ସଫଳତା ମାର୍ଗରେ ‘ଚ୍ୟାଲେଞ୍ଜ’ ହେଉଛି ଏମିତି ଏକ ବାଧକ, ଯାହାକୁ ଡରି କେହି କେହି ସମ୍ପୂର୍ଣ୍ଣ ଓହରି ଯାଇ ଲକ୍ଷ୍ୟଚ୍ୟୁତ ହୋଇଯାଆନ୍ତି ତ ଆଉ କାହା ପାଇଁ ଏହା ହିଁ ପାଲଟେ ଦୃଢ଼ ମନୋବଳ ରଖି ସଫଳତାର ଶୀର୍ଷରେ ପହଞ୍ଚତ୍ବାର ଚାବିକାଠି। ତେବେ ମଣିଷର ମାନସିକତାକୁ ନେଇ ଏହାର ପରିଭାଷା କାହା ପାଇଁ କେମିତି…
ଜୀବନର ପ୍ରତିଟି ସମୟରେ ମଣିଷକୁ ଅନେକ ଘାତ ପ୍ରତିଘାତର ସମ୍ମୁଖୀନ ହେବାକୁ ପଡ଼ିଥାଏ। ସଫଳତା ପାଇବାକୁ ହେଲେ ଅନେକ ଚ୍ୟାଲେଞ୍ଜର ବି ସାମ୍ନା କରିବାକୁ ବି ପଡ଼େ। ହେଲେ ଯିଏ ଏହି ଚ୍ୟାଲେଞ୍ଜକୁ ଡରିଯାଏ ସେ ହାରିଯାଏ ଏବଂ ଯିଏ ଏହାକୁ ଜୀବନର ଏକ ପରୀକ୍ଷା ଭାବେ ଗ୍ରହଣ କରି ଉଦ୍ୟମ ଜାରି ରଖେ, ସେ ହିଁ ସଫଳତାର ସ୍ବାଦ ଚାଖିପାରେ। ତେଣୁ କୌଣସି ଚ୍ୟାଲେଞ୍ଜର ସମ୍ମୁଖୀନ ହେବା ଲାଗି କେଉଁ ସବୁ ଦିଗକୁ ଅଣଦେଖା କଲେ ଆଗକୁ ବଢ଼ିପାରିବେ ଜାଣିରଖନ୍ତୁ ସେ ସମ୍ପର୍କରେ…
ନକାରାତ୍ମକ ଭାବନା ଦୂରାନ୍ତୁ: ଯେବେ ଜଣେ ନିଜ ଲକ୍ଷ୍ୟପଥରେ ଅଗ୍ରସର ହୁଏ, ସେତେବେଳେ ଅନେକ ବାଧା ବା ଚ୍ୟାଲେଞ୍ଜର ସମ୍ମୁଖୀନ ହୋଇଥାଏ। ହେଲେ କେବେକେବେ ମନରେ ନକାରାତ୍ମକ ଭାବନା ରହିଲେ ଏହା ଚ୍ୟାଲେଞ୍ଜକୁ ଗ୍ରହଣ କରିବାକୁ ଦିଏନାହିଁ ଏବଂ ପ୍ରଗତି ପଥରେ ବାଧକ ସାଜେ। ଏହା ମାନସିକ ସ୍ତରରେ ଜଣଙ୍କୁ ଦୁର୍ବଳ କରିଦିଏ। ଫଳରେ ଆଗକୁ କୌଣସି ଚ୍ୟାଲେଞ୍ଜ ଆସିଲେ ତାହାକୁ ସାମ୍ନା କରିବା ତ ଦୂରର କଥା, ଭୟରେ ଜଣେ ସେଥିରୁ ସମ୍ପୂର୍ଣ୍ଣ ଓହରିଯାଏ। ତେଣୁ ସର୍ବପ୍ରଥମେ ନିଜ ମନରେ ଏଭଳି ଭାବନା ଦୂରେଇ ସକାରାତ୍ମକ ଭାବନା ରଖନ୍ତୁ।
ଲକ୍ଷ୍ୟ ପ୍ରତି ରଖନ୍ତୁ ଫୋକସ୍: ଆମ ଭିତରେ ଅନେକ ଏମିତି ବି ଅଛନ୍ତି, ଯାହାଙ୍କର ଲକ୍ଷ୍ୟ କେବଳ ଗୋଟିଏ ହୋଇ ନ ଥାଏ। ସେମାନେ ସେ ସବୁକୁ ସଫଳ କରିବା ଲାଗି ଉଦ୍ୟମ ବି କରନ୍ତି। ହେଲେ କୌଣସି କାର୍ଯ୍ୟରେ ଯଦି ଥରେ ବିଫଳତା ଆସେ ଅବା ଚ୍ୟାଲେଞ୍ଜର ସମ୍ମୁଖୀନ ହେବାକୁ ପଡ଼େ, ତେବେ ବାରମ୍ବାର ଉଦ୍ୟମ କରିବା ବଦଳରେ ସେମାନେ ଏହାକୁ ଛାଡ଼ି