ଡେରାଡୁନ,୧୩।୫: ଉତ୍ତରାଖଣ୍ଡର ପବିତ୍ର ଚାରିଧାମ ଯାତ୍ରା ଗତ କିଛି ଦିନରୁ ଆରମ୍ଭ ହୋଇଛି। ଯାତ୍ରା ଆରମ୍ଭରୁ କେତେକ ଯାତ୍ରୀଙ୍କ ମୃତ୍ୟୁ ଖବର ମଧ୍ୟ ସାମ୍ନାକୁ ଆସୁଛି। ଇତିଧ୍ୟରେ ଗୁରୁବାର ବିଳମ୍ବିତ ରାତିରେ ଯମୁନେତ୍ରୀ ଧାମରୁ ଫେରୁଥିବା ଜଣେ ତୀର୍ଥଯାତ୍ରୀଙ୍କ ହୃଦ୍ଘାତରେ ପରଲୋକ ହୋଇଥିବା ବେଳେ ଆଉ ଜଣଙ୍କର ଘୋଡାରୁ ଖସିପଡି ମୃତ୍ୟୁ ହୋଇଛି। ଯମୁନେତ୍ରୀ ଧାମରେ ତୀର୍ଥଯାତ୍ରୀଙ୍କ ହୃଦ୍ଘାତରେ ମୃତ୍ୟୁ ସଂଖ୍ୟା ୧୨ରେ ପହଞ୍ଚିଛି। ଅନ୍ୟପଟେ ଗଙ୍ଗୋତ୍ରୀ ଧାମରେ ମଧ୍ୟ ହୃଦ୍ଘାତ ଯୋଗୁ ବର୍ତ୍ତମାନ ପର୍ଯ୍ୟନ୍ତ ୩ଜଣଙ୍କର ମୃତ୍ୟୁ ହୋଇଛି। ଉଭୟ ଧାମରେ ମୃତ୍ୟୁ ସଂଖ୍ୟା ୧୬ରେ ପହଞ୍ଚିଥିବା ଜଣାପଡ଼ିଛି। ସୂଚନାଯୋଗ୍ୟ, ଗୁରୁବାର ଯମୁନେତ୍ରୀ ଧାମରୁ ଫେରୁଥିବା ପ୍ରକାଶ ଚାନ୍ଦ ନାମକ ଜଣେ ତୀର୍ଥଯାତ୍ରୀଙ୍କୁ ରାମ ମନ୍ଦିର ନିକଟରେ ନିଶ୍ୱାସ ନେବାରେ କଷ୍ଟ ଅନୁଭବ ହୋଇଥିଲା। ତାଙ୍କୁ ଚିକିତ୍ସା ପାଇଁ ଜାନକୀ ଚଟ୍ଟିରେ ଭର୍ତ୍ତି କରାଯାଇଥିଲା। ହେଲେ ସେଠାରେ ଡାକ୍ତର ତାଙ୍କୁ ମୃତ ବୋଲି ଘୋଷଣା କରିଥିଲେ। ସେହିପରି ବିହାର ଚମ୍ପାରନର ବାବୁ ପ୍ରସାଦ ନାମକ ଜଣେ ତୀର୍ଥଯାତ୍ରୀ ବନ୍ଦେଲୀଗାଡ ବ୍ରିଜ ନିକଟରେ ଘୋଡାରୁ ଖସିପଡ଼ିବା ପରେ ଆହତ ହୋଇଥିଲେ। ତାଙ୍କୁ ମଧ୍ୟ ଚିକିତ୍ସା ପାଇଁ ଜାନକୀ ଚଟ୍ଟିକୁ ନିଆଯାଇଥିଲା। ସେଠାରେ ବାବୁ ପ୍ରସାଦଙ୍କୁ ଡାକ୍ତର ମୃତ ଘୋଷଣା କରିଥିଲେ। ଅନ୍ୟପଟେ ମୃତଦେହକୁ ପରିବାର ଲୋକଙ୍କୁ ହସ୍ତାନ୍ତର କରାଯାଇଛି ବୋଲି ବଡକୋଟ ଥାନାର ପୋଲିସ ଅଧିକାରୀ ସୂଚନା ଦେଇଛନ୍ତି।
