ସେଭିଲି (ସ୍ପେନ୍), ୪ା୧୨ (ଏପି)-ଚାମ୍ପିୟନ୍ସ ଲିଗ୍ ଫୁଟ୍ବଲ ଟୁର୍ନାମେଣ୍ଟରେ ସବୁଠାରୁ ବୟସ୍କ ଖେଳାଳି ଭାବେ ହ୍ୟାଟ୍ରିକ ଅର୍ଜନ କରିଛନ୍ତି ଚେଲ୍ସି ଷ୍ଟ୍ରାଇକର ଅଲିଭର ଗିରୋଡ୍। ସେଭିଲା ବିପକ୍ଷରେ ମ୍ୟାଚରେ ୪ ଗୋଲ ସ୍କୋର କରି ତାଙ୍କ ଦଳକୁ ୪-୦ ଗୋଲରେ ବିଜୟୀ କରାଇଛନ୍ତି। ଏହାଦ୍ୱାରା ଚେଲ୍ସି ଗ୍ରୁପ୍-ଇ’ରେ ପ୍ରଥମ ସ୍ଥାନ ଅଧିକାର କରିଛି। ୧୯୬୫ରେ ୟୁରୋପିଆନ୍ କପ୍ର ଏକ ମ୍ୟାଚରେ ଫେରେଙ୍କ୍ ପୁକାସ ୩ ଗୋଲ ସ୍କୋର କରିବାପରଠାରୁ ୩୪ ବର୍ଷ ବୟସରେ ଏକ ପ୍ରତିଯୋଗିତାରେ ହ୍ୟାଟ୍ରିକ୍ ଅର୍ଜନ କରିବାରେ ଗିରୋଡ୍ ସବୁଠାରୁ ବୟସ୍କ ଖେଳାଳି ହେବାର ଗୌରବ ଅର୍ଜନ କରିଛନ୍ତି। ଫ୍ରାନ୍ସର ଏହି ଅନ୍ତର୍ଜାତୀୟ ଷ୍ଟ୍ରାଇକର ୮ମ ଓ ୫୪ତମ ମିନିଟ୍ରେ ନିଖୁଣ ଶଟ୍ ମାରି ଗୋଲ ସ୍କୋର କରିଥିଲେ। ପରେ ୭୪ତମ ମିନିଟ୍ରେ ଏକ ହେଡର ଏବଂ ୮୩ ତମ ମିନିଟ୍ରେ ଏକ ପେନାଲ୍ଟି କିକ୍କୁ ସେ ଗୋଲରେ ରୂପାନ୍ତରିତ କରିଥିଲେ। ଚାମ୍ପିୟନ୍ସ ଲିଗ୍ର ଗୋଟିଏ ମ୍ୟାଚରେ ଜଣେ ବ୍ୟକ୍ତିଗତ ୪ଟି ଗୋଲ ସ୍କୋର କରିବା ଏକ ବଡ଼ ସଫଳତା। ଏଥିରେ ସେ ଖୁବ୍ ଆନନ୍ଦିିତ ବୋଲି କହିଛନ୍ତି ଚେଲ୍ସି କୋଚ୍ ଫ୍ରାଙ୍କ୍ ଲାମ୍ପାର୍ଡ। ଗିରୋଡ୍ ଏହା ପୂର୍ବରୁ ଆଉ ଥରେ ୪ଗୋଲ ସ୍କୋର କରିଥିଲେ। ଫ୍ରାନ୍ସରେ ଲିଗ୍-୨ରେ ଟୁର୍ସ ଦଳ ତରଫରୁ ଖେଳୁଥିବାବେଳେ ଗୋଟିଏ ମ୍ୟାଚରେ ସେ ୪ଟି ଗୋଲ ଦେଇଥିଲେ। ଚାମ୍ପିୟନ୍ସ ଲିଗ୍ରେ ଚେଲ୍ସି ତରଫରୁ ହ୍ୟାଟ୍ରିକ ଅର୍ଜନ କରିବାରେ ଗିରୋଡ୍ ଦ୍ୱିତୀୟ ଖେଳାଳି। ତାଙ୍କ ପୂର୍ବରୁ ୨୦୦୬ରେ ଡିଡିଏ ଡ୍ରୋଗ୍ବା ଏହି ସଫଳତା ହାସଲ କରିଥିଲେ।