କଟକ,୨୦ା୬(ସୁପ୍ରିୟା ପ୍ରିୟଦର୍ଶିନୀ): ମଙ୍ଗଳବାର ଶ୍ରୀଜିଉଙ୍କ ରଥଯାତ୍ରା। ଏହି ପରିପ୍ରେକ୍ଷୀରେ କଟକରେ ରଥଯାତ୍ରା ପାଳନ ନେଇ ପ୍ରସ୍ତୁତି ସରିଥିବାବେଳେ ସକାଳୁ ଗୁଣ୍ଡିଚା ମନ୍ଦିର ଅଭିମୁଖେ ବାହାରିବେ ଶ୍ରୀଜୀଉ। ତେବେ କଟକସ୍ଥିତ ଚାନ୍ଦିନୀଚୌକର ମହାପ୍ରଭୁ ଶ୍ରୀଜଗନ୍ନାଥଙ୍କ ରଥଯାତ୍ରାର ସ୍ବତନ୍ତ୍ର ମାନ୍ୟତା ରହିଛି। ସୂଚନା ମୁତାବକ, ମଙ୍ଗଳବାର ଅପରାହ୍ନ ୧ ଘଟିକା ସମୟରେ ଚାନ୍ଦିନୀଚୌକ ଛକାରେ ଥିବା ରଥ ଟଣା ଆରମ୍ଭ ହେବ। ଅଷ୍ଟଶମ୍ଭୁ ମନ୍ଦିର ଛକ, ବନ୍ଧବାସେଳୀ ଛକ, ତ୍ରିନାଥ ମନ୍ଦିର ଛକ, ନୃସିଂହନାଥ ମଠ ଛକ, ମଙ୍ଗଳାସାହି ଛକ, କଫଲା ଫାଣ୍ଡି ଛକ, ମହାନ୍ତିପଡା ଛକ,ସତୀଚଉରା ଛକରୁ ରିଂରୋଡ଼ ଦେଇ ବନ୍ଧବାଶେଳୀ ପୀଠସ୍ଥିତ ମାଉସୀମା ମନ୍ଦିରରୁ ପୋଡ଼ପିଠା ଭୋଗ ଖାଇ ଶ୍ରୀଜିଉଙ୍କ ରଥ କାଠଯୋଡ଼ି ବେଲଭ୍ୟୁ ଛକସ୍ଥିତ ଅସ୍ଥାୟୀ ଗୁଣ୍ଡିଚା ମନ୍ଦିରଠାରେ ପହଞ୍ଚିବ। ୨୧ରୁ ୨୭ ତାରିଖ ଯାଏଁ ବେଲଭ୍ୟୁ ଛକସ୍ଥିତ ତଳ ଖେଳପଡ଼ିଆରେ ଏବଂ ୨୯, ୩ଠ ଜଗନ୍ନାଥ ମନ୍ଦିର ସମ୍ମୁଖ ବଡ଼ଦାଣ୍ଡରେ ସାଂସ୍କୃତିକ କାର୍ଯ୍ୟକ୍ରମ ଅନୁଷ୍ଠିତ ହେବ। ଚାନ୍ଦିନୀଚୌକ ଜଗନ୍ନାଥ ମହାପ୍ରଭୁଙ୍କ ରଥଯାତ୍ରାକୁ ସଫଳ କରିବା ପାଇଁ ମନ୍ଦିର ପରିଚାଳନା ସମିତି ପକ୍ଷରୁ ସମସ୍ତ ବ୍ୟବସ୍ଥା କରାଯାଇଛି। ଏହି ୯ଦିନ ବ୍ୟାପୀ ରଥଯାତ୍ରା ମହୋତ୍ସବକୁ ସଫଳ କରିବା ପାଇଁ ଜିଲା ପ୍ରଶାସନ, ପୋଲିସ ପ୍ରଶାସନ ଓ କଟକ ମହାନଗର ନିଗମ ପକ୍ଷରୁ ସମସ୍ତ ପ୍ରକାର ପ୍ରସ୍ତୁତି କରାଯାଇଛି। ହରିପୁର ରଥଯାତ୍ରାରେ ସୁଭଦ୍ରାଙ୍କ ରଥକୁ କେବଳ ମହିଳାମାନେ ହିଁ ହଳଦିଆ ଶାଢ଼ି ପିନ୍ଧି ଟାଣନ୍ତି ।
