ନୂଆଦିଲ୍ଲୀ,୭।୯: କେନ୍ଦ୍ର ସରକାର ଗତ ୨ ବର୍ଷ ହେଲା ଓଡ଼ିଶାର ବିଚାର ବିଭାଗୀୟ ଭିତ୍ତିଭୂମି ନିର୍ମାଣ ପାଇଁ ଆବଶ୍ୟକ ପାଣ୍ଠିକୁ ଅଟକାଇ ରଖିଛନ୍ତି। ଏନେଇ ମଙ୍ଗଳବାର ରାଜ୍ୟ ସରକାରଙ୍କ ପକ୍ଷରୁ ସୁପ୍ରିମକୋର୍ଟରେ ଦାଖଲ ଏକ ସତ୍ୟପାଠରେ ଅବଗତ କରାଯାଇଛି।
ଓଡ଼ିଶା ସରକାରଙ୍କ ପକ୍ଷରୁ ଆଡ୍ଭୋକେଟ ଜେନେରାଲ ଅଶୋକ ପରିଜା ସୁପ୍ରିମକୋର୍ଟକୁ କହିଛନ୍ତି, ଆମେ ଦୁଇବର୍ଷ ହେଲା କେନ୍ଦ୍ରୀୟ ଅନୁଦାନ ପାଇନାହୁଁ। ରାଜ୍ୟ ସରକାରଙ୍କ ଓକିଲ ଶିବଶଙ୍କର ମିଶ୍ର କହିଛନ୍ତି, କେନ୍ଦ୍ର ସରକାର ୨୦୨୦-୨୧ ଓ ୨୦୨୧-୨୨ ଆର୍ଥିକ ବର୍ଷରେ ଓଡ଼ିଶାକୁ ପାଣ୍ଠି ଯୋଗାଇ ଦେଇ ନାହାନ୍ତି। ବିନିଯୋଗ ପ୍ରମାଣପତ୍ର(ୟୁସି) ଦାଖଲ କରାଯାଇ ନ ଥିବା ଦର୍ଶାଇ କେନ୍ଦ୍ର ପକ୍ଷରୁ ପାଣ୍ଠି ବନ୍ଦ କରାଯାଇଥିବା ସେ କହିଛନ୍ତି। ଶିବଶଙ୍କରଙ୍କ ଜରିଆରେ ରାଜ୍ୟ ସରକାର ଦାଖଲ କରିଥିବା ସତ୍ୟପାଠରେ ଦର୍ଶାଯାଇଛି ଯେ, ୨୦୧୮-୧୯ରେ କେନ୍ଦ୍ର ଓ ରାଜ୍ୟ ଅଂଶ ବାବଦକୁ ୩୭.୫୦ କୋଟି ଟଙ୍କାର ପାଣ୍ଠି ଓଡ଼ିଶା ହାଇକୋର୍ଟଙ୍କୁ ଯୋଗାଇ ଦିଆଯାଇଥିଲା। ରାଜ୍ୟ ସରକାର ୨୦୧୯-୨୦ରେ ବଜେଟରେ ସ୍ବତନ୍ତ୍ର ବ୍ୟବସ୍ଥା କରି ରାଜ୍ୟ ଓ ଜିଲାସ୍ତରୀୟ କୋର୍ଟଗୁଡ଼ିକର ଭିତ୍ତିଭୂମି ନିର୍ମାଣ ଲାଗି ୫୯.୪୮ କୋଟି ଟଙ୍କା ପ୍ରଦାନ କରିଥିଲେ। କିନ୍ତୁ କେନ୍ଦ୍ର ସରକାର ରାଜ୍ୟକୁ ଏହି ବାବଦ ଅର୍ଥ ଦେଇନାହାନ୍ତି। ଅନ୍ୟପକ୍ଷେ କେନ୍ଦ୍ରୀୟ ଯୋଜନାଗୁଡ଼ିକର କୌଣସି ପାଣ୍ଠିକୁ ଅନ୍ୟ କୌଣସି ପ୍ରକଳ୍ପରେ ଖର୍ଚ୍ଚ କରାଯାଇନାହିଁ। ଆଇନ ଓ ନ୍ୟାୟ ମନ୍ତ୍ରଣାଳୟରେ ରାଜ୍ୟ ସରକାର ୮ଟି ପର୍ଯ୍ୟାୟରେ ୭୦ କୋଟି ଟଙ୍କାର ୟୁସି ଦାଖଲ କରିସାରିଛନ୍ତି, ଯହିଁରୁ ୪୨.୧୩ କୋଟି କେନ୍ଦ୍ରୀୟ ଶେୟାର। ୨୬.୭୭ କୋଟିର ୟୁସି ଦାଖଲ କରିବା ବାକି ଅଛି, ଯହିଁରୁ କେନ୍ଦ୍ରୀୟ ଶେୟାର ହେଉଛି ୧୬.୦୬ କୋଟି ଟଙ୍କା। ଜଷ୍ଟିସ୍ ଡି.ଓ୍ବାଇ. ଚନ୍ଦ୍ରଚୂଡ଼ ଏବଂ ହିମା କୋହିଲଙ୍କ ଖଣ୍ଡପୀଠ ହାଇକୋର୍ଟ ଏବଂ ଓକିଲମାନଙ୍କ ନିକଟକୁ ଇ-ମେଲ୍ ଜରିଆରେ ନିର୍ଦ୍ଧାରିତ ଆବେଦନପତ୍ର ପ୍ରେରଣ କରିବାକୁ ଆମିକସ୍ କ୍ୟୁରିଙ୍କୁ ନିର୍ଦ୍ଦେଶ ଦେଇଛନ୍ତି। ଇ-ମେଲ୍ ପାଇବାର ୩ ସପ୍ତାହ ମଧ୍ୟରେ ସେମାନେ ପ୍ରାପ୍ତ ଅନୁଦାନ ଓ ପାଣ୍ଠି ବିନିଯୋଗର ବିସ୍ତୃତ ବିବରଣୀ ଦାଖଲ କରିବେ। ଅକ୍ଟୋବର ତୃତୀୟ ସପ୍ତାହରେ ଏହାର ପରବର୍ତ୍ତୀ ଶୁଣାଣି କରାଯିବ।