ବନ୍ତ,୨୦।୫ (ଡି.ଏନ.ଏ.)- କୋଭିଡ୍ ଟିକା ନ ନେଇ ବି ଦମ୍ପତି ପାଇଛନ୍ତି ପ୍ରମାଣପତ୍ର। ଏଭଳି ଘଟଣା ଦେଖିବାକୁ ମିଳିଛି ଭଦ୍ରକ ଜିଲା ବନ୍ତ ଗ୍ରାମରେ। ପ୍ରମାଣପତ୍ର ପାଇଥିବା ଦମ୍ପତି ହେଲେ ଗ୍ରାମର ଭରତ ପାଣି(୬୪) ଓ ତାଙ୍କ ସ୍ତ୍ରୀ ରମାମଣି ପାଣି(୬୨)। ସେମାନଙ୍କ କହିବା ଅନୁଯାୟୀ, ଗତ ମାର୍ଚ୍ଚ ୧୩ରେ ସେମାନେ ବନ୍ତ ପ୍ରାଥମିକ ସ୍ବାସ୍ଥ୍ୟକେନ୍ଦ୍ରରେ ପ୍ରଥମ ଡୋଜ୍ ଟିକା ନେଇଥିଲେ। ସେତେବେଳେ ଅନ୍ଲାଇନ ବୁକିଂ କରା ନ ଯାଇ ମାନୁଆଲି ଟିକା ଦିଆଯାଉଥିଲା। ଯେଉଁମାନେ ପ୍ରଥମ ଡୋଜ୍ ନେଉଥିଲେ ସେମାନଙ୍କୁ ୪୨ଦିନ ପରେ ୨ୟ ଡୋଜ୍ ନେବାକୁ ନିୟମ ରହିଥିଲା। ଏଣୁ ଦମ୍ପତି ଗତ ଏପ୍ରିଲ ୨୬ରେ ୨ୟ ଡୋଜ୍ ନେବା ପାଇଁ ବନ୍ତ ପ୍ରାଥମିକ ସ୍ବାସ୍ଥ୍ୟକେନ୍ଦ୍ରରେ ପହଞ୍ଚିଥିଲେ। ସେଠାକାର କର୍ମଚାରୀ ସେମାନଙ୍କୁ ଅନ୍ଲାଇନ ବୁକ୍ କରିବା ପାଇଁ ପରାମର୍ଶ ଦେଇଥିଲେ। ସେହିଦିନ ସେମାନେ ଅନ୍ଲାଇନ କରିବା ପରେ ଏପ୍ରିଲ ୨୭ରେ ୨ୟ ଡୋଜ୍ ନେବାକୁ ସ୍ଲଟ୍ ବୁକିଂ ହୋଇଥିଲା। ୨୭ରେ ସେମାନେ ବନ୍ତ ପ୍ରାଥମିକ ସ୍ବାସ୍ଥ୍ୟକେନ୍ଦ୍ରକୁ ଯାଇଥିବା ବେଳେ ଟିକା ଉପଲବ୍ଧ ନ ଥିଲା। ମେ’ ୧୮ରେ ସେମାନେ କୋୱିନ ୱେବସାଇଟରେ ସର୍ଚ୍ଚ କରିବାରୁ ଆଗରପଡ଼ା ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରରେ ସେମାନେ ଟିକା ନେଇସାରିଥିବା ଦେଖିବାକୁ ପାଇଥିଲେ। ଏଥିସହ ସେମାନଙ୍କ ନାମରେ ୨ୟ ଡୋଜ୍ ଟିକା ନେଇଥିବାର ପ୍ରମାଣପତ୍ର ଅନ୍ଲାଇନରେ ଅପଲୋଡ୍ ହୋଇଥିବା ଦେଖି ଆଶ୍ଚର୍ଯ୍ୟ ହୋଇଯାଇଥିଲେ। ଏବେ କିପରି ୨ୟ ଡୋଜ୍ ଟିକା ନେଇପାରିବେ ସେନେଇ ଚିନ୍ତା ପ୍ରକଟ କରିଛନ୍ତି। ଏ ସମ୍ପର୍କରେ ଆଗରପଡ଼ା ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରର ଭାରପ୍ରାପ୍ତ ଅଧିକାରୀ ଡାକ୍ତର ବିଳାସିନୀ ବେହେରାଙ୍କୁ ପଚାରିବାରୁ କହିଛନ୍ତି, କୌଣସି ବୈଷୟିକ ସମସ୍ୟା ଥାଇପାରେ। ପ୍ରଥମ ଡୋଜ୍ ନେବାର ୮୪ ଦିନ ପରେ ସେମାନେ ୨ୟ ଡୋଜ୍ ନେବା ପାଇଁ ଟିକାକରଣ କେନ୍ଦ୍ରକୁ ଆସିଲେ ପଦକ୍ଷେପ ନିଆଯିବ।