ବେଜିଂ,୨୮।୧୧: ପାକିସ୍ତାନ ଏବଂ ଚାଇନା ମଧ୍ୟରେ ବନ୍ଧୁତା ଭଲ ବୋଲି ବିବେଚନା କରାଯାଏ। ତେବେ ନିକଟ ଅତୀତରେ ଏଭଳି ଘଟଣା ଘଟିଛି ଯେଉଁଥିପାଇଁ ଚାଇନା ଆଉ ପାକିସ୍ତାନ ଉପରେ ବିଶ୍ୱାସ କରିପାରୁ ନାହିଁ।
ସୂଚନାଯୋଗ୍ୟ, ଗତ କିଛି ବର୍ଷ ମଧ୍ୟରେ ଚାଇନା ନାଗରିକ ଏବଂ କର୍ମଚାରୀଙ୍କୁ ଟାର୍ଗେଟ କରି ପାକିସ୍ତାନରେ ଅନେକ ଆତଙ୍କବାଦୀ ଆକ୍ରମଣ କରାଯାଇଥିଲା। ନିକଟ ଅତୀତରେ ବାଲୁଚିସ୍ତାନ ଏବଂ ସିନ୍ଧରେ ଚାଇନା ନାଗରିକଙ୍କୁ ଟାର୍ଗେଟ କରି ଆକ୍ରମଣ କରାଯାଇଛି।
କର୍ମଚାରୀଙ୍କ ଉପରେ ଲଗାତାର ଆକ୍ରମଣ ଯୋଗୁଁ ଚାଇନା ଅସୁବିଧାରେ ପଡିଛି। ଚାଇନା ପାକିସ୍ତାନରୁ ଦାବି କରିଛି ଯେ ଆମର କର୍ମଚାରୀ ଏବଂ ନାଗରିକଙ୍କ ସୁରକ୍ଷା ପାଇଁ ଆମେ ଆମର ସେନାକୁ ପାକିସ୍ତାନକୁ ପଠାଇ ପାରିବା। ତେବେ ଚାଇନାର ଏହି ଦାବିରେ ପାକିସ୍ତାନ ରାଜି ହୋଇନାହିଁ।
ଚାଇନାର ଏହି ଚାହିଦା ପାକିସ୍ତାନ ଉପରେ ବିଶ୍ୱାସ ହ୍ରାସ କରୁଥିବା ଦେଖାଯାଇପାରେ। ଏହି ସମୟରେ ଚାଇନା ସେନାର ମୁଖ୍ୟ ଜେନେରାଲ ବୁଧବାର ପାକିସ୍ତାନର ରାଜଧାନୀ ଇସଲାମାବାଦରେ ପହଞ୍ଚିଥିଲେ। ତାଙ୍କ ସହ ଏକ ବଡ଼ ପ୍ରତିନିଧୀ ମଧ୍ୟ ଇସଲାମାବାଦ ଯାଇଛନ୍ତି। ଚାଇନା ସେନା ମୁଖ୍ୟ ଜେନେରାଲ ଝାଙ୍ଗ ୟୋସିଆ ବୁଧବାର ପାକିସ୍ତାନୀ ସେନା ମୁଖ୍ୟ ଅସୀମ ମୁନିରଙ୍କ ସହ କଥା ହୋଇଛନ୍ତି। ଏହି ବୈଠକ ସମ୍ପର୍କରେ ପାକିସ୍ତାନୀ ସେନା ପକ୍ଷରୁ ଏକ ବିବୃତ୍ତି ଜାରି କରାଯାଇଛି।
ପାକିସ୍ତାନୀ ନ୍ୟୁଜ ପୋର୍ଟାଲ ଡନ ଅନୁଯାୟୀ ଆଞ୍ଚଳିକ ସୁରକ୍ଷା, ସ୍ଥିରତା ଏବଂ ପାରସ୍ପରିକ ପ୍ରତିରକ୍ଷା ସହଯୋଗ ବୃଦ୍ଧି ଉପରେ ଦୁଇ ଦେଶ ମଧ୍ୟରେ ଆଲୋଚନା ହୋଇଥିଲା। ଏଥି ସହ କିଛି ସୂତ୍ରରୁ ପ୍ରକାଶ ଯେ ଆତଙ୍କବାଦ ବିରୋଧରେ ଚାଲିଥିବା ଅପରେସନ ତଥା ପାକିସ୍ତାନରେ ଚାଇନା ନାଗରିକଙ୍କ ଉପରେ ହେଉଥିବା ଆକ୍ରମଣକୁ ନେଇ ଚାଇନା ସେନା ମୁଖ୍ୟ ଜେନେରାଲ ଝାଙ୍ଗ ଉଦବେଗ ପ୍ରକାଶ କରିଛନ୍ତି। ଏହି ଘଟଣାଗୁଡ଼ିକୁ କିପରି ନିୟନ୍ତ୍ରଣ କରାଯିବ ସେ ପାକିସ୍ତାନ ସେନା ମୁଖ୍ୟ ଅସୀମ ମୁର୍ନିଙ୍କୁ ପଚାରିଥିଲେ।
