ନୂଆଦିଲ୍ଲୀ,୩୧ା୧୨: କାନାଡାରେ ଖଲିସ୍ତାନୀ ଆତଙ୍କବାଦୀ ହରଦୀପ୍ ସିଂ ନିଜ୍ଜର ହତ୍ୟା ଘଟଣାକୁ ନେଇ ନୂଆଦିଲ୍ଲୀ ଏବଂ ଓଟାଓ୍ବା ମଧ୍ୟରେ କୂଟନୈତିକ ସ୍ତରରେ ଉତ୍ତେଜନା ଲାଗିରହିଥିବାବେଳେ କାନାଡ଼ାରେ ଥାଇ ଆତଙ୍କବାଦୀ କାର୍ଯ୍ୟକଳାପ ଚଳାଇଥିବା ଗ୍ୟାଙ୍ଗ୍ଷ୍ଟର ଲଖବୀର ସିଂ ଲାଣ୍ଡାଙ୍କୁ କେନ୍ଦ୍ର ସରକାର ଆନୁଷ୍ଠାନିକ ଭାବେ ଆତଙ୍କବାଦୀ ଘୋଷଣା କରିଛନ୍ତି। ୩୪ ବର୍ଷୀୟ ଲଖ୍ବୀର ଖଲିସ୍ତାନୀ ସଂଗଠନ ବାବ୍ବର ଖାଲ୍ସା ଇଣ୍ଟରନ୍ୟାଶନାଲ (ବିକେଆଇ) ସହ ସମ୍ପୃକ୍ତ। ପଞ୍ଜାବ ତରନତରନ ଜିଲାର ନିରଞ୍ଜନ ସିଂ ଏବଂ ପରମିନ୍ଦର କୌରଙ୍କ ପୁଅ ହେଉଛନ୍ତି ଲଖବୀର। ଲଖବୀର ସିଂ ଲାଣ୍ଡା କାନାଡାର ଖଲିସ୍ତାନ ସପକ୍ଷବାଦୀ ତତ୍ତ୍ୱ ସହ ଘନିଷ୍ଠ ଭାବେ ଜଡ଼ିତ। ତାଙ୍କର ଶିଖ୍ ଫର୍ ଜଷ୍ଟିସ୍ର ନେତା ଗୁରପତ୍ଓ୍ବନ୍ତ ସିଂ ପନ୍ନୁ, ଖଲିସ୍ତାନ ଟାଇଗର ଫୋର୍ସ୍ର ନେତା ହରଦୀପ୍ ସିଂ ନିଜ୍ଜର ଓ ଅନ୍ୟମାନଙ୍କ ସହ ସମ୍ପର୍କ ରହିଥିଲା ବୋଲି ସ୍ବରାଷ୍ଟ୍ର ମନ୍ତ୍ରଣାଳୟ ଜାରି କରିଥିବା ବିଜ୍ଞପ୍ତିରେ କୁହାଯାଇଛି।