ଆନନ୍ଦପୁର,୧୫।୩(ସ୍ବ.ପ୍ର.): କେନ୍ଦୁଝର ଜିଲା ଆନନ୍ଦପୁରର ଆରାଧ୍ୟ ଶ୍ରୀଶ୍ରୀ ଦଧିବାମନଜୀଉ ମନ୍ଦିର ରୂପରେଖ ବଦଳିବ। ମନ୍ଦିର ପରିଚାଳନା ପାଇଁ ରହିଥିବା ଦେବୋତ୍ତର ବିଭାଗ ସମ୍ପତ୍ତିର ପୁନରୁଦ୍ଧାର, ଆୟ ବୃଦ୍ଧି ଦିଗରେ ପଦକ୍ଷେପ, ମନ୍ଦିର ପରିସରରେ ରହିଥିବା ଭଙ୍ଗାତୁଟା ଘରର ପୁନରୁଦ୍ଧାର ଓ ଆନନ୍ଦ ବଜାର ଖୋଲାଯାଇ ଉନ୍ନତମାନର ପ୍ରସାଦ ବଣ୍ଟନ ବ୍ୟବସ୍ଥା ଗ୍ରହଣ କରାଯିବ। ମଙ୍ଗଳବାର ଦେବୋତ୍ତର ବିଭାଗର ଅତିରିକ୍ତ ସହକାରୀ କମିଶନର ରାଜେଶ ରୋଶନ ଏଠାକୁ ଗସ୍ତରେ ଆସି ମନ୍ଦିର ପରିଦର୍ଶନ କରି ଫେରିଛନ୍ତି। ଆନନ୍ଦପୁର ଦେବୋତ୍ତର ବିଭାଗର ମୁଖ୍ୟ ତଥା ଉପଜିଲାପାଳ ଅନୀଲ କୁମାର ସେଠୀ ଓ ଦେବୋତ୍ତର ବିଭାଗ ଦାୟିତ୍ୱରେ ଥିବା ରାଜସ୍ବ ଅଧିକାରୀ ପ୍ରଦୀପ କୁମାର ପାଢ଼ୀ ଉପସ୍ଥିତ ରହି ମନ୍ଦିରର ବିଭିନ୍ନ ସମସ୍ୟା ସମ୍ପର୍କରେ ଆଲୋଚନା କରିଥିଲେ। ସ୍ଥାନୀୟ ବୁଦ୍ଧିଜୀବୀ ଓ ଗଣମାଧ୍ୟମ ପ୍ରତିନିଧି ଉପସ୍ଥିତ ରହି ମନ୍ଦିରର ରହିଥିବା ବିଭିନ୍ନ ସମସ୍ୟା ସମ୍ପର୍କରେ ଉପସ୍ଥାପନ କରିଥିଲେ। ଏପରିକି ମନ୍ଦିରରେ ଭୋଗର ମାନ ହ୍ରାସ ପାଇଥିବା ସମ୍ପର୍କରେ ମଧ୍ୟ ଅତିରିକ୍ତ ସହକାରୀ କମିଶନରଙ୍କୁ ଅବଗତ କରାଯାଇଥିଲା।
୧୨ ମାଣ ଚାଉଳରେ ଖିଚୁଡ଼ି ଭୋଗ ନୀତି ହୋଇଆସୁଥିବା ବେଳେ କାଳକ୍ରମେ ୮ ପରେ ୬ ଏବଂ ବର୍ତ୍ତମାନ ୩ ମାଣରେ ଭୋଗନୀତି ସମ୍ପନ୍ନ କରାଯାଉଛି। ପୂର୍ବରୁ ଥାଳିରେ ଭୋଗନୀତି ହେଉଥିବାବେଳେ ଏବେ ଚଉପତିରେ ଭୋଗକୁ ସୀମିତ କରାଯାଇଥିବା କୁହାଯାଇଥିଲା। ଗୁରୁତ୍ୱପୁର୍ଣ୍ଣ ପ୍ରସଙ୍ଗ ଜାଣିବା ପରେ ଏସବୁ ବିଷୟରେ ଆଲୋଚନା ହୋଇଥିଲା। ପରେ ମନ୍ଦିରର ୧୦ ବର୍ଷର ଆୟବ୍ୟୟ ହିସାବ ତନଖି କରାଯାଇଥିଲା। ଅତିରିକ୍ତ ସହକାରୀ କମିଶନର ହିସାବ ଯାଞ୍ଚ କରିବା ସମୟରେ ଏଥିରେ ବ୍ୟାପକ ଅନିୟମିତତା ହୋଇଥିବା ଜାଣିବାକୁ ପାଇଥିଲେ। ମନ୍ଦିର ପରିଚାଳକ ୧୦ ଦିନ ମଧ୍ୟରେ ୧୦ ବର୍ଷର ହିସାବ ଆର୍ଡିସି ସମ୍ବଲପୁର କାର୍ଯ୍ୟାଳୟରେ ଦାଖଲ କରିବାକୁ ସେ ନିର୍ଦ୍ଦେଶ ଦେଇଛନ୍ତି। ସେବାୟତ ସନ୍ତୋଷ କୁମାର ପାଢ଼ୀ, ଜଗତ କୁମାର ମିଶ୍ର, ରବୀନ୍ଦ୍ର କୁମାର ଦାଶ, ଜଗବନ୍ଧୁ ଦାଶ, ଯଶୋବନ୍ତ କର, ଶଙ୍କର୍ଷଣ ମିଶ୍ର, ବିଶ୍ୱନାଥ ପାତ୍ର, କୃଷ୍ଣଚନ୍ଦ୍ର ସାହୁ, ଶରତ ଚନ୍ଦ୍ର ମହାରଣା ପ୍ରମୁଖ ପୂର୍ବରୁ ନିର୍ଦ୍ଧାରିତ ବେତନ ବୃଦ୍ଧି ନିମନ୍ତେ ଦାବିପତ୍ର ପ୍ରଦାନ କରିଥିଲେ।