ନୂଆଦିଲ୍ଲୀ, ୮।୮: କରୋନା ମହାମାରୀ ସଂକ୍ରମଣ ଯୋଗୁ ଦେଶର ସମସ୍ତ ସ୍କୁଲ କଲେଜ ବନ୍ଦ ରହିଛି। ଏପରିସ୍ଥଳେ କେନ୍ଦ୍ର ସରକାର ସେପ୍ଟେମ୍ବରଠାରୁ ସ୍କୁଲ ଖୋଲିବା ଉପରେ ବିଚାର କରୁଛନ୍ତି। ପର୍ଯ୍ୟାୟକ୍ରମେ ସ୍କୁଲ ଖୋଲିବାର ଯୋଜନା ରହିଛି। ପ୍ରଥମେ ଦଶମରୁ ଦ୍ୱାଦଶ ଶ୍ରେଣୀ ପର୍ଯ୍ୟନ୍ତ ସ୍କୁଲ ଖୋଲିବ। ପ୍ରତି ଶ୍ରେଣୀର ୪ଟି ସେକସନ୍ରୁ ଗୋଟିଏ ଦିନରେ ଦୁଇଟି ସେକସନ୍ରେ ପାଠପଢ଼ା ହେବ। ଯାହାଦ୍ୱାରା ସାମାଜିକ ଦୂରତା ବଜାୟ ରଖିବା ସମ୍ଭବ ହୋଇପାରିବ। ସ୍କୁଲର ସାଧାରଣ ସମୟ ୫ରୁ୬ ଘଣ୍ଟା ପାଠପଢ଼ା ନ ଯାଇ ୨ରୁ୩ ଘଣ୍ଟା ପାଠପଢ଼ା ହେବ। କେବଳ ୩୩ ପ୍ରତିଶତ କର୍ମଚାରୀଙ୍କୁ ନେଇ ସ୍କୁଲ ଖୋଲାଯିବ। ଏହାପରେ ଦ୍ୱିତୀୟ ପର୍ଯ୍ୟାୟରେ ଷଷ୍ଠରୁ ନବମ ଶ୍ରେଣୀ ପିଲା ସ୍କୁଲକୁ ଯିବେ। ତେବେ ପ୍ରାଇମେରୀ ପ୍ରି-ପ୍ରାଇମେରୀ ପିଲାଙ୍କ ଲାଗି ଅନ୍ ଲାଇନ୍ କ୍ଲାସ୍ ଜାରି ରହିବାର ଯୋଜନା କରାଯାଇଛି। ସ୍କୁଲ ଖୋଲିବା ନେଇ ଅଭିଭାବକଙ୍କଠାରୁ ମତାମତ ଲୋଡ଼ାଯାଇଛି। ଏନେଇ କେତେକ ରାଜ୍ୟ ନିଜର ମତାମତ ମଧ୍ୟ କେନ୍ଦ୍ର ସରକାରଙ୍କ ପାଖକୁ ପଠାଇଛନ୍ତି। ସେଥିମଧ୍ୟରେ ହରିୟାଣା,କେରଳ, ବିହାର, ଆସାମ ଏବଂ ଲଦାଖରେ ଅଗଷ୍ଟଠାରୁ ସ୍କୁଲ ଖୋଲାଯିବା ଉପରେ ବିଚାର କରାଯାଉଥିବା ଦର୍ଶାଯାଇଛି। ଅପରପକ୍ଷରେ ରାଜସ୍ଥାନ, କର୍ନାଟକ ଏବଂ ଆନ୍ଧ୍ରପ୍ରଦେଶ ସେପ୍ଟେମ୍ବରକୁ ସ୍କୁଲ ଖୋଲିବାକୁ ମତ ଦେଇଛନ୍ତି।