ନୂଆଦିଲ୍ଲୀ,୨୭ା୧୦: ଅନେକ ଅଫିସରେ ଗୁରୁତ୍ୱପୂର୍ଣ୍ଣ ପଦବୀରେ ଥିବା ଅଧିକାରୀମାନଙ୍କୁ ନିୟମିତ ଚିହ୍ନଟ ଓ ବଦଳି କରାଯାଉ ନ ଥିବାରୁ ଦୁର୍ନୀତି ବଢ଼ୁଥିବା ନେଇ କେନ୍ଦ୍ରୀୟ ଭିଜିଲାନ୍ସ କମିଶନ (ସିଭିସି) ଅସନ୍ତୋଷ ବ୍ୟକ୍ତ କରିଛନ୍ତି। ସମ୍ବେଦନଶୀଳ ପଦପଦବୀଗୁଡ଼ିକରେ ଥିବା ଅଧିକାରୀମାନଙ୍କୁ ନିୟମିତ ଭାବେ ଚିହ୍ନଟ କରିବା ସହ ପାଳିକରି ସେମାନଙ୍କୁ ବଦଳି କରିବା ପାଇଁ ସରକାରୀ ବ୍ୟାଙ୍କ, ସରକାରୀ ଉଦ୍ୟୋଗ ଓ କେନ୍ଦ୍ର ସରକାରଙ୍କ ଅଧୀନ ବିଭାଗଗୁଡ଼ିକୁ ସିଭିସି ପରାମର୍ଶ ଦେଇଛନ୍ତି।
ଅକ୍ଟୋବର ୨୫ରେ ଜାରି ଏକ ନିର୍ଦ୍ଦେଶନାମାରେ ସିଭିସି ଉଲ୍ଲେଖ କରିଛନ୍ତି, ମୁଖ୍ୟ ଭିଜିଲାନ୍ସ ଅଧିକାରୀ (ସିଭିଓ)ମାନେ ଦୁର୍ନୀତି ରୋକିବା ସକାଶେ ସମ୍ପୃକ୍ତ ସଂସ୍ଥାଗୁଡ଼ିକର ମୁଖ୍ୟ କାର୍ଯ୍ୟନିର୍ବାହୀ/ମ୍ୟାନେଜମେଣ୍ଟ ସହ ବିଚାରବିମର୍ଶ କରି ଗୁରୁତ୍ୱପୂର୍ଣ୍ଣ ପଦବୀରେ ଥିବା ଅଧିକାରୀମାନଙ୍କୁ ଚିହ୍ନଟ କରିବେ। ୩ ବର୍ଷର ବ୍ୟବଧାନରେ ଭବିଷ୍ୟତରେ ଗୁରୁତ୍ୱପୂର୍ଣ୍ଣ ପଦବୀଗୁଡ଼ିକୁ ନେଇ ସମୀକ୍ଷା ଓ ଚିହ୍ନଟ ପ୍ରକ୍ରିୟା କରାଯାଇପାରେ। ସେହିପରି ଏଭଳି ପଦବୀରେ ଥିବା ଅଧକାରୀମାନଙ୍କୁ କାର୍ମିକ ଓ ତାଲିମ ବିଭାଗ (ଡିଓପିଟି) ପକ୍ଷରୁ ନିର୍ଦ୍ଧାରିତ ସମୟରେ ବଦଳି କରିବା ନେଇ ସୁନିଶ୍ଚିତ କରାଯିବ।
ଅଧିକାରୀମାନଙ୍କୁ ପାଳିକରି ବଦଳି କରାଗଲେ ନ୍ୟସ୍ତସ୍ବାର୍ଥ କମିବା ସହ ଦୁର୍ନୀତି ହ୍ରାସ ପାଇବ ବୋଲି ଡିଓପିଟି କେନ୍ଦ୍ର ସରକାରଙ୍କ ଅଧୀନରେ ଥିବା ସବୁ ବିଭାଗର ସଚିବ ଏବଂ ସରକାରୀ ବ୍ୟାଙ୍କ ଓ ବୀମା କମ୍ପାନୀଗୁଡ଼ିକର ମୁଖ୍ୟ କାର୍ଯ୍ୟନିର୍ବାହୀମାନଙ୍କ ନିକଟକୁ ନିର୍ଦ୍ଦେଶନାମା ପଠାଇଛି। ପରିବର୍ତ୍ତିତ ଦୃଶ୍ୟପଟ ଓ ସଂସ୍ଥାଗୁଡ଼ିକରେ ଟେକ୍ନୋଲୋଜିର ବହୁଳ ବ୍ୟବହାରକୁ ଦୃଷ୍ଟିରେ ରଖି ନିୟମିତ ବ୍ୟବଧାନରେ ଗୁରୁତ୍ୱପୂର୍ଣ୍ଣ ପଦବୀଗୁଡ଼ିକର ତାଲିକା ସମୀକ୍ଷା କରାଯିବା ଜରୁରୀ ବୋଲି ସିଭିସି କହିଛନ୍ତି।