ମୁମ୍ବାଇ,୧୯।୧୦ : କର୍କଟ ଚିକିତ୍ସା ଦେଶର ସବୁ ସ୍ଥାନରେ ସମାନ ନୁହେଁ। ଇଣ୍ଡିଆନ କାଉନସିଲ ଅଫ ମେଡିକାଲ ରିସର୍ଚ୍ଚ (ଆଇସିଏମଆର) ଦ୍ୱାରା ହୋଇଥିବା ଏକ ଅଧ୍ୟୟନ ରିପୋର୍ଟରେ ଏହା ପ୍ରକାଶ ପାଇଛି, ଗର୍ଭାଶୟ କର୍କଟ ରୋଗୀମାନେ ଗ୍ରାମାଞ୍ଚଳ ଅପେକ୍ଷା ସହରରେ ଅଧିକ ଦିନ ଜୀବିତ ରହୁଛନ୍ତି। ଏହାର ମୁଖ୍ୟ କାରଣ ହେଉଛି ଗ୍ରାମ, ଦୁର୍ଗମ ସ୍ଥାନ କିମ୍ବା ପାହାଡ଼ିଆ ରାଜ୍ୟ ଅପେକ୍ଷା ସହରରେ କର୍କଟ ଚିକିତ୍ସା ପାଇଁ ଅଧିକ ସୁବିଧା ସୁଯୋଗ ରହିଛି।
ଦ ଲାନସେଟ ସାଉଥ ଇଷ୍ଟ ମେଡିକାଲ ଜର୍ନାଲରେ ପ୍ରକାଶିତ ଏହି ଅଧ୍ୟୟନ ଆଇସିଏମଆର ଅଧୀନରେ ଥିବା ବେଙ୍ଗାଲୁରୁର ନ୍ୟାଶନାଲ ସେଣ୍ଟର ଫର ରୋଗ ଇନଫରମେଟିକ୍ସ ଆଣ୍ଡ ରିସର୍ଚ୍ଚ (ଏନସିଡିଆଇଆର) ଦ୍ୱାରା ଦେଶର ୩୮ ଟି କର୍କଟ ରେଜିଷ୍ଟ୍ରି ମଧ୍ୟରୁ ୧୧ ଟି ସହ ଯୋଗାଯୋଗ କରାଯାଇଥିଲା। ୨୦୧୨ରୁ ୨୦୧୫ ମଧ୍ୟରେ ସମୁଦାୟ ୫,୫୯୧ ରୋଗୀଙ୍କୁ ଅଧ୍ୟୟନରେ ସାମିଲ କରାଯାଇଥିଲା ଯେଉଁମାନେ କେରଳ, ମହାରାଷ୍ଟ୍ର, ମଣିପୁର, ଆସାମ, ମିଜୋରାମ, ଗୁଜରାଟ ଏବଂ କର୍ନାଟକର ଡାକ୍ତରଖାନାରେ କର୍କଟ ରୋଗରେ ପୀଡିତ ଥିବା ଲୋକ ଥିଲେ।
ଏନସିଡିଆଇଆର ବରିଷ୍ଠ ଗବେଷକ ପ୍ରଫେସର କୃଷ୍ଣନ ସତୀଶ କୁମାର କହିଛନ୍ତି ଗର୍ଭାଶୟ କର୍କଟରେ ପୀଡିତ ରୋଗୀମାନେ କେତେ ବର୍ଷ ବଞ୍ଚନ୍ତି? ଏହି ବିଷୟରେ ସୂଚନା ପାଇବା ପାଇଁ ଏହି ଅଧ୍ୟୟନ କରାଯାଇଥିଲା ।
ସେ କହିଛନ୍ତି ଯେ ଏହି ଅଧ୍ୟୟନର ଫଳାଫଳ ନୀତି ସ୍ବାସ୍ଥ୍ୟ ବ୍ୟବସ୍ଥାରେ ଥିବା ପାର୍ଥକ୍ୟକୁ ଚିହ୍ନଟ କରିବାରେ ସାହାଯ୍ୟ କରିବ। ଏଥି ସହିତ, ଆମେ ସଚେତନତା, ପ୍ରାଥମିକ କର୍କଟ ଚିହ୍ନଟ ଏବଂ ସ୍ବାସ୍ଥ୍ୟ ସେବା ବ୍ୟବସ୍ଥାରେ ଉନ୍ନତି ଆଣିବା ଉପରେ ଗୁରୁତ୍ୱ ଦେଇପାରିବା ।
