ନୂଆଦିଲ୍ଲୀ,୨।୮: କେନ୍ଦ୍ର ସରକାର ଭେଣ୍ଟିଲେଟର ରପ୍ତାନିକୁ ମଞ୍ଜୁରୀ ପ୍ରଦାନ କରିଛନ୍ତି। ଏହି ବର୍ଗର ରପ୍ତାନି କ୍ଷେତ୍ରରେ ଏହା ବଡ ନିଷ୍ପତ୍ତି ବୋଲି କୁହାଯାଉଛି। କେନ୍ଦ୍ର ସ୍ବାସ୍ଥ୍ୟ ମନ୍ତ୍ରୀ ଡକ୍ଟର ହର୍ଷବର୍ଦ୍ଧନ କହିଛନ୍ତି ଯେ, ଦେଶରେ କରୋନା ମୃତ୍ୟୁହାର ବର୍ତ୍ତମାନ ୨.୫% ରହିଛି। ୩୧ ଜୁଲାଇ ସୁଦ୍ଧା କେବଳ ୦.୨୨% କରୋନା ସଂକ୍ରମିତ ଭେଣ୍ଟିଲେଟରରେ ରହିଥିଲେ। ଅପରପକ୍ଷରେ ଭାରତରେ ଭେଣ୍ଟିଲେଟର ପ୍ରସ୍ତୁତ କରୁଥିବା କମ୍ପାନୀଗୁଡିକ ସଂଖ୍ୟାରେ ବୃଦ୍ଧି ଘଟିଥିବା ଜଣାପଡିଛି। ଜାନୁୟାରୀ ମାସ ତୁଳନାରେ ଦେଶ ମଧ୍ୟରେ ଭେଣ୍ଟିଲେଟର ନିର୍ମାତାଙ୍କ ସଂଖ୍ୟାରେ ୨୦% ବୃଦ୍ଧି ହୋଇଛି। ଭାରତରେ ପ୍ରସ୍ତୁତ ହେଉଥିବା ଭେଣ୍ଟିଲେଟର କରୋନା ବିରୋଧୀ ଲଢେଇରେ ଯୋଗଦାନ ରଖିବ ବୋଲି କେନ୍ଦ୍ର ମନ୍ତ୍ରୀ ପୀୟୂଷ ଗୋୟଲ ଟୁଇଟଯୋଗେ ସୂଚନା ଦେଇଛନ୍ତି। ଏହି କ୍ଷେତ୍ରରେ ଦେଶରେ କମ୍ପାନୀଗୁଡିକ ଅଧିକ ସଂଖ୍ୟାରେ ଲୋକଙ୍କୁ ନିଯୁକ୍ତି ପ୍ରଦାନ କରିବେ ବୋଲି ସେ ଆଶାବାଦୀ ରହିଛନ୍ତି। ପୂର୍ବରୁ କେନ୍ଦ୍ର ସରକାର ଭେଣ୍ଟିଲେଟର ରପ୍ତାନି ଉପରେ ପ୍ରତିବନ୍ଧକ ଲଗାଇଥିଲେ।