ନୂଆଦିଲ୍ଲୀ,୧୭।୧୧: ଦିଲ୍ଲୀ ଏନସିଆର ପ୍ରଦୂଷଣକୁ ନେଇ ସୁପ୍ରିମକୋର୍ଟରେ ଶୁଣାଣି ଜାରି ରହିଛି। କେନ୍ଦ୍ର ସରକାର ସୁପ୍ରିମକୋର୍ଟରେ ଏକ ସତ୍ୟପାଠ ଦାଖଲ କରିଛନ୍ତି ଯେ ସର୍ବୋଚ୍ଚ ଅଦାଲତଙ୍କ ପରାମର୍ଶ ଅନୁଯାୟୀ ଘରେ ରହି କାମ କରିବା ପରିବର୍ତ୍ତେ ଯାନବାହନ ପ୍ରଦୂଷଣକୁ ହ୍ରାସ କରିବା ପାଇଁ ସରକାର ସରକାରୀ କର୍ମଚାରୀଙ୍କ ପାଇଁ ଗାଡି ପୁଲିଂ ବ୍ୟବସ୍ଥା ଲାଗୁ କରିବା ଆବଶ୍ୟକ। ଓ୍ବାର୍କ ଫ୍ରମ୍ ହୋମ୍ ସମ୍ଭବ ନୁହେଁ ବୋଲି ସତ୍ୟପାଠରେ ଉଲ୍ଲେଖ କରାଯାଇଛି। ଅପରପକ୍ଷରେ ହରିୟାଣା ସରକାର ସୁପ୍ରିମକୋର୍ଟଙ୍କୁ ସୂଚନା ଦେଇଛନ୍ତି ଯେ ଅନ୍ୟାନ୍ୟ ପଦକ୍ଷେପ ସହିତ ସମଗ୍ର ରାଜ୍ୟରେ ନଡ଼ାମୂଳ ଜଳିବା ଉପରେ ପ୍ରତିବନ୍ଧକ ଲଗାଯିବ। ଏଥିସହିତ ପଞ୍ଜାବ ସରକାର କହିଛନ୍ତି ଯେ ନଡ଼ାମୂଳ ପୋଡିଥିବା ଚାଷୀଙ୍କ ଉପରେ ୧୫,୦୦୦ ଟଙ୍କା ପର୍ଯ୍ୟନ୍ତ ଜରିମାନା ଲାଗୁ କରାଯାଇଛି।
ସୁପ୍ରିମକୋର୍ଟରେ ଦାଖଲ ହୋଇଥିବା ସତ୍ୟପାଠରେ ପଞ୍ଜାବ ସରକାରଙ୍କ ତରଫରୁ କୁହାଯାଇଛି ଯେ ରାଜ୍ୟରେ ୨୯.୬୧ ଲକ୍ଷ ହେକ୍ଟରରେ ଧାନ ଚାଷ କରାଯାଉଛି। ୨୦୨୧ରେ ୧୮.୭୪ ଲକ୍ଷ କ୍ୱିଣ୍ଟାଲ ନଡ଼ାମୂଳ ବାହାରିଥିଲା। ସରକାର କହିଛନ୍ତି ଯେ ନଡ଼ାମୂଳ ପୋଡିଥିବା ଚାଷୀଙ୍କ ଉପରେ ଅଢ଼େଇ ହଜାରରୁ ୧୫ ହଜାର ଟଙ୍କା ପର୍ଯ୍ୟନ୍ତ ଜରିମାନା ଲାଗୁ କରାଯାଇଛି। ଏହା ଉପରେ ପଞ୍ଜାବ ପ୍ରଦୂଷଣ ନିୟନ୍ତ୍ରଣ ବୋର୍ଡର ସଦସ୍ୟ କ୍ରୁନେଶ ଗର୍ଗ କହିଛନ୍ତି ଯେ କେବଳ ଅକ୍ଟୋବର ଏବଂ ନଭେମ୍ବରରେ ନଡ଼ାମୂଳ ପୋଡ଼ା ଯାଇଛି। ତେବେ ଡିସେମ୍ବର ଏବଂ ଜାନୁଆରୀରେ ଦିଲ୍ଲୀର ଏକ୍ୟୁଆଇ ସ୍ତର ମଧ୍ୟ ଉଚ୍ଚରେ ରହିଛି, ଏହାର କାରଣ କ’ଣ?
ସୁପ୍ରିମକୋର୍ଟରେ ଦାଖଲ ହୋଇଥିବା ୩୯୨ ପୃଷ୍ଠାର ସତ୍ୟପାଠରେ କେନ୍ଦ୍ର ସରକାର କହିଛନ୍ତି ଯେ କର୍ମଚାରୀଙ୍କୁ ଘରେ ରହି କାମ କରିବା ସପକ୍ଷରେ ସରକାର ନାହାନ୍ତି। କେନ୍ଦ୍ର ଦ୍ୱାରା ଯୁକ୍ତି କରାଯାଇଥିଲା ଯେ କୋଭିଡ ଯୋଗୁଁ କାମ ପୂର୍ବରୁ ପ୍ରଭାବିତ ହୋଇସାରିଛି, ତେଣୁ ଏବେ ଓ୍ବାର୍କ ଫ୍ରମ୍ ହୋମ୍ ସମ୍ଭବ ନୁହେଁ।
ପ୍ରଦୂଷଣ ଯୋଗୁ ନିର୍ମାଣ କାର୍ଯ୍ୟ ମଧ୍ୟ ବନ୍ଦ ହୋଇଯାଇଛି। ଏହି ପ୍ରସଙ୍ଗରେ ଶ୍ରମିକମାନେ ସୁପ୍ରିମକୋର୍ଟରେ ମଧ୍ୟ ପହଞ୍ଚିଛନ୍ତି। ସେମାନେ ଯୁକ୍ତି କରିଛନ୍ତି ଯେ କରୋନା କାରଣରୁ ସେମାନଙ୍କର ଆର୍ଥିକ ଅବସ୍ଥା ପ୍ରଭାବିତ ହୋଇସାରିଛି। ଏପରି ପରିସ୍ଥିତିରେ, ଏଭଳିି ନିଷ୍ପତ୍ତି ସେମାନଙ୍କ ଉପରେ ସିଧାସଳଖ ପ୍ରଭାବ ପକାଇବ। ଶ୍ରମିକମାନଙ୍କ ପ୍ରଶ୍ନର ଉତ୍ତରରେ ସୁପ୍ରିମକୋର୍ଟଙ୍କ ପକ୍ଷରୁ କୁହାଯାଇଥିଲା ଯେ ନିର୍ମାଣକୁ ପ୍ରଦୂଷଣ ପାଇଁ ଦାୟୀ ବୋଲି ଗ୍ରହଣ ନ କରାଯାଉ।