ନୂଆଦିଲ୍ଲୀ, ୨୮।୯ : ଆତଙ୍କବାଦୀଙ୍କୁ ପାଣ୍ଠି ଯୋଗାଣ ତଥା ଅନ୍ୟାନ୍ୟ କାର୍ଯ୍ୟକଳାପ ଲାଗି ମୌଳବାଦୀ ଇସଲାମିକ ସଂଗଠନ ପପୁଲାର୍ ଫ୍ରଣ୍ଟ ଅଫ ଇଣ୍ଡିଆ (ପିଏଫଆଇ)କୁ ପାଞ୍ଚ ବର୍ଷ ଧରି ଭାରତରେ ନିଷିଦ୍ଧ ଘୋଷଣା କରାଯାଇଛି। ଏନେଇ ସ୍ବରାଷ୍ଟ୍ର ମନ୍ତ୍ରଣାଳୟ ପକ୍ଷରୁ ବିଜ୍ଞପ୍ତି ମଧ୍ୟ ଜାରି କରାଯାଇଛି। ୟୁଏପିଏ ଅଧିନିୟମ ଅନୁଯାୟୀ ଏହି ସଂଗଠନ ଉପରେ ପ୍ରତିବନ୍ଧକ ଲଗାଯାଇଛି।
୨୦୧୭ ରେ, ଏନଆଇଏ ସ୍ବରାଷ୍ଟ୍ର ମନ୍ତ୍ରଣାଳୟକୁ ଏକ ଚିଠି ଲେଖି ଏହି ସଂସ୍ଥା ଉପରେ ପ୍ରତିବନ୍ଧକ ଲଗାଇବାକୁ ଦାବି କରିଥିଲା। ଏହି ସଂଗଠନ ହିଂସା ତଥା ଆତଙ୍କବାଦୀ କାର୍ଯ୍ୟକଳାପରେ ସମ୍ପୃକ୍ତ ଥିବା ନେଇ ଏନଆଇଏ ଅନୁସନ୍ଧାନ ସାମ୍ନାକୁ ଆସିଛି। ଏନଆଇଏ ଡୋସିୟର ଅନୁଯାୟୀ ଏହି ସଂଗଠନ ଜାତୀୟ ସୁରକ୍ଷା ପ୍ରତି ବିପଦ ବୋଲି ବିବେଚନା କରାଯାଉଛି।
ପିଏଫ୍ଆଇ ସମେତ ୯ ସଂଗଠନକୁ ନିଷିଧ ଘୋଷଣା କରାଯାଇଛି। ଅନ୍ୟ ସଂଗଠନଗୁଡ଼ିକ ମଧ୍ୟରେ ରେହବ ଇଣ୍ଡିଆ ଫାଉଣ୍ଡେସନ, କ୍ୟାମ୍ପସ ଫ୍ରଣ୍ଟ ଅଫ ଇଣ୍ଡିଆ, ଅଲ ଇଣ୍ଡିଆ ଇମାମ କାଉନସିଲ,
ନ୍ୟାଶନାଲ କନଫେଡେରେସନ ଅଫ ହ୍ୟୁମାନ ରାଇଟସ୍ ଅର୍ଗାନାଇଜେଶନ, ନ୍ୟାଶନାଲ ଓ୍ବମେନ ଫ୍ରଣ୍ଟ, ଏମ୍ପାପାଓ୍ବାର ଇଣ୍ଡିଆ ଫାଉଣ୍ଡେସନ, ରେହବ ଫାଉଣ୍ଡେସନ (କେରଳ), ଜୁନିଅର ଫ୍ରଣ୍ଟ ଆଦି ରହିଛନ୍ତି।