ଅନ୍ୟ ସମସ୍ତ ଲକ୍ଷ୍ୟ ପୂରଣ କରିବାକୁ ଗୁରୁତ୍ୱ ଦିଅନ୍ତି। ସେହିପରି କୌଣସି ନିର୍ଦ୍ଦିଷ୍ଟ କାର୍ଯ୍ୟ ପ୍ରତି ଫୋକସ୍ ନ ରହିବାରୁ ଗୋଟିଏ ପରେ ଗୋଟିଏ ଲକ୍ଷ୍ୟରେ ଆସୁଥିବା ଚ୍ୟାଲେଞ୍ଜକୁ ସେମାନେ ଅବହେଳା କରି ଛାଡ଼ିଦିଅନ୍ତି ଏବଂ ଶେଷରେ କୌଣସି ଲକ୍ଷ୍ୟ ହାସଲ କରିବା ସହଜ ହୋଇପାରି ନ ଥାଏ।
ଛାଡ଼ନ୍ତୁ ଭୟ: ଭୟ ଏଭଳି ଏକ ଭାବନା, ଯାହାକି ମଣିଷକୁ ପଛକୁ ପଛକୁ ଟାଣେ। ଲକ୍ଷ୍ୟ ପଥରେ ଆସୁଥିବା ଚ୍ୟାଲେଞ୍ଜକୁ ଥରେ ସାମ୍ନା କରିବାକୁ ଭୟ କଲେ ଏହା ମାନସିକ ସ୍ତରରେ ଦୁର୍ବଳ କରିଦେବ, ଯଦ୍ଦ୍ବାରା ଜଣେ ଏଥିରୁ ନିଜକୁ ଦୂରେଇବା ଖୁବ୍ କଷ୍ଟକର ହୋଇପଡ଼ିବ। ଉଦାହରଣ ସ୍ବରୂପ ଭବିଷ୍ୟତରେ ସଫଳ ଓକିଲ ହେବାକୁ ଇଚ୍ଛା ରଖିଥିବା ଜଣେ ଛାତ୍ରୀ କିମ୍ବା ଛାତ୍ର କ୍ଲାସ୍ରୁମ୍ରେ ଶିକ୍ଷକ ଏବଂ ଛାତ୍ରୀଛାତ୍ରଙ୍କ ସମ୍ମୁଖରେ ପଦେ କଥା କହିବାକୁ ଡରନ୍ତି। ଧୀରେ ଧୀରେ ଏହି ଡର ମନରେ ରହିଯାଏ। ଫଳରେ ଜବ୍ ମିଳିଲେ କିପରି କୋର୍ଟରେ ନିଜର ମତ ରଖିବେ ତାକୁ ନେଇ ଭୟ କରନ୍ତି ଏବଂ ଲକ୍ଷ୍ୟ ପଥ ବଦଳାଇ ଦିଅନ୍ତି। ହେଲେ ଏହା ଜଣେ ବିଦ୍ୟାର୍ଥୀର ପରିଚୟ ନୁହେଁ। ତେଣୁ ସର୍ବପ୍ରଥମେ ନିଜର ଦୁର୍ବଳତାକୁ ନିଜେ ଖୋଜିବା ଏବଂ ଏହାକୁ ଦୂର କରିବା ଲାଗି ବାରମ୍ବାର ଚେଷ୍ଟା କରିବା ଦ୍ୱାରା ହିଁ ମନରୁ ଭୟ ଦୂର କରି ସଫଳତା ପାଇବାର ଏକମାତ୍ର ଉପାୟ।
ଅନ୍ୟ କଥାରେ ହୁଅନ୍ତୁନି ଦୁର୍ବଳ: ଅନ୍ୟକୁ ଆଗକୁ ବଢ଼ିବାରେ ଉତ୍ସାହିତ କରିବା କିମ୍ବା ପ୍ରେରଣା ଯୋଗାଇଦେବା ଲୋକଙ୍କ ତୁଳନାରେ ବିଭିନ୍ନ ନକାରାତ୍ମକ କଥା କହି ପଛକୁ ଟାଣିବା ଲୋକଙ୍କ ସଂଖ୍ୟା ବେଶି। ହେଲେ ଏଥିରେ ମନକୁ ଦୁର୍ବଳ ନ କରି ସେଭଳି ଲୋକଙ୍କ କଥାକୁ ଏକ ଚ୍ୟାଲେଞ୍ଜ ଭାବି ଦୃଢ଼ ମନୋବଳ ରଖି ବାରମ୍ବାର ଚେଷ୍ଟା କଲେ ସଫଳ ହୋଇପାରିବେ ସେଥିରେ ସନ୍ଦେହ ନାହିଁ। ତେଣୁ କିଏ କ’ଣ କହୁଛି କିମ୍ବା କିଏ କ’ଣ ଭାବିବ ସେ ଦିଗରେ ଧ୍ୟାନ ଦେଇ ନିଜକୁ ଦୁର୍ବଳ କରିବା ବଦଳରେ ନିଜ କାର୍ଯ୍ୟରେ ଧ୍ୟାନ ଦିଅନ୍ତୁ ଏବଂ ଆଗକୁ ବଢ଼ନ୍ତୁ।