ନୂଆଦିଲ୍ଲୀ, ୯ା୬: ମେଡିକାଲ କଲେଜଗୁଡ଼ିକରେ ୨୦୨୧-୨୨ ଶିକ୍ଷାବର୍ଷ ପାଇଁ ୧୪୫୬ ସିଟ୍ ଫାଙ୍କା ପଡ଼ିଛି। ଏହାକୁ ନେଇ ସୁପ୍ରିମକୋର୍ଟ ବୁଧବାର କେନ୍ଦ୍ର ସରକାରଙ୍କ ଉପରେ ଅସନ୍ତୋଷ ବ୍ୟକ୍ତ କରିଛନ୍ତି। ସିଟ୍ ପୂରଣ ପାଇଁ ମେଡିକାଲ କାଉନ୍ସେଲିଂ କମିଟି (ଏମ୍ସିସି) ଏବଂ କେନ୍ଦ୍ର ସରକାର ମୋପ୍-ଅପ୍ ରାଉଣ୍ଡ କାଉନ୍ସେଲିଂ ନ କରି ପିଲାଙ୍କ ଭବିଷ୍ୟତ ସହ ଖେଳୁଛନ୍ତି ବୋଲି ଜଷ୍ଟିସ୍ ଏମ୍. ଆର୍. ଶାହା ଏବଂ ଅନିରୁଦ୍ଧ ବୋଷଙ୍କୁ ନେଇ ଗଠିତ ଅବକାଶକାଳୀନ ଖଣ୍ଡପୀଠ କହିଛନ୍ତି।
ଅଧିକ ସଂଖାରେ ଡାକ୍ତର ଏବଂ ସୁପର ସ୍ପେଶାଲିଟି ମେଡିକାଲ ପ୍ରଫେସନାଲ ଆବଶ୍ୟକ ଥିବାବେଳେ କାହିଁକି ସିଟ୍ ଖାଲିପଡ଼ିଛି? ଏଥିଯୋଗୁ ଛାତ୍ରୀଛାତ୍ର ଏବଂ ସେମାନଙ୍କ ଅଭିଭାବକ କେଉଁଭଳି ମାନସିକ ଦୁଶ୍ଚିନ୍ତାରେ ରହୁଥିବେ ସେ କଥା କ’ଣ ବିଚାର କରାଯାଇଛି କି ବୋଲି ଖଣ୍ଡପୀଠ କେନ୍ଦ୍ର ସରକାରଙ୍କୁ ପ୍ରଶ୍ନ କରିଛନ୍ତି। ଏନ୍ଇଇଟି-ପିଜି ୨୦୨୧-୨୨ ପରୀକ୍ଷା ଦେଇଥିବା କେତେଜଣ ଡାକ୍ତରଙ୍କ ପକ୍ଷରୁ ହୋଇଥିବା ଏକାଧିକ ପିଟିଶନର ଶୁଣାଣି କରି ସୁପ୍ରିମକୋର୍ଟ କହିଛନ୍ତି, ଏହା କେବଳ ଆଶାୟୀଙ୍କ ପାଇଁ ସମସ୍ୟା ସୃଷ୍ଟି କରିବ ନାହିଁ ବରଂ ଦୁର୍ନୀତିକୁ ମଧ୍ୟ ପ୍ରୋତ୍ସାହିତ କରିବ। ଏ ନେଇ ଅଦାଲତ ବିଚାର କରିସାରିଛନ୍ତି।
କେତେ ସଂଖ୍ୟାରେ ଛାତ୍ରୀଛାତ୍ରଙ୍କୁ ଆଡ୍ମିଶନ ମିଳିବ ସେଥିପାଇଁ ଏକ କଟ୍-ଅଫ୍ ତାରିଖ ଧାର୍ଯ୍ୟ କରାଯିବା ଜରୁରୀ। ଯଦି ଛାତ୍ରୀଛାତ୍ରମାନଙ୍କୁ ଆଡ୍ମିଶନ ନ ମିଳେ ଏବଂ ଖାଲିଥିବା ସିଟ୍ ପୂରଣ ନ ହୁଏ ତେବେ ସେମାନଙ୍କୁ କ୍ଷତିପୂରଣ ପ୍ରଦାନ ନିମନ୍ତେ ଅଦାଲତ ନିର୍ଦ୍ଦେଶ ଜାରି କରିବେ ବୋଲି ଖଣ୍ଡପୀଠ କହିଛନ୍ତି। ସେହିପରି କୌଣସି ଗୋଟିଏ କୋର୍ସରେ ସିଟ୍ ଫାଙ୍କା ରହିଲେ ଏହା କିପରି ପୂରଣ ହେବ ତାହା ଏମ୍ସିସିର ଦାୟିତ୍ୱ କୋର୍ଟ ଟିପ୍ପଣୀ ଦେଇଛନ୍ତି। ପରବର୍ତ୍ତୀ ଶୁଣାଣି ପାଇଁ କେନ୍ଦ୍ର ସରକାର ଏବଂ ଏମ୍ସିସି ସେମାନଙ୍କ ଅଧିକାରୀଙ୍କୁ ଗୁରୁବାର କୋର୍ଟରେ ଉପସ୍ଥିତ ରହିବା ପାଇଁ ନିର୍ଦ୍ଦେଶ ଦେବାକୁ ସର୍ବୋଚ୍ଚ ଅଦାଲତ କହିଛନ୍ତି।