ଭୁବନେଶ୍ୱର, ୧୭।୫ (ବ୍ୟୁରୋ): ସାହିତି୍ୟକ, ଅନୁବାଦକ ଓ ଗାଳ୍ପିକ ଚନ୍ଦ୍ରଶେଖର ଦାସବର୍ମାଙ୍କ ପରଲୋକ ହୋଇଛି। ତାଙ୍କୁ ୭୮ ବର୍ଷ ବୟସ ହୋଇଥିଲା। ମୃତ୍ୟୁଶଯ୍ୟା ନିକଟରେ ତାଙ୍କ ସ୍ତ୍ରୀ, ପୁଅ, ବୋହୂ, ନାତୁଣୀ, ପୁତୁରା, କଥାଶିଳ୍ପୀ ଅଜୟ ମହାପାତ୍ର ପ୍ରମୁଖ ଉପସ୍ଥିତ ଥିଲେ। ଚନ୍ଦ୍ରଶେଖର ଓଡ଼ିଆ ସାହିତ୍ୟରେ ଜଣେ ନିରଳସ ସାହିତ୍ୟ ସାଧକ ଥିଲେ। ତାଙ୍କର ରନାଗୁଡିକ ମଧ୍ୟରେ ‘ଅନ୍ୟ ମଣିଷ’, ‘ସମ୍ପର୍କ’, ‘ଅନ୍ବେଷଣ’, ‘ମେଘୁଆ ଆକାଶ’, ‘ପାଷାଣୀ କନ୍ୟା’, ‘ଇନ୍ଦ୍ରଧନୁ’, ‘ସ୍ବପ୍ନର ସହର’ ଆଦି ଗଳ୍ପ ଏବଂ ‘ଗୋଟିଏ ଗଧର ଆତ୍ମକଥା’ (ଅନୁବାଦ) ପ୍ରମୁଖ ରହିଛି। ତାଙ୍କ ବିୟୋଗ ସାରସ୍ବତ ଜଗତ ପାଇଁ ଏକ ଅପୂରଣୀୟ କ୍ଷତି ବୋଲି ଓଡ଼ିଶା ସାହିତ୍ୟ ଏକାଡେମୀ ପକ୍ଷରୁ କୁହାଯାଇଛି। ୧୯୪୫ ମାର୍ଚ୍ଚ ୧ରେ କଟକର ଥୋରିଆ ସାହିରେ ଜନ୍ମଗ୍ରହଣ କରିଥିବା ଦାସବର୍ମା ଓଡ଼ିଶା ସାହିତ୍ୟ ଏକାଡେମୀର ୨୦୦୪ରୁ ୨୦୦୬ ପର୍ଯ୍ୟନ୍ତ ସମ୍ପାଦକ, ୨୦୦୮ରୁ ୨୦୧୦ ପର୍ଯ୍ୟନ୍ତ ଉପସଭାପତି ଭାବେ ଦାୟିତ୍ୱ ତୁଲାଇଥିଲେ। ସାହିତ୍ୟ ଏକାଡେମୀ ପରିସରରେ ସ୍ବର୍ଗତ ଦାସବର୍ମାଙ୍କ ସ୍ମୃତିରେ ଏକ ଶୋକସଭା ଆୟୋଜନ କରାଯାଇଥିଲା। ଏଥିରେ ଏକାଡେମୀର ସଭାପତି ଡ. ହୃଷୀକେଶ ମଲ୍ଲିକ, ଉପସଭାପତି ଡ. ସଂଗ୍ରାମ ଜେନା, ସଚିବ ପ୍ରବୋଧ କୁମାର ରାଉତ ଓ ଏକାଡେମୀର ସମସ୍ତ କର୍ମଚାରୀ ଉପସ୍ଥିତ ଥିଲେ।