ନୂଆଦିଲ୍ଲୀ,୪।୧୦: ରାଜ୍ୟ ସଭା ଏମ୍ପି ସଞ୍ଜୟ ସିଂଙ୍କ ବାସଭବନରେ ଇଡି ଚଢାଉକୁ ନେଇ ଆମ ଆଦମୀ ପାର୍ଟି (ଏଏପି) କେନ୍ଦ୍ର ସରକାରଙ୍କୁ ଟାର୍ଗେଟ୍ କରିଛି। ସଞ୍ଜୟ ସିଂଙ୍କ ସ୍ବରକୁ ଦମନ କରିବାକୁ କେନ୍ଦ୍ର ସରକାର ସମସ୍ତ ପ୍ରକାର ଉଦ୍ୟମ କରୁଛନ୍ତି ବୋଲି ଅରବିନ୍ଦ କେଜ୍ରିୱାଲ ସରକାରର ମନ୍ତ୍ରୀ ସୌରଭ ଭରଦ୍ୱାଜ କହିଛନ୍ତି।
ସୌରଭ ଭରଦ୍ବାଜ ଆହୁରି କହିଛନ୍ତି ଯେ, ଶହ ଶହ କୋଟି ଟଙ୍କାର ଏକ ମଦ ଦୁର୍ନୀତି ଅଭିଯୋଗ ହୋଇଛି। ଇତିହାସରେ ଏହା ହେଉଛି ପ୍ରଥମ ସ୍କାମ, ଯାହା ଗତ ୧୫ ମାସ ଧରି ଅନୁସନ୍ଧାନ କରାଯାଉଛି ଏବଂ କିଛି ମିଳିନାହିଁ। ମଦ ଦୁର୍ନୀତିର ଉଭୟ ଇଡି ଏବଂ ସିବିଆଇ ଏଜେନ୍ସି ଅନୁସନ୍ଧାନ କରୁଛନ୍ତି। ଏକ ହଜାରରୁ ଅଧିକ ଲୋକଙ୍କ ଘରେ ଚଢାଉ କରାଯାଇଛି, କିନ୍ତୁ ଏପର୍ଯ୍ୟନ୍ତ ଗୋଟିଏ ଟଙ୍କା ମଧ୍ୟ ବେଆଇନ ଭାବେ ଚୋରି ହୋଇନାହିଁ। ଇଡି ଏପର୍ଯ୍ୟନ୍ତ କିଛି ପାଇନାହିଁ। ଏହି ଘୋଟାଲାରେ କିଛି ଜବତ କରାଯାଇ ନାହିଁ।
ଏହି କ୍ରମରେ ବର୍ତ୍ତମାନ ସଞ୍ଜୟ ସିଂଙ୍କ ଘରେ ଚଢାଉ କରାଯାଇଛି। ଗୋଟିଏ ଟଙ୍କା ମଧ୍ୟ ହଡପ କରାଯାଇ ନାହିଁ। ସର୍ଚ୍ଚ ପରେ ଇଡି ବାହାରକୁ ଆସିବା ପରେ ସେମାନେ କହିବେ ଯେ ସେମାନେ କିଛି ଜିନିଷ ପାଇନାହାନ୍ତି। ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଜାଣନ୍ତି ଯେ ବର୍ତ୍ତମାନ କ୍ଷମତା ଛାଡିବାର ସମୟ ଆସିଛି। ଭୟରେ ସେମାନେ ଏସବୁ କରୁଛନ୍ତି ବୋଲି ସୌରଭ କହିଛନ୍ତି।