ଡେରାଡୁନ,୩।୫: ସାରା ଦେଶରେ ମଙ୍ଗଳବାର ଅକ୍ଷୟ ତୃତୀୟା ପର୍ବ ପାଳନ କରାଯାଉଛି। ଏହି ଶୁଭ ଅବସରରେ ଉତ୍ତରାଖଣ୍ଡରେ ମଙ୍ଗଳବାରରୁ ଚାରିଧାମ ଯାତ୍ରା ଆରମ୍ଭ ହୋଇଛି। କରୋନା ଯୋଗୁ ଗତ ୨ ବର୍ଷ ହେଲା ଚାରିଧାମ ଯାତ୍ରା ବାଧାପ୍ରାପ୍ତ ହୋଇଥିଲା। ହେଲେ ଚଳିତ ବର୍ଷ ଶ୍ରଦ୍ଧାଳୁଙ୍କ ମଧ୍ୟରେ ଏହି ଯାତ୍ରାକୁ ନେଇ ବେଶ୍ ଉତ୍ସାହ ଭରି ରହିଛି। ଆଶା କରାଯାଉଛି, ଏଥର ଦେଶର କୋଣ ଅନୁକୋଣରୁ ହଜାର ହଜାର ଶ୍ରଦ୍ଧାଳୁ ଚାରିଧାମ ପରିଦର୍ଶନ କରିବାକୁ ପହଞ୍ଚିବେ। ଭକ୍ତଙ୍କ ଯାତ୍ରାକୁ ସହଜ କରିବା ପାଇଁ ସରକାର କରୋନା ଟେଷ୍ଟ ଓ ଟିକାକରଣର ପ୍ରମାଣପତ୍ର ଯାଞ୍ଚ କରିବା ବାଧ୍ୟତାମୂଳକ କରିନାହାନ୍ତି। ଇତିମଧ୍ୟରେ ଗଙ୍ଗୋତ୍ରି ଧାମର କବାଟ ମେ’୩ ଅର୍ଥାତ୍ ମଙ୍ଗଳବାର ସକାଳ ୧୧ଟା ୧୫ରେ ଖୋଲାଯାଇଛି। ଦ୍ୱାର ଖୋଲାଯିିବା କାର୍ଯ୍ୟକ୍ରମରେ ଉତ୍ତରାଖଣ୍ଡ ମୁଖ୍ୟମନ୍ତ୍ରୀ ପୁଷ୍କର ସିଂ ଧାମି ଅଂଶଗ୍ରହଣ କରିଥିଲେ। ସେହିପରି ୟମୁନେତ୍ରୀ ଧାମର ଦ୍ୱାର ମଧ୍ୟ ମଧ୍ୟାହ୍ନ ୧୨ଟା ୧୫ରେ ଖୋଲିଛି। ସୂଚନା ଅନୁଯାୟୀ, କେଦାରନାଥ ଧାମର କବାଟ ମେ’ ୬ ସକାଳ ୬ଟା ୨୫ରେ ଖୋଲିବ। ସେହିଭଳି ବଦ୍ରିନାଥ ଧାମର କବାଟ ମେ’ ୮ ସକାଳ ୬ଟା ୧୫ରେ ଖୋଲିବ ବୋଲି ଜଣାପଡ଼ିଛି। ଆଗାମୀ ଦିନ ପାଇଁ ରେଜିଷ୍ଟ୍ରେସନ ପୂର୍ଣ୍ଣ ହୋଇଥିବାରୁ ବହୁ ସଂଖ୍ୟାରେ ଭକ୍ତ ଚାରିଧାମ ଯାତ୍ରା କରିବେ ବୋଲି ଆଶା କରାଯାଉଛି। ତେବେ ଉତ୍ତରାଖଣ୍ଡ ସରକାରଙ୍କ ନିର୍ଦ୍ଦେଶକ୍ରମେ ଦୈନିକ ୧୫ହଜାର ଶ୍ରଦ୍ଧାଳୁ ବଦ୍ରିନାଥ ପରିଦର୍ଶନ କରିପାରିବେ। କେଦାରନାଥରେ ୧୨ହଜାର, ଗାଙ୍ଗୋତ୍ରିରେ ୭ହଜାର ଏବଂ ୟମୁନେତ୍ରିରେ କେବଳ ୪ହଜାର ଭକ୍ତଙ୍କୁ ଦର୍ଶନ କରିବାକୁ ଅନୁମତି ଦିଆଯିବ। ପ୍ରଥମ ୪୫ ଦିନ ପାଇଁ ଏହି ସମୟ ସୀମା ଲାଗୁ କରାଯାଇଛି। ଦେଶରେ ବଢ଼ୁଥିବା କରୋନା ମାମଲାକୁ ଦୃଷ୍ଟିରେ ରଖି ରାଜ୍ୟ ସରକାର ଏହି ପ୍ରତିବନ୍ଧକ ଲଗାଇଛନ୍ତି।
