ବ୍ରହ୍ମପୁର ଅଫିସ,୮ା୭- କୋଭିଡ୍-୧୯ର ମୁକାବିଲା ନେଇ ୟୁଭିସି ସୋଲ ସାନିଟାଇଜର, ୟୁଭିସି ସାନିଟାଇଜର ନିର୍ମାଣ ପାଇଁ ବ୍ରହ୍ମପୁର ଆଇଟିଆଇକୁ ଭାରତ ସରକାରଙ୍କ ଦକ୍ଷତା ବିକାଶ ବିଭାଗ ମନ୍ତ୍ରୀ ମହେନ୍ଦ୍ର ନାଥ ପାଣ୍ଡେ ପ୍ରଶଂସାପତ୍ର ଦେଇଛନ୍ତି। ମହାମାରୀ ସମୟରେ କରୋନା ଯୋଦ୍ଧାଙ୍କ ସୁରକ୍ଷା ପାଇଁ ଅତି ସ୍ବଳ୍ପ ମୂଲ୍ୟରେ ଆଇଟିଆଇ ଉପରୋକ୍ତ ଦୁଇ ଉପକରଣ ପ୍ରସ୍ତୁତ କରିଥିବାରୁ ସେ ଅନୁଷ୍ଠାନର ସମ୍ପୂର୍ଣ୍ଣ ଟିମ୍କୁ ଶୁଭେଚ୍ଛା ଜଣାଇଛନ୍ତି। ବ୍ରହ୍ମପୁର ଆଇଟିଆଇର ଏହି ପ୍ରଣାଳୀ ସାରା ଦେଶରେ ହଜାର ହଜାର ଉଦ୍ୟୋକ୍ତା ସୃଷ୍ଟି କରିପାରିବ। ଏହାର ପ୍ରଣାଳୀ ଭାରତ ସରକାରଙ୍କ ଆମତ୍ନିର୍ଭର ଭାରତ ଅଭିଯାନକୁ ନିଶ୍ଚୟ ସଫଳ ରୂପାୟନ ଦେବ ବୋଲି ମନ୍ତ୍ରୀ ଟୁଇଟରରେ ଦର୍ଶାଇଛନ୍ତି। ସେହିପରି ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ମଧ୍ୟ ମନ୍କୀ ବାତ ଟୁଇଟ୍ ଜରିଆରେ ବ୍ରହ୍ମପୁର ଆଇଟିଆଇକୁ ପ୍ରଶଂସା କରିଛନ୍ତି। ସୂଚନାଯୋଗ୍ୟ, କୋଭିଡ୍-୧୯ ମହାମାରୀ ମୁକାବିଲା ପାଇଁ ବ୍ରହ୍ମପୁର ଆଇଟିଆଇ ପକ୍ଷରୁ ସାନିଟାଇଜର, ମାସ୍କ, ଫେସ୍ ସିଲ, ଏରୋସଲ ବକ୍ସ, ପ୍ରଟେକ୍ଟ ଗାର୍ଡ, ପେଡେଲ ଓ ଅଟୋମେଟିକ ହ୍ୟାଣ୍ଡ ସାନିଟାଇଜର, କେଭିଡ୍ ସାମ୍ପୁଲ କଲେକ୍ସନ କିଓସ୍କୋ, ୟୁଭିସି ସୋଲ ସାନିଟାଇଜର, ୟୁଭିସି ସାନିଟାଇଜର ପ୍ରସ୍ତୁତ କରିବା ସହ ବିଭିନ୍ନ ମେଡିକାଲ, ପୋଲିସ, ସ୍ବେଚ୍ଛାସେବୀ ପ୍ରମୁଖ କୋରୋନା ଯୋଦ୍ଧାଙ୍କୁ ପ୍ରଦାନ କରିଥିଲା।