ଚଣ୍ଡିଖୋଲ,୧୦।୧୧(ଡି.ଏନ.ଏ.): ଯାଜପୁର ଜିଲା ଚଣ୍ଡିଖୋଲଠାରେ ପ୍ରସ୍ତାବିତ ଭୂତଳ ତୈଳ ଭଣ୍ଡାର ନିର୍ମାଣ ନେଇ ୨୦୧୬-୧୭ରୁ ଘୋଷଣା କରାଯାଇଥିଲେ ବି ଏ ପର୍ଯ୍ୟନ୍ତ କାର୍ଯ୍ୟ ପାଦେ ବି ଆଗେଇ ପାରିନି। ଏପରି କି ପ୍ରସ୍ତାବିତ ପ୍ରକଳ୍ପର ଜମି ଅଧିଗ୍ରହଣ କାର୍ଯ୍ୟ ମଧ୍ୟ ହୋଇ ପାରିନାହିଁ। ଫଳରେ ଏହି ପ୍ରକଳ୍ପ କେବେ ହେବ ତାହାକୁ ଆଶଙ୍କା ପ୍ରକାଶ ପାଇଛି।
ଏଠାରେ ଭୂତଳ ତୈଳ ଭଣ୍ଡାର ସଂରକ୍ଷଣାଳାୟ ନିର୍ମାଣ ହେବା ଦ୍ୱାରା ବ୍ୟାପକ ନିଯୁକ୍ତି ସୃଷ୍ଟି ହେବା ସହ ରାଜ୍ୟର ବିକାଶ ଘଟିବ ବୋଲି କେନ୍ଦ୍ର ସରକାରଙ୍କ ତରଫରୁ ଘୋଷଣା କରାଯାଇଥିଲା। ୨୦୧୬-୧୭ରେ ଏହାକୁ କେନ୍ଦ୍ର କ୍ୟାବିନେଟ୍ ମଞ୍ଜୁରୀ ମିଳିଥିଲା। ୨୦୧୮ ଜୁନ ୨୭ରେ ଏଥିଲାଗି ୬, ୫୦୦ କୋଟି ଟଙ୍କାର ବ୍ୟୟ ବରାଦ କରାଯାଇଥିଲା। ଦେଶର ଏହି ବୃହତ୍ ପ୍ରକଳ୍ପ ଦ୍ୱାରା ୪ ମିଲିୟନ ମେଟ୍ରିକ୍ ଟନ୍ ତୈଳ ସଂରକ୍ଷଣ ହୋଇ ପାରିବ ବୋଲି କେନ୍ଦ୍ର ସରକାର ଘୋଷଣା କରିଥିଲେ। ପ୍ରକଳ୍ପ ପାଇଁ ଧର୍ମଶାଳା ତହସିଲ୍ ଅନ୍ତର୍ଗତ ଡଙ୍କାରୀ ମୌଜାରେ ୪୦୦ ଏକର ଜମି ଚିହ୍ନଟ କରାଯାଇଥିଲା। ଏହି ପ୍ରକଳ୍ପ ହେଲେ ପାଞ୍ଚ ବର୍ଷ ମଧ୍ୟରେ ୪ ହଜାର କର୍ମ ଦିବସ ସୃଷ୍ଟି କରାଯିବ ବୋଲି କେନ୍ଦ୍ର ସରକାରଙ୍କ ତରଫରୁ ଘୋଷଣା ମଧ୍ୟ କରାଯାଇଥିଲା। କେନ୍ଦ୍ର ପେଟ୍ରୋଲିୟମ ବିଭାଗ ତରଫରୁ ଉଚ୍ଚସ୍ତରୀୟ ପ୍ରତିନିଧି ଆସି କ୍ଷେତ୍ର ପରିଦର୍ଶନ କରିବା ସହ ନିର୍ମାଣ କାର୍ଯ୍ୟ ଶୀଘ୍ର ହେବ ବୋଲି ସୂଚନା ଦେଇଥିଲେ। ପ୍ରକଳ୍ପ ହେଲେ ଡଙ୍କାରୀଠାରୁ ପାରାଦୀପ ପର୍ଯ୍ୟନ୍ତ ୧୦୦ କିମି ପାଇପ ଲାଇନ ବିଛାଯିବା ସହ ସମୁଦ୍ର ମଧ୍ୟରେ ବୋରଓ୍ବେଲ ନିର୍ମାଣ କରାଯିବ ବୋଲି ପ୍ରସ୍ତାବ ରହିଛି। ପ୍ରକଳ୍ପ କରାଗଲେ ଚଣ୍ଡିଖୋଲଠାରୁ ପାରାଦୀପ ପର୍ଯ୍ୟନ୍ତ ଜାତୀୟ ରାଜପଥ ପ୍ରଶସ୍ତୀକରଣ ସହ ବହୁ ଉନ୍ନୟନମୂଳକ କାର୍ଯ୍ୟ କରାଯିବା ନେଇ ଘୋଷଣା କରାଯାଇଥିଲା। ଏହି ସର୍ବବୃହତ୍ ଭୂତଳ ତୈଳ ଭଣ୍ଡାର ନିର୍ମାଣ ହେଲେ ଏକ ସଙ୍ଗେ ୪,୫୦୦ ନିୟୁତ ମେଟ୍ରିକ୍ ଟନ୍ ଅଶୋଧିତ ତୈଳ ଗଛିତ ରଖାଯିବା ସହ ଦେଶର ସଙ୍କଟ ସମୟରେ ୧୦ ଦିନ ପାଇଁ ସାରା ଦେଶକୁ ତୈଳ ଯୋଗାଇ ଦିଆଯାଇ ପାରିବ ବୋଲି ଘେଷଣା କରାଯାଇଥିଲା। ତେବେ ଏହି ମୌଜାରେ ଏ ପର୍ଯ୍ୟନ୍ତ ଜମି ଅଧିଗ୍ରହଣ କାର୍ଯ୍ୟ କରାଯାଇ ନାହିଁ। ସେଥିନେଇ ପ୍ରକଳ୍ପ ଆଶାକ୍ଷିଣ ହେବାରେ ଲାଗିଛି। ଏନେଇ ବିଭାଗୀୟ ପ୍ରତିକ୍ରିୟା ମିଳି ପାରିନାହିଁ।