ଉମରକୋଟ,୨୦ା୩(ସ୍ବ.ପ୍ର.): ଉମରକୋଟ ବ୍ଲକ ବୁର୍ଜା ପଞ୍ଚାୟତ ଅଧୀନ ପୂଜାରିଗୁଡା ଗ୍ରାମର ଚାମର ଭତ୍ରା ସରକାରୀ ସହାୟତାକୁ ଅପେକ୍ଷା କରି ରହିଛନ୍ତି। ଚାମର (୬୩) କିଛି ବର୍ଷ ପୂର୍ବେ ଦୁଇ ପୁଅଙ୍କୁ ହରାଇଛନ୍ତି। ଏବେ ତାଙ୍କ ପରିବାରରେ ସ୍ତ୍ରୀ, ଦୁଇ ବୋହୁ, ୫ ନାତୁଣୀନାତି ଅଛନ୍ତି। ଚାମର ଦିନ ମଜୁର ଲାଗି ପରିବାର ୮ ପ୍ରାଣୀଙ୍କ ଭଲମନ୍ଦ ବୁଝୁଥିଲେ। ବର୍ଷେ ପୂର୍ବେ ଏକ ଦୁର୍ଘଟଣାରେ ସେ ଗୁରୁତର ହୋଇଥିଲେ। ସେବେଠାରୁ ତାଙ୍କ ଅଣ୍ଟାଠାରୁ ପାଦ ପର୍ଯ୍ୟନ୍ତ କିଛି କାମ କରୁନାହିଁ। ଘୋଷାରି ହୋଇ ଚଳପ୍ରଚଳ କରୁଛନ୍ତି। ସରକାରୀ ସାହାଯ୍ୟ ଭାବେ କେବଳ ଖାଦ୍ୟ ସୁରକ୍ଷା ଯୋଜନାରେ ଯାହା ଚାଉଳ ମିଳୁଛି। ଚାଉଳ ବ୍ୟତୀତ ଦୁଇ ବୋହୂଙ୍କ ଲାଗି ବିଧବା ଭତ୍ତା, ସ୍ତ୍ରୀ ନଚେତ ତାଙ୍କୁ ବାର୍ଦ୍ଧକ୍ୟ ଭତ୍ତା କି ବିକଳାଙ୍ଗ ଭତ୍ତା ଏପରିକି ତିନି ଚକିଆ ସାଇକେଲ କିଛି ବି ମିଳୁନାହିଁ। ପରିବାର ଭାଗ୍ୟରେ ଆବାସ କି ବିଜୁ ପକ୍କା ଘର ଖଣ୍ଡିଏ ମଧ୍ୟ ନାହିଁ। ବର୍ଷା ହେଲେ ଚାମରଙ୍କ ଘରୁ ପାଣି ଗଳୁଛି। ତେଣୁ ସେ ଘୋଷାରି ହେଉଥିଲେ ମଧ୍ୟ ପରିବାର କାମ କରିବାକୁ ଚେଷ୍ଟା କରୁଛନ୍ତି। ଚାମର ପିନ୍ଧିବାକୁ ଖଣ୍ଡେ ପାଉ ନ ଥିବାରୁ ଜରି ବସ୍ତାର ପ୍ୟାଣ୍ଟ ନିଜେ ତିଆରି କରି ପିନ୍ଧୁଛନ୍ତି। ସରକାରଙ୍କ ପକ୍ଷରୁ କୌଣସି ସାହାଯ୍ୟ ମିଳଲେ ଚାମରଙ୍କ କଷ୍ଟ ଦୂର ହେବ ବୋଲି ଗ୍ରାମବାସୀ କହିଛନ୍ତି। ଏ ନେଇ ଉମରକୋଟ ବିଡ଼ିଓ ଡା. ହିମାଞ୍ଚଳ ମାଝୀଙ୍କୁ ଯୋଗାଯୋଗ କରିବାରୁ ସୋମବାର ଅଧିକାରୀଙ୍କୁ ତାଙ୍କ ଘରକୁ ପଠେଇବେ। ଉକ୍ତ ପରିବାର କିପରି ସରକାରଙ୍କ ଯୋଜନାରେ ଅନ୍ତର୍ଭୁକ୍ତ ହେବେ ସେ ଦିଗରେ ଧ୍ୟାନ ଦେବେ ବୋଲି କହିଛନ୍ତି।
