ଦୁବାଇ,୮।୧୦: ଆଇପିଏଲ ୨୦୨୧ର ୫୩ତମ ମ୍ୟାଚ ପରେ ଚେନ୍ନାଇ ସୁପର କିଙ୍ଗ୍ସ (ସିଏସକେ) ତାରକା ବୋଲର ଦୀପକ ଚହର ଷ୍ଟାଡିୟମରେ ତାଙ୍କ ଗର୍ଲଫ୍ରେଣ୍ଡ ଜୟା ଭରଦ୍ୱାଜଙ୍କୁ ପ୍ରପୋଜ ଦେଇଥିଲେ। ପଞ୍ଜାବ କିଙ୍ଗ୍ସ ବିପକ୍ଷ ମ୍ୟାଚ ପରେ ଲାଜକୁଳା ଚହର ସମସ୍ତଙ୍କ ଆଗରେ ଆଣ୍ଠୁରେ ବସି ମୁଦି ପିନ୍ଧି ଜୟାଙ୍କୁ ପ୍ରପୋଜ କରିଥିଲେ। ସେ ଅଧିନାୟକ ଏମଏସ ଧୋନୀଙ୍କ ନିର୍ଦ୍ଦେଶରେ ତାଙ୍କ ଗର୍ଲଫ୍ରେଣ୍ଡଙ୍କୁ ପ୍ରସ୍ତାବ ଦେବା ପାଇଁ ଯୋଜନା ପରିବର୍ତ୍ତନ କରିଥିଲେ।
ଚହର ପ୍ରଥମେ ପ୍ଲେ ଅଫ ମ୍ୟାଚରେ ଜୟାଙ୍କୁ ପ୍ରପୋଜ କରିବାକୁ ଚାହୁଁଥିଲେ, କିନ୍ତୁ ଧୋନୀ ପ୍ଲେ ଅଫ ପୂର୍ବରୁ ଏହା କରିବାକୁ କହିଥିଲେ। ଧୋନୀଙ୍କ ନିର୍ଦ୍ଦେଶରେ ଚହର ତାଙ୍କର ଯୋଜନା ପରିବର୍ତ୍ତନ କରିଥିଲେ। ଦୀପକ ଚହରଙ୍କ ପ୍ରେମିକା ଜୟା ଭରଦ୍ୱାଜ ଦିଲ୍ଲୀରୁ ଆସି ଏକ କର୍ପୋରେଟ କମ୍ପାନୀରେ କାମ କରନ୍ତି। ଜୟା ମଧ୍ୟ ପ୍ରସିଦ୍ଧ ରିଆଲିଟି ଶୋ ‘ବିଗ ବସ’ ସିଜନ ୫ର ପ୍ରତିଯୋଗୀ ସିଦ୍ଧାର୍ଥ ଭରଦ୍ୱାଜଙ୍କ ଭଉଣୀ।