ଅଧ୍ୟୟନ ଅନୁଯାୟୀ, ଭାରତରେ ୫୧.୭ ପ୍ରତିଶତ ରୋଗୀ ଗର୍ଭାଶୟ କର୍କଟ ରୋଗରେ ଆକ୍ରାନ୍ତ ହେବାର ପାଞ୍ଚ ବର୍ଷ ପରେ ମଧ୍ୟ ବଞ୍ଚୁଛନ୍ତି। ମାତ୍ର ଦେଶର ବିଭିନ୍ନ ଅଞ୍ଚଳରେ ଏହା ସଂଖ୍ୟା ଭିନ୍ନ ଭିନ୍ନ ରହିଛି।
ଏହାର କାରଣ ହେଉଛି ଗୁଜରାଟରେ ଗର୍ଭାଶୟ କର୍କଟ ରୋଗୀମାନେ ଅଧିକ ଦିନ ଜୀବନ ବଞ୍ଚିବାକୁ ସକ୍ଷମ ହୋଇଥିବାବେଳେ ତ୍ରିପୁରା ଏବଂ ଉତ୍ତର-ପୂର୍ବ ରାଜ୍ୟରେ ଏଭଳି ଲୋକଙ୍କ ସଂଖ୍ୟା ବହୁତ କମ ରହିଛି। ଦେଶର ସର୍ବୋଚ୍ଚ ୬୧.୫ ପ୍ରତିଶତ ରୋଗୀ ଅହମଦାବାଦରେ ପାଞ୍ଚ ବର୍ଷ ବଞ୍ଚିବାରେ ସକ୍ଷମ ହୋଇଥିବାବେଳେ ସର୍ବନିମ୍ନ ୩୧.୬ ପ୍ରତିଶତ ତ୍ରିପୁରାରେ ରହିଛନ୍ତି। ସେହିପରି ଥିରୁଭାନନ୍ତପୁରମରେ ୫୮.୮, କୋଲାମରେ ୫୬.୧, ମୁମ୍ବାଇରେ ୫୩.୯, ମଣିପୁରରେ ୪୩.୬, ପାଶିଘାଟରେ ୩୯ ପ୍ରତିଶତ ରୋଗୀ ଅଛନ୍ତି।
ଗର୍ଭାଶୟ କର୍କଟ ରୋଗର ମୁଖ୍ୟ କାରଣ ହେଉଛି ମାନବ ପାପିଲୋମା ଭାଇରସ (ଏଚପିଭି)ର ପ୍ରାଦୁର୍ଭାବ। ଭାରତର ପ୍ରତି ପାଞ୍ଚ ରୋଗୀଙ୍କ ମଧ୍ୟରୁ ଚାରିଜଣ ଏହି ଭାଇରସରେ ଆକ୍ରାନ୍ତ। ଉଭୟ ରୋଗୀ ଏବଂ ମୃତ୍ୟୁ ସଂଖ୍ୟା ଦୃଷ୍ଟିରୁ ଗର୍ଭାଶୟ କର୍କଟ ରୋଗୀଙକ ସଂଖ୍ୟାରେ ଭାରତ ବିଶ୍ୱରେ ଯଥାକ୍ରମେ ଚତୁର୍ଥ ଏବଂ ଦ୍ୱିତୀୟ ସ୍ଥାନରେ ରହିଛି। ଏହା ଭାରତରେ ଦ୍ୱିତୀୟ ପ୍ରକାର କର୍କଟ ଯାହା ମହିଳାଙ୍କଠାରେ ଦେଖାଯାଇଥାଏ। ଏହା ମହିଳାଙ୍କଠାରେ ଦେଖା ଦେଉଥିବା ସମସ୍ତ କର୍କଟ ରୋଗର ୧୦ ପ୍ରତିଶତ।