ମୁମ୍ବାଇ,୧୯।୪: ସୋମବାର ଇଣ୍ଡିଆନ ପ୍ରିମିୟର ଲିଗ (ଆଇପିଏଲ)ର ୧୫ତମ ସିଜିନର ଏକ ମ୍ୟାଚ୍ରେ ରାଜସ୍ଥାନ ରୟାଲ୍ସ (ଆରଆର) ୭ ରନ୍ରେ କୋଲକାତା ନାଇଟ ରାଇଡର୍ସ (କେକେଆର୍)କୁ ପରାସ୍ତ କରିଛି। ମୁମ୍ବାଇର ବ୍ରାବୋର୍ନ ଷ୍ଟାଡିୟମରେ ଖେଳାଯାଇଥିବା ଏହି ମ୍ୟାଚ୍ରେ ରାଜସ୍ଥାନର ଜୋସ ବଟଲର୍ ଶତକ ଏବଂ ପରେ ଲେଗ ସ୍ପିନର ୟୁଜଭେନ୍ଦ୍ର ଚହଲ ହ୍ୟାଟ୍ରିକ ନେଇ ଦଳକୁ ବିଜୟ ପ୍ରଦାନ କରିଥିଲେ। ଆଇପିଏଲ ଇତିହାସରେ ଏହା ପ୍ରଥମ ଥର ପାଇଁ ଏକ ମ୍ୟାଚରେ ଏକ ଶତକ ସ୍କୋର କରାଯାଇଛି ଏବଂ ହ୍ୟାଟ୍ରିକ ମଧ୍ୟ ନିଆଯାଇଛି। ଏହାସହ ଆଇପିଏଲ୍ର ଜନ୍ମଦିନରେ ଚହଲ ହ୍ୟାଟ୍ରିକ୍ ନେଇଥିଲେ। ୨୦୦୮, ଏପ୍ରିଲ୍ ୧୮ରେ ପ୍ରଥମଥର ପାଇଁ ଆଇପିଏଲ୍ ଖେଳାଯାଇଥିଲା। ତେଣୁ ଚହଲଙ୍କ ହ୍ୟାଟ୍ରିକ୍ ସ୍ବତନ୍ତ୍ର।
କୋଲକାତା ବିପକ୍ଷରେ ଜିତିବା ପାଇଁ ରାଜସ୍ଥାନ ୨୧୮ ରନର ଲକ୍ଷ୍ୟ ଧାର୍ଯ୍ୟ କରିଥିଲା। ଏକ ସମୟରେ ଲାଗୁଥିଲା ଯେ ମ୍ୟାଚ ରାଜସ୍ଥାନର ହାତରୁ ଚାଲିଯିବ। କିନ୍ତୁ ଚହଲ ୧୭ ତମ ଓଭରରେ ମ୍ୟାଚକୁ ସମ୍ପୂର୍ଣ୍ଣ ବଦଳାଇ ଦେଇଥିଲେ। ଚାହଲ କୋଲକାତା ଅଧିନାୟକ ଶ୍ରେୟାସ ଆୟର, ଶିବମ ମାଭି ଏବଂ ପ୍ୟାଟ କମିନ୍ସଙ୍କୁ ଆଉଟ୍ କରି ଏହି ଓଭରରେ ନିଜର ହ୍ୟାଟ୍ରିକ ନେଇଥିଲେ। ସେହି ସେ ୪ଟି ଉଇକେଟ୍ ନେଇଥିଲେ। ଚଳିତ ସିଜନରେ ହ୍ୟାଟ୍ରିକ ନେଇଥିବା ଚହଲ ପ୍ରଥମ ବୋଲର ହୋଇଛନ୍ତି। ସେ ମ୍ୟାଚରେ ୪ ଓଭରରେ ୪୦ ରନ ଦେଇ ୫ ଉଇକେଟ ନେଇଥିଲେ ଏବଂ ଏଥିପାଇଁ ତାଙ୍କୁ ମ୍ୟାନ ଅଫ ଦି ମ୍ୟାଚ ପୁରସ୍କାର ମିଳିଥିଲା।
ଆଇପିଏଲରେ ହ୍ୟାଟ୍ରିକ ନେବାରେ ଚହଲ ହେଉଛନ୍ତି ୨୧ ତମ ବୋଲର ଏବଂ ରାଜସ୍ଥାନ ରୟାଲ୍ସର ପଞ୍ଚମ ବୋଲର। ତାଙ୍କ ପୂର୍ବରୁ ଅଜିତ ଚଣ୍ଡିଲା, ପ୍ରବୀଣ ତାମ୍ବେ, ସେନ୍ ୱାଟସନ ଏବଂ ଶ୍ରେୟାସ ଗୋପାଳ ଆଇପିଏଲରେ ରାଜସ୍ଥାନ ଦଳ ପାଇଁ ହ୍ୟାଟ୍ରିକ ନେଇଛନ୍ତି।