ନୟାଗଡ଼,୧୫।୧୨(ଲୋକନାଥ ମିଶ୍ର): ନୟାଗଡ଼ ବନଖଣ୍ଡ ଖଣ୍ଡପଡ଼ା ରେଞ୍ଜର ନୂଆପଲ୍ଲୀ ଠାରୁ ସାରଣ୍ଡା, ବୁଢ଼ିଝରି, ଆଙ୍ଗିସିଙ୍ଗି, କୋଶଳାଙ୍ଗ ଆଦି ଅଞ୍ଚଳକୁ ସାପୁଆ ଜଙ୍ଗଲ ଭିତରେ ରହିଥିବା ରାସ୍ତାର ରୂପ ବଦଳୁନି । କେତେବେଳେ ରାସ୍ତା ନିର୍ମାଣ ହେଉଛି ତ ଆଉ କେତେବେଳେ ମରାମତି ନାଁରେ ସରକାରୀ ଅନୁଦାନ ପ୍ରତିବର୍ଷ ଖର୍ଚ୍ଚ ଚାଲିଛି। ତେବେ କେଉଁ ଯୋଜନାରେ କାମ ହେଉଛି ସ୍ଥାନୀୟ ଆଦିବାସୀ ଜାଣି ପାରୁ ନାହାନ୍ତି। ରାସ୍ତାର କାମ ସମ୍ପର୍କରେ ସୂଚନା ଫଳକ ନ ଥିବାରୁ ସ୍ବଚ୍ଛତା ରହୁ ନ ଥିବା ଅଭିଯୋଗ ହୋଇ ଆସୁଛି । ଅଭିଯୋଗ କଲେ ଡିପାଟମେଣ୍ଟାଲି କାମ ହେଉଛି, କିଛି ଅସୁବିଧା ନାହିଁ କହି ବନ ବିଭାଗ ଫାଙ୍କି ଚାଲିଛି। ଏଭଳି ସ୍ଥଳେ ବନବିଭାଗ ଡିପାର୍ଟମେଣ୍ଟାଲି କରୁଥିବା ରାସ୍ତା କାମର ସ୍ବଚ୍ଛତା ନେଇ ପ୍ରଶ୍ନ ଉଠିଛି ।
ଏନେଇ ସାରଣ୍ଡାର ଛାଟିଆ ପ୍ରଧାନ କୁହନ୍ତି, ସାପୁଆ ଜଙ୍ଗଲ ଭିତରେ ବନବିଭାଗର କାମ ସନ୍ତୋଷଜନକ ନୁହଁ। ଆଦିବାସୀଙ୍କ ଅଭିଯୋଗ ଚାପି ହୋଇ ରହୁଥିବାରୁ ଧିରେ ଧିରେ ପ୍ରତିବାଦ କମିବାରେ ଲାଗିଛି । ରାସ୍ତା ନିର୍ମାଣ ନାଁରେ ଡ୍ରେନର କିଛି ମାଟି କାଢ଼ି ରାସ୍ତାରେ ଛିଞ୍ଚି ଦେଇ କାମ କରି ବିଲ୍ କରାଇ ନେଉଛନ୍ତି । ରାସ୍ତା କାମରେ ଶ୍ରମିକ କାମ କରୁ ନାହାନ୍ତି । ସବୁ କାମ ଯନ୍ତ୍ର କରୁଛି। ଆମେ ଅଭିଯୋଗ କଲେ କହୁଛନ୍ତି ଡିପାର୍ଟମେଣ୍ଟାଲି କାମକୁ ବିରୋଧ କରିବା ଉଚିତ୍ ନୁହଁ। ସବୁ ଠିକ୍ଠାକ ଚାଲିଛି । ଅଭିଯୋଗ କଲେ କ’ଣ ରାସ୍ତାର ରୂପ ବଦଳିଯିବ, ବରଂ କିଛି କାମ ହେଉଛି ତାକୁ ସ୍ବାଗତ କର କହି ବନବିଭାଗ ବୁଝାଇ ଚାଲିଛି । ସାରଣ୍ଡାର ଦୁର୍ଯ୍ୟୋଧନ ପ୍ରଧାନ କୁହନ୍ତି, ଆଦିବାସୀ ଲୋକ କିଛି