ନୂଆଦିଲ୍ଲୀ,୨୬।୯ (ପି.ଟି.): ସେପ୍ଟେମ୍ବର ୨୮ ମହାନ୍ ସ୍ବାଧୀନତା ସଂଗ୍ରାମୀ ଶହୀଦ ଭଗତ ସିଂଙ୍କ ଜନ୍ମବାର୍ଷିକୀ ହୋଇଥିବାରୁ ଅମୃତ ମହୋତ୍ସବରେ ଏହା ଏକ ଗୁରୁତ୍ୱପୂର୍ଣ୍ଣ ଦିବସ। ତାଙ୍କୁ ଶ୍ରଦ୍ଧାଞ୍ଜଳି ସ୍ବରୂପ ଚଣ୍ଡିଗଡ଼ ବିମାନବନ୍ଦର ଭଗତ ସିଂଙ୍କ ନାମରେ ନାମିତ କରାଇବା ଲାଗି ଗୁରୁତ୍ୱପୂର୍ଣ୍ଣ ନିଷ୍ପତ୍ତି ନିଆଯାଇଥିବା ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ରବିବାର ଘୋଷଣା କରିଛନ୍ତି। ପଞ୍ଜାବ ମୁଖ୍ୟମନ୍ତ୍ରୀ ଭଗଓ୍ବନ୍ତ ମାନ୍ ଏହାକୁ ସ୍ବାଗତ କରିଛନ୍ତି। ପଞ୍ଜାବର ଦୀର୍ଘଦିନର ଦାବି ପୂରଣ ହେଲା ବୋଲି ମାନ୍ କହିଛନ୍ତି। ମାସିକ ରେଡିଓ କାର୍ଯ୍ୟକ୍ରମ ‘ମନ୍ କୀ ବାତ୍’ରେ ପ୍ରଧାନମନ୍ତ୍ରୀ ଚଣ୍ଡିଗଡ଼ ବିମାନବନ୍ଦର ସମେତ ବିଭିନ୍ନ ପ୍ରସଙ୍ଗରେ ଆଲୋଚନା କରିଥିଲେ। ଜଳବାୟୁ ପରିବର୍ତ୍ତନ ସାମୁଦ୍ରିକ ପରିବେଶ ପାଇଁ ବଡ଼ ବିପଦ ସୃଷ୍ଟି କରିଛି। ବେଳାଭୂମିରେ ଆବର୍ଜନା ଓ ବର୍ଜ୍ୟବସ୍ତୁ ଫିଙ୍ଗାଯାଉଥିବାରୁ ପ୍ରଧାନମନ୍ତ୍ରୀ ଏହାକୁ ନେଇ ଚିନ୍ତାବ୍ୟକ୍ତ କରିଛନ୍ତି।
ଦୀର୍ଘବର୍ଷ ପରେ ଭାରତକୁ ଚିତାବାଘ ଫେରିଥିବାରୁ ଏହା ୧୩୦ କୋଟି ଦେଶବାସୀଙ୍କୁ ଗର୍ବିତ କରିଛି। ଏକ ଟାସ୍କଫୋର୍ସ ସେମାନଙ୍କର ତଦାରଖ କରୁଛନ୍ତି। ଲୋକମାନଙ୍କୁ ଚିତା ଦେଖିବା ଲାଗି କେବେ ଅନୁମତି ମିଳିବ ତାହା ଟାସ୍କଫୋର୍ସ ରିପୋର୍ଟ ଆଧାରରେ ନିଆଯିବ ବୋଲି ପ୍ରଧାନମନ୍ତ୍ରୀ କହିଛନ୍ତି। ଚିତାଗୁଡ଼ିକର ନାମକରଣ ଲାଗି ମାଇଁଗଭ୍ ପ୍ଲାଟ୍ଫର୍ମରେ ଏକ ପ୍ରତିଯୋଗିତାର ଆୟୋଜନ କରାଯିବ,ଯେଉଁଥିରେ ଜନସାଧାରଣ ସାମିଲ ହୋଇ ସେମାନେ ଚିନ୍ତା କରୁଥିବା ନାମ ପ୍ରସ୍ତାବ ରଖିପାରିବେ। ଏହି ଅବସରରେ ମୋଦି ଭାଜପାର ଆଦର୍ଶ ଦୀନଦୟାଲ ଉପାଧ୍ୟାୟଙ୍କୁ ଶ୍ରଦ୍ଧାଞ୍ଜଳି ଅର୍ପଣ କରିଥିଲେ।
