ନୂଆଦିଲ୍ଲୀ,୧୬।୧ : ପୁରୁଣା ଯାନବାହାନକୁ ଅଦରକାରୀ କରିବା ଲାଗି ପୁଞ୍ଜି ବିନିଯୋଗ ଯୋଜନା ପାଇଁ ସ୍ବତନ୍ତ୍ର ସହାୟତା ଅନ୍ତର୍ଗତରେ କେନ୍ଦ୍ର ସରକାର ୨ ହଜାର କୋଟି ଟଙ୍କା ପ୍ରୋତ୍ସାହନ ଦେବେ। ଏହା ବ୍ୟତୀତ ସ୍କ୍ରାପ ପାଇଁ ଯାନ ପ୍ରଦାନ କରୁଥିବା ଲୋକଙ୍କୁ ଟିକସ ରିହାତି ମଧ୍ୟ ଦିଆଯିବ ।
ସରକାର ୨୦୨୨-୨୩ ବଜେଟରେ ୧.୦୫ ଲକ୍ଷ କୋଟି ଟଙ୍କା ବ୍ୟୟ ସହିତ ପୁଞ୍ଜି ବିନିଯୋଗ ପାଇଁ ରାଜ୍ୟଗୁଡିକୁ ସ୍ବତନ୍ତ୍ର ସହାୟତା ଯୋଜନାର ପ୍ରଣୟନ କରିଥିଲେ। ଏହି ଯୋଜନା ଅଧୀନରେ ପୁଞ୍ଜି ପ୍ରକଳ୍ପଗୁଡିକ ପାଇଁ ୫୦ ବର୍ଷ ପାଇଁ ସୁଧମୁକ୍ତ ଋଣ ଆକାରରେ ରାଜ୍ୟ ସରକାରଙ୍କୁ ଆର୍ଥିକ ସହାୟତା ଦିଆଯାଉଛି। ବର୍ତ୍ତମାନ, ଏହି ଯୋଜନା ଅଧୀନରେ କେନ୍ଦ୍ର ଅତିରିକ୍ତ ୨ ହଜାର କୋଟି ଟଙ୍କାର ପ୍ରୋତ୍ସାହନ ଧାର୍ଯ୍ୟ କରିଛନ୍ତି ଯାହାକି ୧୫ ବର୍ଷରୁ ଅଧିକ ପୁରୁଣା ସରକାରୀ ଗାଡି କିମ୍ବା ଯାନଗୁଡ଼ିକୁ ସ୍କ୍ରାପ କରିବା ଦ୍ୱାରା ରାଜ୍ୟମାନଙ୍କୁ ପ୍ରଦାନ କରାଯିବ।
ଅର୍ଥ ମନ୍ତ୍ରଣାଳୟ ଗତ ମାସରେ ରାଜ୍ୟମାନଙ୍କୁ ଲେଖିଥିବା ଏକ ପତ୍ରରେ କହିଛି ଯେ ଏହି ଯୋଜନା ଅନ୍ତର୍ଗତ ସଂସ୍କାରରେ ସଡକ ପରିବହନ ଏକ ନୂତନ କ୍ଷେତ୍ର ଭାବରେ ଯୋଡି ହୋଇଛି। ଏପର୍ଯ୍ୟନ୍ତ ସରକାର ଏହି ଯୋଜନା ଅଧୀନରେ ୭୭,୧୧୦ କୋଟି ଟଙ୍କା ମଞ୍ଜୁରୀ ଦେଇଛନ୍ତି। ଯେଉଁଥିରୁ ୪୧,୧୧୮ କୋଟି ଟଙ୍କା ରାଜ୍ୟକୁ ପ୍ରଦାନ କରାଯାଇଛି।