ହାଇଦ୍ରାବାଦ,୮।୪ : ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଶନିବାର ତେଲେଙ୍ଗାନାକୁ ଅନେକ ପ୍ରକଳ୍ପ ଉପହାର ଦେଇଛନ୍ତି। ତେଲେଙ୍ଗାନାର ସିକନ୍ଦରାବାଦ ରେଳ ଷ୍ଟେଶନର ପୁନର୍ନିର୍ମାଣ ପାଇଁ ପ୍ରଧାନମନ୍ତ୍ରୀ ମୂଳଦୁଆ ପକାଇଛନ୍ତି। ସେ ସିକନ୍ଦରାବାଦରୁ ତିରୁପତି ପର୍ଯ୍ୟନ୍ତ ଚାଲୁଥିବା ବନ୍ଦେ ଭାରତ ଟ୍ରେନକୁ ପତାକା ଦେଖାଇ ଶୁଭାରମ୍ଭ କରିଛନ୍ତି। ଏହା ପରେ ପ୍ରଧାନମନ୍ତ୍ରୀ ତେଲେଙ୍ଗାନାର ଲୋକଙ୍କୁ ମଧ୍ୟ ସମ୍ବୋଧିତ କରି ମୁଖ୍ୟମନ୍ତ୍ରୀ କେ. ଚନ୍ଦ୍ରଶେଖର ରାଓ(କେସିଆର)ଙ୍କୁ କଡ଼ା ସମାଲୋଚନା କରିଥିଲେ।
ରାଜ୍ୟରେ କେସିଆରଙ୍କ ରାଜନୀତିକୁ ଆକ୍ଷେପ କରି କହିଛନ୍ତି, ହାତଗଣତି କିଛି ଲୋକ ବିକାଶ କାର୍ଯ୍ୟକୁ ଡରୁଛନ୍ତି। ସେମାନେ ପରିବାରବାଦ, ଆତ୍ମୀୟବାଦ ଏବଂ ଦୁର୍ନୀତିକୁ ଜାଣିଶୁଣି ପ୍ରୋତ୍ସାହିତ କରୁଛନ୍ତି । ଏହା ଦ୍ୱାରା ରାଜ୍ୟରେ କାମ କରୁଥିତ୍ବା ଲୋକେ ସମସ୍ୟାର ସମ୍ମୁଖୀନ ହେଉଛନ୍ତି। ଏଭଳି ରାଜନେତାମାନଙ୍କର ଦେଶ, ରାଜ୍ୟ ତଥା ସମାଜର କଲ୍ୟାଣ ସହିତ କୌଣସି ସମ୍ପର୍କ ନାହିଁ। ସେମାନେ କେବଳ ସେମାନଙ୍କର ବଂଶର ଉନ୍ନତି ଦେଖିବାକୁ ଚାହାଁନ୍ତି। ତେଲେଙ୍ଗାନା ଏହିପରି ଲୋକଙ୍କ ପ୍ରତି ସତର୍କ ରହିବା ଆବଶ୍ୟକ।
କେନ୍ଦ୍ରକୁ ରାଜ୍ୟ ସରକାରଙ୍କ ସମର୍ଥନ ମିଳୁନି। ଫଳରେ ବହୁ ବିକାଶମୂଳକ କାର୍ଯ୍ୟ ସମ୍ଭବ ହୋଇ ପାରୁ ନାହିଁ ବୋଲି ପ୍ରଧାନମନ୍ତ୍ରୀ କହିଛନ୍ତି।