ବରଗଡ଼ ଅଫିସ୍,୨୭।୧୦: ବରଗଡ଼ ଜିଲାରେ ଆସନ୍ତା ଡିସେମ୍ବର ୧ତାରିଖରୁ ଖରିଫ୍ ଧାନ ସଂଗ୍ରହ ପ୍ରକ୍ରିୟା ଆରମ୍ଭ ହେବ ବୋଲି ପୂର୍ବରୁ ପ୍ରଶାସନ ନିଷ୍ପତ୍ତି ନେଇଥିଲା । ଗତ ୨୧ ତାରିଖ ଜିଲାପାଳଙ୍କ ଅଫିସ ସମ୍ମିଳନୀ କକ୍ଷରେ ଅନୁଷ୍ଠିତ ଜିଲାସ୍ତରୀୟ ଧାନ ସଂଗ୍ରହ କମିଟି ବୈଠକରେ ଏହି ନିଷ୍ପତ୍ତି ନିଆଯିବା ପରେ ଜିଲାର ଚାଷୀ ସଂଗଠନଗୁଡ଼ିକ ଅସନ୍ତୋଷ ପ୍ରକାଶ କରିଥିଲେ। ନଭେମ୍ବର ମାସରୁ ଧାନ ସଂଗ୍ରହ କରିବାକୁ ଦାବି କରିଥିଲେ । ଏହାପରେ ଜିଲା ପ୍ରଶାସନ ପୂର୍ବ ନିଷ୍ପତ୍ତିକୁ ବଦଳାଇଛି। ନଭେମ୍ବର ୨୫ତାରିଖରୁ ଜିଲାରେ ଧାନ ସଂଗ୍ରହ କରିବା ପାଇଁ ନିଷ୍ପତ୍ତି ନିଆଯାଇଛି।
ତେବେ ନଭେମ୍ବର ୨୫ତାରିଖ କେବଳ ଜିଲାର ଅତାବିରା ବ୍ଲକରେ ମଣ୍ଡିଗୁଡ଼ିକ ଖୋଲିବ। ସେହିପରି ୨୬ତାରିଖ ଭେଡ଼େନ, ୨୯ତାରିଖ ବରଗଡ଼, ଡିସେମ୍ବର ୨ରେ ବରପାଲି, ଭଟଲି, ସୋହେଲା, ୩ ତାରିଖରେ ପଦ୍ମପୁର, ପାଇକମାଲ, ୪ତାରିଖରେ ବିଜେପୁର, ଝାରବନ୍ଧ, ୬ତାରିଖ ଅମ୍ବାଭୋନା ଏବଂ ୭ତାରିଖରୁ ଗାଇସିଲେଟ୍ ବ୍ଲକରେ ଧାନ ସଂଗ୍ରହ ପ୍ରକ୍ରିୟା ଆରମ୍ଭ କରିବାକୁ ପ୍ରଶାସନ ପକ୍ଷରୁ ନିଷ୍ପତ୍ତି ନିଆଯାଇଛି। ଅନ୍ୟପକ୍ଷେ ନଭେମ୍ବର ୧୫ତାରିଖ ସୁଦ୍ଧା ଜିଲାର ମଣ୍ଡିଗୁଡ଼ିକ ଖୋଲିବାକୁ ଚାଷୀ ସଂଗଠନଗୁଡ଼ିକ ଦାବି କରୁଛନ୍ତି।