ଜାଣୁ ନାହାନ୍ତି । ଜଙ୍ଗଲ ଭିତର ରାସ୍ତାରେ ଅଳ୍ପ କିଛି ମାଟି ପକାଇ ପୁରୁଣା ରାସ୍ତାକୁ ନୂଆ ଦେଖାଇ ବିଲ୍ କରାଯାଉଛି। ଅଭିଯୋଗ କଲେ କିଛି ସୁଫଳ ମିଳୁନି। ବଡ଼ଝାରର କାବୁଲା ମହାପାତ୍ର କୁହନ୍ତି, ପ୍ରତିବର୍ଷ ସାପୁଆ ଜଙ୍ଗଲ ଭିତରର ରାସ୍ତା ନିର୍ମାଣ ଚାଲିଛି । କ୍ଷତିପୂରଣ ଚାରା ରୋପଣ ପାଣ୍ଠି ପରିଚାଳନା ଏବଂ ଯୋଜନା ପ୍ରାଧିକରଣ(କାମ୍ପା)ରେ ରାସ୍ତା କାମ ଡିପାର୍ଟମେଣ୍ଟାଲି ହେଉଛି ବୋଲି କୁହାଯାଉଛି। ତେବେ ରାସ୍ତା ପାର୍ଶ୍ୱରେ ସୂଚନା ଫଳକ ରହୁ ନାହିଁ। ଅପରପକ୍ଷେ ରାସ୍ତା କାମ ଠିକରେ ହେଉ କି ନ ହେଉ ଲୋକ ସେହି ରାସ୍ତାରେ ଯାତାୟତ କରିଥାନ୍ତି । ରାସ୍ତାର ରୂପ ବଦଳୁ ନ ଥିଲେ ମଧ୍ୟ ସରକାର ଅନୁଦାନ ଯୋଗାଇ ଚାଲିଛନ୍ତି । କାମ କେତେଦୁର ହେଉଛି ସେନେଇ ତଦାରଖ ଅଥବା ସମୀକ୍ଷା ଠିକରେ ହେଉ ନ ଥିବାରୁ ସୁଫଳ ମିଳୁନି। ଡିପାର୍ଟମେଣ୍ଟୋଲ କାମ କହି ଲୋକଙ୍କୁ ଭୁଆଁ ବୁଲା ଚାଲିଛି ।
ଏହି ରାସ୍ତା ଉପରେ ରୂପାପଲ୍ଲୀ, ସମ୍ବରବନ୍ଧା, ନୂଆପଲ୍ଲୀ, ସାରଣ୍ଡା, ବୁଡିଝାରୀ, ଉଦୟପୁର ପଞ୍ଚାୟତର କୋଶଳାଙ୍ଗ, ଆଙ୍ଗିସିଙ୍ଗି, ନଇତଇଲା, ଚକାପଥର ପରି ଆଦିବାସୀ ଗାଁ ଲୋକ ନିର୍ଭରଶୀଳ । ଜଙ୍ଗଲ ଭିତର କଥା ବାହାର ଦୁନିଆକୁ ଯାଇ ପାରୁନି। ସିଘାଂପଡାର ସୁବଳ ଚରଣ ପ୍ରଧାନ କୁହନ୍ତି, ନୂଆପଲ୍ଲୀଠାରୁ ଆଙ୍ଗିସିଙ୍ଗି ପର୍ଯ୍ୟନ୍ତ କାମ ଚାଲିଛି। କାମ ଠିକରେ ହେଉନି । ଯାହା ତଦନ୍ତସାପେକ୍ଷ । ଖଣ୍ଡପଡ଼ା ରେଞ୍ଜର ଉଦିତ ପ୍ରଧାନ କୁହନ୍ତି, ରାସ୍ତା କାମ ଠିକରେ ହେଉ ନ ଥିବାର ଅଭିଯୋଗ ମିଳି ନାହିଁ । ତେବେ ରାସ୍ତାକାମ ଠିକ୍ରେ ଚାଲିଛି। ରାସ୍ତା କାମରେ ଯନ୍ତ୍ର ଲଗାଇବାରେ କୌଣସି ଅସୁବିଧା ନାହିଁ ବୋଲି ସେ କହିଛନ୍ତି।
