ଲିସ୍ବନ,୨୫।୮(ଏପି): ୟୁନିୟନ ଅଫ୍ ୟୁରୋପିଆନ ଫୁଟ୍ବଲ ଆସୋସିଏଶନ (ୟୁଇଏଫ୍ଏ) ଆନୁକୂଲ୍ୟରେ ପ୍ରତିବର୍ଷ ଆୟୋଜିତ ହୋଇଆସୁଥିବା ଚାମ୍ପିୟନ୍ସ ଲିଗ୍ରେ ଏଥର ଜର୍ମାନୀର ପେସାଦାର କ୍ଲବ୍ ବେୟର୍ନ ମ୍ୟୁନିକ୍ ବାଜି ମାରିଛି। ଦର୍ଶକଙ୍କ ଅନୁପସ୍ଥିତିରେ ରବିବାର ସ୍ଥାନୀୟ ଇଷ୍ଟାଡିଓ ଡି ଲୁଜ୍ରେ ଅନୁଷ୍ଠିତ ସଂଘର୍ଷପୂର୍ଣ୍ଣ ଫାଇନାଲ ମ୍ୟାଚ୍ରେ ବେୟର୍ନ ମ୍ୟୁନିକ୍ ୧-୦ ଗୋଲରେ ଫ୍ରେଞ୍ଚ୍ ପେସାଦାର କ୍ଲବ୍ ପ୍ୟାରିସ୍ ସେଣ୍ଟ ଜର୍ମାନ (ପିଏସ୍ଜି)କୁ ହରାଇ ଟାଇଟଲ ହାସଲ କରିଛି। କୋଭିଡ୍-୧୯ ମହାମାରୀ କାରଣରୁ ଫାଙ୍କା ଷ୍ଟାଡିୟମରେ ମ୍ୟାଚ୍ ଖେଳାଯାଇଥିଲା। ଏଥିସହିତ ବେୟର୍ନ ଷଷ୍ଠ ଥର ପାଇଁ ଏହି ହାଇପ୍ରୋଫାଇଲ ଲିଗ୍ରେ ଚାମ୍ପିୟନ ହେବାର ଗୌରବ ଅର୍ଜନ କରିଛି। ୨୦୧୩ ପରେ ପିଏସ୍ଜି ପ୍ରଥମଥର ପାଇଁ ବେୟର୍ନ ପ୍ରଥମ ଫାଇନାଲ ଜିତିଛି। ଅପରପକ୍ଷରେ ପିଏସ୍ଜି ପ୍ରଥମଥର ପାଇଁ ଟାଇଟଲ ହାସଲ କରିବାର ସୁଯୋଗ ହାତଛଡ଼ା କରିଛି। ଗତ ୯ ବର୍ଷ ମଧ୍ୟରେ ଖେଳାଳିଙ୍କ ପାଇଁ ଏକ ବିଲିୟନ ଆମେରିକୀୟ ଡଲାର ଖର୍ଚ୍ଚ କରିଥିଲେ ମଧ୍ୟ ପିଏସ୍ଜି ହାତ ଖାଲି ରହିଛି। ନେମାର, କିଲିଆନ ଏମ୍ବାପେ ଓ ଆଞ୍ଜେଲ ଡି ମାରିଆ ପାଇଁ ୫୦୦ ମିଲିୟନ ଆମେରିକୀୟ ଡଲାର ଖର୍ଚ୍ଚ କରାଯାଇଛି। ଫାଇନାଲରେ ଏମାନେ କିଛି କରି ଦେଖାଇବାରେ ବିଫଳ ହୋଇଥିଲେ।
କଡ଼ା ସଂଘର୍ଷପୂର୍ଣ୍ଣ ଫାଇନାଲ ମ୍ୟାଚ୍ରେ ବେୟର୍ନ ପକ୍ଷରୁ କିଙ୍ଗ୍ସଲି କୋମାନ ୫୯ତମ ମିନିଟ୍ରେ ମ୍ୟାଚ୍ର ଏକମାତ୍ର ଗୋଲ ସ୍କୋର କରିଥିଲେ। ୨୪ ବର୍ଷିଆ କୋମାନ ପିଏସ୍ଜି ଡିଫେନ୍ସକୁ ଭେଦ କରି ଏହି ଚମତ୍କାର ଗୋଲ ସ୍କୋର କରିଥିଲେ। ଏଥିସହିତ ବେୟର୍ନ ଲିଗ୍ରେ ୪୩ତମ ଗୋଲ ସ୍କୋର କରିଛି। ପୁଣି ପ୍ରଥମ ଦଳ ଭାବେ ବେୟର୍ନ ଚାମ୍ପିୟନ୍ସ ଲିଗ୍ର ସବୁ ୧୧ଟି ମ୍ୟାଚ୍ ଜିତି ଏକ ବିରଳ ସଫଳତା ହାସଲ କରିଛି। କୋଭିଡ୍-୧୯ ମହାମାରୀ ପାଇଁ ଫାଇନାଲ ମ୍ୟାଚ୍କୁ ପାଖାପାଖି ୩ ମାସ ଘୁଞ୍ଚାଇ ଦିଆଯାଇଥିଲା। ପୂର୍ବରୁ ଏହି ଲିଗ୍ରେ ଏସି ମିଲାନ ୭ ଥର, ରିୟଲ ମାଡ୍ରିଡ୍ ୧୩ଥର ଚାମ୍ପୟନ ହେବାର ଗୌରବ ଅର୍ଜନ କରିଛନ୍ତି। ବେୟର୍ନର ପରାଜୟ ପରେ ନେମାର କାନ୍ଦି ପକାଇଥିଲେ। ତେବେ ତାଙ୍କୁ ପ୍ରତିଦ୍ୱନ୍ଦ୍ୱୀ ବେୟର୍ନ ଖେଳାଳି ଡେଭିଡ୍ ଅଲାବା ସାନ୍ତ୍ୱନା ଦେଉଥିବାର ଦେଖାଯାଇଥିଲା। ବେୟର୍ନ ଏଥିସହିତ କ୍ରମାଗତ ୨୧ତମ ବିଜୟ ହାସଲ କରିବା ସହ ଗତ ୩୦ଟି ମ୍ୟାଚ୍ରେ ଅପରାଜେୟ ରହିଛି।
