଜ, ଗଳା ଫୁଲିବା, ଦେହ ଦରଜ, ସ୍ୱାଦ ଓ ଗନ୍ଧ ବାରି ନ ପାରିବା, ଥକାପଣ ଓ ବାନ୍ତି ଲାଗୁଥିଲେ ସେମାନଙ୍କୁ କରୋନା ସଂକ୍ରମିତ ଭାବେ ଧରିନେବାକୁ ପଡିବ ।