ନୂଆଦିଲ୍ଲୀ,୮।୯: କେନ୍ଦ୍ର ସରକାର ସମସ୍ତ ଏୟାରଲାଇନ୍ସରେ ଯାତ୍ରା କରୁଥିବା ଯାତ୍ରୀଙ୍କୁ ଖାଦ୍ୟ ପରସିବାକୁ ଅନୁମତି ପ୍ରଦାନ କରିଛନ୍ତି। ଏହାପରେ ସମସ୍ତ ଏୟାରଲାଇନ୍ସ ଏହାକୁ ନେଇ ପ୍ରସ୍ତୁତି ଆରମ୍ଭ କରିଦେଇଥିବା ଜଣାପଡିଛି। ହେଲେ ପୂର୍ବ ମେନୁରେ କିଛିଟା ପରିବର୍ତ୍ତନ କରାଯାଇଥିବା କୁହାଯାଉଛି। ଏବେ ଘରୋଇ ବିମାନରେ ଯାତ୍ରୀଙ୍କୁ ପ୍ରି-ପ୍ୟାକଡ ସ୍ନାକ୍ସ, ମିଲ ଓ ବେଭରେଜ ଦିଆଯିବ। ଇଣ୍ଡିଗୋ, ଏୟାର ଇଣ୍ଡିଆ, ସ୍ପାଇସଜେଟ ସମସ୍ତେ ଖାଦ୍ୟ ମେନୁରେ ପରିବର୍ତ୍ତନ କରିଛନ୍ତି। ତେବେ ଅନ୍ତର୍ଜାତୀୟ ବିମାନରେ ଗରମ ଖାଦ୍ୟ ପରସା ଯିବାର ବ୍ୟବସ୍ଥା ମଧ୍ୟ କରାଯାଇଛି। ଡାଇରୋକ୍ଟରେଟ ଜେନରାଲ ଅଫ୍ ସିଭିଲ ଆଭିଏଶନ(ଡଜିସିଏ)ର ଜଣେ ବରିଷ୍ଠ ଅଧିକାରୀଙ୍କ ସୂଚନା ହେଉଛି ଯେଉଁମାନେ ଯାତ୍ରା କରିବା ସମୟରେ ମାସ୍କ ନ ପିନ୍ଧିଥିବେ ସେମାନଙ୍କୁ ନୋ ଫ୍ଲାଇଙ୍ଗ ଲିଷ୍ଟରେ ସାମିଲ କରାଯିବ। ଘରୋଇ ବିମାନ ଯାତ୍ରା ସମୟରେ ଏପର୍ଯ୍ୟନ୍ତ ବିମାନ ଭିତରେ କିଛି ଖାଇବାକୁ ଅନୁମତି ପ୍ରଦାନ କରାଯାଉ ନ ଥିଲା। ହେଲେ ପରିବର୍ତ୍ତିତ ନିୟମ ଅନୁଯାୟୀ, ପ୍ରି-ପ୍ୟାକ୍ଡ ସ୍ନାକ୍ସ/ ମିଲ୍ସ/ଡ୍ରିଙ୍କସ୍ ଯାତ୍ରୀଙ୍କୁ ପରସା ଯିବ। ଏଥିପାଇଁ ଡିସପୋଜେବଲ ପ୍ଲେଟ, ଗ୍ଲାସ ଆଦି ବ୍ୟବହାର କରାଯିବ। କ୍ରିୟୁ ମେମ୍ବରସ୍ ଯାତ୍ରୀଙ୍କୁ ଖାଦ୍ୟ ପରସିବା ପରେ ପ୍ରତିଥର ଗ୍ଲୋଭସ୍ ବଦଳାଇବା ଜରୁରୀ।
