ନୂଆଦିଲ୍ଲୀ,୧ ।୧୧: କେନ୍ଦ୍ର ସରକାର ସୋମବାର ପୁଣିଥରେ ଆଫଗାନିସ୍ତାନ, ବାଂଲାଦେଶ ଓ ପାକିସ୍ତାନରୁ ଆସିବାକୁ ଥିବା ଓ ଏବେ ଗୁଜରାଟର ଦୁଇଟି ଜିଲାରେ ରହୁଥିବା ହିନ୍ଦୁ, ଶିଖ, ବୈଦ୍ଧ, ଜୈନ, ପାର୍ସି, ଇସାଇଙ୍କୁ ଭାରତୀୟ ନାଗରିକତା ଦେବାକୁ ନିଷ୍ପତ୍ତି ନେଇଛନ୍ତି । ଏହି ନାଗରିକତା ସେମାନଙ୍କୁ ନାଗରିକତା ଆଇନ ୧୯୫୫ ଆଧାରରେ ଦିଆଯିବ । ବିବାଦସ୍ପଦ ନାଗରିକତା ସଂଶୋଧନ ଅଧିନିୟମ, ୨୦୧୯(ସିଏଏ) ବଦଳରେ ନାଗରିକତା ଅଧିନିୟମ, ୧୯୯୫ ଆଧାରରେ ନାଗରିକତା ଦେବା ଏକ ମହତ୍ୱପୂର୍ଣ୍ଣ ପଦକ୍ଷେପ ।
ବିବାଦରେ ରହିଥିବା ନାଗରିକତା ସଂଶୋଧନ ଅଧିନିୟମ, ୨୦୧୯(ସିଏଏ)ରେ ଆଫଗାନିସ୍ତାନ, ବାଂଲାଦେଶ ଓ ପାକିସ୍ତାନରୁ ଆସିଥିବା ହିନ୍ଦୁ, ଶିଖ, ବୈଦ୍ଧ, ଜୈନ, ପାର୍ସି, ଇସାଇଙ୍କୁ ଭାରତୀୟ ନାଗରିକତା ଦେବାର ପ୍ରାବଧାନ ରହିଛି । ଏହି ଅଧିନିୟମ ଅନୁଯାୟୀ, ନିୟମ ଏବେ ପର୍ଯ୍ୟନ୍ତ ସରକାରଙ୍କ ଦ୍ୱାରା ପ୍ରସ୍ତୁତ କରାଯାଇ ନାହିଁ, ତେଣୁ ଏହି ଆଧାରରେ କାହାକୁ ନାଗରିକତା ଦିଆଯାଇ ପାରିବ ନାହିଁ ।
କେନ୍ଦ୍ର ସ୍ୱରାଷ୍ଟ୍ର ମନ୍ତ୍ରଣାଳୟ ଦ୍ୱାରା ସୋମବାର ଜାରି କରାଯାଇଥିବା ଏକ ଅଧିସୂଚନା ମାଧ୍ୟମରେ ଏହି ସୂଚନା ମିଳିଛି । ଏହି ଅଧିସୂଚନା ଅନୁଯାୟୀ, ଗୁଜରାଟର ଆଣନ୍ଦ ଓ ମେହସଣା ଜିଲାରେ ରହୁଥିବା ହିନ୍ଦୁ, ଶିଖ, ବୈଦ୍ଧ, ଜୈନ, ପାର୍ସି, ଇସାଇଙ୍କୁ ନାଗରିକତା ଅଧିନିୟମ, ୧୯୯୫ର ଧାରା ୫, ଧାରା ୬ ଆଧାରରେ ନାଗରିକତା ଦିଆଯିବ । ଏମାନଙ୍କୁ ନାଗରିକତା ନିୟମ ୨୦୦୯ର ପ୍ରାବଧାନ ଅନୁସାରେ ଭାରତର ନାଗରିକ ଭାବେ ପଞ୍ଜିକରଣର ଅନୁମତି ମିଳିବ ଓ ଦେଶର ନାଗରିକର ପ୍ରମାଣ ପତ୍ର ଦିଆଯିବ ।